YUZÜNGTHALO 10
10
Mosanü Thiyuzüng Leangkhilokhi
(Abe 34.1-10)
1“Judüki Atungpuhnü I ki tha, Akhuhlim nangde nünü lungbeak mahne phukang, tüsho I kilim müzüng ching atuang. Kheaküshe nünü sangdan khülang thsüang. 2Tüsho nünü adannakkhi lungbeakbo kheak kihkhi yu inü lungbeakbo kheak thrütkihbah; tüsho nünü ju ne sangdan ching yukbah.
3“Jumonü inü akasia sangnü sangdan thsü tüsho akhuhlim nangde lungbeak mahne phuka lu tüsho ju ne I khah ching shuhbah müzüng ching wutu. 4Tüsho müzüng ching mukhung nimung Atungpuhnü mo chingnü nüsa ki thakhi thiyuzüng thürü akhuhlim thrütkhi nangde apinü lungbeakbo kheak thrütkih; tüsho Atungpuhnü ju I kilim jih. 5Jushu inü rholobahle müzüng chingnü aki, tüsho lungbeakbo ju inü athsükhi sangdan ching yuk; tüsho Atungpuhnü I ki thiyukhüm jihkhi nangde jurübo ju ching lah.”
6(Kheakü Israelrübo Bene Jaakan kekhipbo chingnü tsahmusubah Mosera ching yü. Ju ching Aron shekheah tüsho kiuyukabah; tüsho atsührü Eleazarnü api müthri amükeamrü thsüde tankih. 7Ju chingnü arü Gudgoda ching yü tüsho ju chingnü ayung lakhi lo Jobatha ching yü. 8Judüki Atungpuh tangzüng sangdan shuhbahle api miki zhipde atankihpü tüsho api mungshide khihni ha nangde alashihpü Atungpuhnü Levirü trük büthsüde mokhit. 9Jumonü Levirü trük a keoniorü bolung shihcham yungsho yamrüplurüp müla; A TUN GPU H nüsa Thrünpuhnü arü ki alokhikhi nangde Atungpuh ju lang arü yamrüplurüp thsübah.)
10“Akhuhlim rhimokhi nangde, inü müzüng ching nimung yirü tüsho tsüngre yirü mung; ju kim ching she Atungpuhnü I ki anijihdo, tüsho apinü nüsa dükheakshihpü mumulongde kam. 11Tüsho Atungpuhnü I ki tha, Asürang, mihtsürübo müngüh hantsahmusuang, junangde arü kilim jihpü inü nüsa jipürü ki thiyuchihchimkhi lo ching arünü yübah alubah.
Thrünpuhnü Lunekhi
12“Tüsho kheakü, O Israel, Atungpuh nü Thrünpuhnü nü kheaknü tümü kheangcho, tüshe Atungpuh nü Thrünpuh wüntreang, api limrobo ching tsahpü tüsho api muzhopü Atungpuh nü Thrünpuh nü mulong tüsho nü me athrünkhinü atankihpü, 13tüsho nü tsüpü thsungkheak khihni inü nü jihkhi Atungpuh yukhümbo tüsho api yakzanbo anide arhimopü? 14Kheahang, thüning tüsho yinmi bolung yinmi, alomi tüsho ju ching lakhi athrünkhi Atungpuh nü Thrünpuh yo ah. 15Tüshe khihni lakhi nangde Atungpuhnü nüsa jipürü kheak mulong keamde muzho tüsho apinü arü tsührü-tsührübo, nüsabo trükshih alala kurungkheak mokhit. 16Jumonü nüsa mulong tsütabahang, tüsho kheaküa nihnihde düla. 17Tümüde Atungpuh nü Thrünpuh ju thrünpuhbo kurungkheak Thrünpuh tüsho atungrübo kurungkheak Atungpuh , ato Thrünpuh wu ato tüsho atrebe, shepünü jak mükheah tüsho buknim müleangkhicho, 18apinü mürerü tüsho khimoberü thsungkheak thiyuro rhimochoh, tüsho tsotsahrü muzhode, arü kilim tsühyungpü tüsho khimmih jihchoh. 19Tüsho nüsanü tsotsahrü ki muzhoang, tümütüsho nüsabo khülang ki Ijip ching tsotsahrü lakheah. 20Nünü Atungpuh nü Thrünpuh wüntreang tüsho api tankihang. Api kheak düngdüngde ramrihang tüsho api mung chingnü thiyuchihchimang. 21Api ju nünü mungshi jihpü lah, tüsho api ju harü ato tüsho atrebe rhimobo nü müknü ngüde arhimokhi nü Thrünpuh ah. 22Nüsa jipürü mihtsürü 70 Ijip lim yüki, tüsho kheakü Atungpuh nüsa Thrünpuhnü nüsa thüning ching chiningbo nangde hihde kamshih.
Currently Selected:
YUZÜNGTHALO 10: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
