DANIEL 2
2
Nebukednezar Milim
1Nebukednezar kiulongthsü kam mahnepü ching, apinü milim mi; api me küpkhuk tüsho müyapkhukde alakheah. 2Jumonü apinü anihbuh ki amilim thanakshihpü kuhikheahrü, wurük-huhrü tüsho Kaldearü, thümürübo jide arüpü yüshih. Küyimki arü arükhea tüsho kiulongthsüpuh miki zhipkhea, 3apinü arü ki tha, “ Inü milim khülang mibah ju mükheahnekhinü I me küpkhukde lah.” 4Kaldearünü Aramik yu chingnü kiulongthsüpuh ki tha, “ O kiulongthsüpuh, kutsüpde laang! Nü yamlarübo ki milim kheanang, tüsho isanü thanaka huhbah.” 5Kiulongthsüpuhnü Kaldearü ki alo, “Ha inü apungkhikhi yuzüng ah: mürangkhüh nüsanü I ki milim mikhi tüsho thanakkhi muhuhsho, nüsa jingkhahbo adütre kamde akhapthünakbah tüsho nüsa yambo mobün kambah. 6Tüshe nüsanü milim kheanbah I ki thanakkhi huhsho, I kilimnü nüsa thsambahbo, mungshi tüsho wüntre ato leangkhibah. Jumonü I ki milim tüsho ju thanakkhi thaa huhang.” 7Arünü mahne kipü alo, “ Kiulongthsüpuhnü akhuhde ayamlarübo ki milim thaang, jushu isanü thanakanü.” 8Kiulongthsüpuhnü alo, “ Nüsanü kim beshangpü mürangchoh de inü tsükjide mükheahlah, tümütüsho inü thiyuzüng müküpde athsükhi nüsanü mükheahlah: 9nüsanü I ki milim müthasho, nüsa thsungkheaknü lümkhi khülang lah. Nüsanü atsü dünjibah de mulonglamde I ki akeangyu thapü tüsho bephülapyu thapü mulongkhitdo. Jumonü I ki milim thaang tüsho nüsanü thanakkhukbah de inü mükheahbah.” 10Kaldearünü kiulongthsüpuh ki alo, “ Kiulongthsüpuhnü alunekhi akhiuka huhkhukpü thsüde alomi kheak sheshe müla! Atsütsü she kiulongthsüpuh, ato tüsho wulakhinü, hadürü küyimkishe kuhi-kheahrü yungsho wurük-huhrü yungsho Kaldearü ki keoamükheah. 11Kiulongthsüpuhnü akeokhikhi ju khide chaklah, tüsho mihtsürü lung mülakhi thrünpuhbonü khüh yungsho shenü she ha kiulongthsüpuh ki müthakhitkhuk.”
12Ha dünkheaknü kiulongthsüpuhnü khide bukakhiuk tüsho Babilon mihtsürü lümlung larü alala laksahpü thiyukhüm jih. 13Thiyuzüng ju jihkham tüsho lümlung larü mihtsürübo ju alaksahpü tankih; tüsho arünü Daniel tüsho api müyamrübo laksahpü yim.
Thrünpuhnü Daniel ki Milim Amütsan Huhkhi
14Judüki Danielnü lümlung lade tüsho kümkangde, Babilon lümlung larü mihtsürü laksahpü wukhiukbuh kiulongthsüpuh wühkenorü Ariok ki alo; 15apinü wühkenobuh Ariok ki keokhi, “ Kiulongthsüpuh yukhüm tümüde khide aniokheama le?” Arioknü Daniel ki amütsan thanaka huh. 16Jumonü Danielnü yüzah tüsho kiulongthsüpuhnü api kilim kim jihshihpü mushu, junangde apinü kiulongthsüpuh ki thanaka huhpü lakheah.
17Judüki Danielnü ayam lim yü tüsho api müyamrübo Hanania, Mishael tüsho Azaria ki thiyusheak jih, 18tüsho ha amüthakhukkhi aramyu dünkheaknü Daniel tüsho api müyamrübo Babilon lümlung larü mihtsürü lung müdükheakpü thsüde yinmi Thrünpuh kilimnü mihmuzho yimshihpü arü ki tha. 19Judüki amüthakhukkhi aramyu ju azhing michih ching Daniel ki akhiuka huh tüsho Danielnü yinmi Thrünpuh shijih.
20Danielnü tha:
“ Lün chingnü lün Thrünpuh mung müngühmühi thsang,
tümüde lümlung tüsho wu api yo ah.
