YUZÜNGTHALO 11
11
Amuzho tüsho Mihyuanikhi
1“Jumonü nünü Atungpuh nü Thrünpuh muzhoang, tüsho apinü alunekhibo, yakzanbo, thiyuzüngbo, tüsho thiyukhümbo kamruhroro zoang. 2Atungpuh nü Thrünpuhnü thsangdankhi nü tsührübonü müngü tüsho mümükheah de khihni lümkhitang: Api wüntre-müretah, api khah ato; achungkhitkhi khah; 3amütsanbo tüsho api rhimobo Ijip ching Pharao kiulongthsüpuh ki tüsho api lomi alala ching rhimokhi, 4tüsho apinü Ijip bonungrü, arü khorabo tüsho khora-lolungbebo kheak rhimokhi; apinü arü nüsa müshamde arüchoki Amürüm Keto bukmishihkhi, tüsho Atungpuhnü arü khihni ha khiungde dükheakshihkhi; 5tüsho nüsa ha dangpung mukhiungyi khiungde apinü nüsa ki sunglo ching rhimokhi; 6tüsho apinü Reuben tsührü, Eliab tsührübo Dathan tüsho Abiram kheak rhimokhi; alonü amün kabah, arü yambukbo, khimyambo tüsho Israelrü bolung arü yande arükhi rhangdung labe alala arü lung muyuabahkhi; 7tümüde Atungpuhnü rhimo ato rhimokhi alala nüsa müknü ngüdo.
Alokhikhi Lo Müngühmühibo
8“Jumonü khihni inü nüsa kilim jihkhi thiyukhüm alala aniang, junangde, nüsanü amükühpü hode ayüpü lomi ching yüzahpü sühmüh labah tüsho alubah, 9tüsho junangde Atungpuhnü nüsa jipürü tüsho arü tsühsoniuso kilim jihpü thiyuchihchimkhi niuhke tüsho mukhuke bukde alakhi lo ching nüsa kutsüpde alabah. 10Tümüde nüsanü yübah müküh-a lupü lakhi lo ju nüsa arüpung Ijip lo nangde yung, ju ching nüsanü wotsühworabe tüsho awündo nangde müjih yang tüsho nüsa jingnü tsahde ke duh; 11tüshe nüsanü müküh-a lupü lo ju thüning ching tsüngkenü adütsütkhi awungbo tüsho jindükhünbo lah, 12alo ju Atungpuh nüsa Thrünpuhnü kümchoh; kam atankihnü kam akheam khiungde Atungpuh nüsa Thrünpuh mük ju kheak lachoh.
13“Tüsho nüsanü khihni inü ajihkhi thiyukhümbo düshihde anide, nüsa mulong athrünkhinü tüsho me athrünkhinü Atungpuh nüsa Thrünpuh tankihsho, 14nüsa lo thsungkheaknü inü akheahmünchi ching, akhuhbe tüsho ashube tsüng arüshihbah, junangde nüsanü hi, yukhu tüsho oliv müdangke hanmukhungbah. 15Tüsho inü nüsa lubo ching nüsa akam-shiwüh thsungkheak rim mukhuhshihbah, tüsho nüsanü akünkhi tsühyungpü tsühde nüsa bukthsübah. 16Nüsanü ha tsüde aniang, jude yungsho nüsa mulong bephülapde püpürü thrünpuhbo tankihbah tüsho kingaünbah, 17jude yungsho nüsa azhihde Atungpuhnü bukakhiukbah, tüsho apinü thüning khimdobah tsüng marüshih, tüsho alonü tümü makhiukshih, tüsho Atungpuhnü nüsa kilim jihkhi lo chingnü nüsa nahde adükheakbah.
18“Jumonü nüsanü I yu harübo nüsa mulong tüsho me ching zoang tüsho jurübo mümihpü thsüde nüsa khahbo tüsho kingkangbo kheak rümkihang. 19Nüsa yam ching binchoki, nüsa limro ching tsahchoki, nüsa ayapchoki tüsho asürüchoki nüsanü harü nüsa tsührübo ki thsangyubah. 20Tüsho nüsanü jurübo nüsa yam ripit dungjingbo tüsho chipimurungbo kheak thrütkih-a zoang, 21junangde Atungpuhnü nüsa jipürü ki arü jihpü thiyuchihchimkhi lo ching alomi kumung thüning lakhi khiungde nüsa le nüsa tsührübo kutsüpde alabah.
22“Tümüde nüsanü kümkangde arhimopü thsüde inü thiyukhüm jihkhi ha thiyukhümbo Atungpuh nüsa Thrünpuh muzhopü, api limro ching tsahpü tüsho api kheak chingkihde alapü mihyuanisho, 23Atungpuhnü arü trükshihbo nüsa müngühnü yankhita bahbah, tüsho nüsa kheaknü atobe tüsho wu-sühmüh lakhi trükbo nüsanü yankhita bahbah. 24Nüsa jinglungnü athrümkhi dangpung aban nüsa yo thsübah: sunglo tüsho Lebanon chingnü Euphra yung kheaknü Mediterranean Keto she khiungde nüsa lomi thsübah. 25Mihtsürü shenü she nüsa azhihde müzhipkhuk; apinü nüsa ki thiyuchihchimkhi nangde, nüsanü tsahyukde ayüpung lomi alala ching nüsa dünkheak phüthsaksümde tüsho trede akamshihbah.
26“Kheahang, inü khihni nüsa miki müngühmühi khülang tüsho muthrumünean khülang zojihchoh: 27khihni inü nüsa ki thiyukhüm jihkhi Atungpuh nüsa Thrünpuh yukhümbo anisho müngühmühi; 28tüsho inü nüsa khihni thiyukhüm jihkhi Atungpuh nüsa Thrünpuh yukhümbo manide rholobah nüsanü mümükheahkhi püpü thrünpuhbo kilim yüsho, muthrumünean. 29Tüsho ha ruk labah, küyimki Atungpuh nüsa Thrünpuhnü nüsanü amükühpü lakhi lo ching bedarübanü, Gerizim müzüng kheaknü müngühmühi zhiyukang tüsho Ebal müzüng kheaknü muthrumünean zhiyukang. 30Jurübo Jordan hobah, aniyüzahlim peang Araba ching lakhi Kananrü lo ching Gilgal phünide, More thülamsang yean lah yung de? 31Tümüde Atungpuh nüsa Thrünpuhnü nüsa kilim jihkhi lo müküh-a lupü thsüde nüsa Jordan hode ayübah; tüsho küyimki nüsanü ha müküh-a lubah ju ching labanü, 32khihni inü nüsa miki zojihkhi yakzanbo tüsho thiyuzüngbo nüsanü kümkangde rhimoang.
Currently Selected:
YUZÜNGTHALO 11: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