21Apinü kimbo tüsho akheahmünchibo müthrichoh,
kiulongthsürübo ayoshihchoh tüsho kiulongthsürübo shuhkihchoh;
apinü lümlung larü kilim lümlung tüsho anikhitrü kilim mükheahmudu jihchoh.
22Apinü asük tüsho rama lakhibo akhiuka huhchoh;
apinü amiting ching tümü lanü mükheahlah,
tüsho api lung ayin lah.
23O I jipü Thrünpuh, nü kilim inü makshe jihchoh tüsho shijihchoh,
tümüde nünü I kilim lümlung tüsho wu jihdo
tüsho isanü nü ki tümü keokhikheanü I ki akhiuka huhdo,
tümüde kiulongthsüpuhnü tümü thiyukhüm jihkheanü nünü isa ki akhiuka huhdo.”
Danielnü Kiulongthsüpuh ki Milim Tha tüsho Thanak
24Jumonü Danielnü Babilon lümlung larü mihtsürü dükheakshihpü kiulongthsüpuhnü mokhitbuh Ariok kilim yü, tüsho api ki tha, “Babilon lümlung larü mihtsürü düdükheakshih; kiulongthsüpuh miki I bede yüzahang, tüsho inü kiulongthsüpuh ki thanaka huhanü.”
25Judüki Arioknü Daniel ju niokheamde kiulongthsüpuh miki bedarü tüsho api ki tha, “ Kiulongthsüpuh ki thanaka huhkhukpü thsüde Juda chingnü ramtsorü bolung inü mihtsürü khülang ngüdo.” 26Kiulongthsüpuhnü mung Belteshazzar de ajikhi Daniel ki tha, “ Inü angükhi milim tüsho thanakkhi nünü I kilim thakhukba de?” 27Danielnü kiulongthsüpuh ki alo, “ Lümlung larü mihtsürü, kuhikheahrü, wurük-huhrü yungsho müchitrü shenü she kiulongthsüpuhnü akeokhikhi amüthakhukkhi aramyu muhuhkhuk, 28tüshe aramyu akhiuka huhbuh Thrünpuh khülang yinmi ching lah, tüsho Apinü akheam nimungbo ching tümü dünjibanü kiulongthsüpuh Nebukednezar ki huhdo. Nü yapkiu ching yapshea lachoki nü milim tüsho michih harü lakheah: 29O kiulongthsüpuh, nü yapa lachoki ha dunglim tümü labanü lümkhibo nü kilim arüdo, tüsho aramyu akhiuka huhbuhnü tümü thsübanü nü ki huhdo. 30Tüshe I thsungkheak a, püpürü rhangdung larü kheaknü I lümlung khürü lamonü ha aramyu I ki akhiuka huhkhi yung, tüshe thanakkhi ju kiulongthsüpuh ki mükheahshihpü thsungkheak tüsho junangde nü mulong ching lümkhibo anikhitbah.
31“ Nünü kheahde alakheah, O kiulongthsüpuh, tüsho kheahang! Sangthsü ato khülang lakheah. Ha sangthsü ju amuliuh, azhingzhing tüsho arakrak lakheah; ju nü miki zhipde alakheah, tüsho aphü ju atrebe lakheah. 32Sangthsü ku ju suna müthsün, atreang tüsho abinbo ju shotoyinchi, abuk tüsho phobo ju müwayinchi, 33ajinglünbo ju yinchi, amüphü ju chamkhüh yinchi tüsho chamkhüh alo. 34Nünü kheahde lachoki, mihtsürü khahnü yungde lung khülang keamkhi, tüsho junü sangthsü yinchi tüsho alo müphü kheak king tüsho adütre kamde trü. 35Judüki yinchi, alo, müwayinchi, shotoyinchi, tüsho suna alala ju adütre kamde yihthünak tüsho muzhu rhimopung yo hitsüt nangde kam; tüsho apungnü jurü yünde tsoabah, junangde arü ru müngükhukde kam. Tüshe sangthsü kingkhi lung junü müzüng ato khülang kam tüsho alomi athrünkhi mi.
36“Milim ju ha lakheah; kheakü isanü kiulongthsüpuh ki athanakkhi thabah. 37Nü, O kiulongthsüpuh, kiulongthsürübo kurungkheak kiulongthsüpuh shepü kilim yinmi Thrünpuhnü kiulongthsü, wu, sühmüh, tüsho müretahkhi jihkhea, 38shepü khah ching apinü mihtsürübo jihkhea, arü küching küching lalashe, thulu ching mütüm shiwühbo, tüsho thüning wuhnubo, tüsho apinü shepü ki arü alala kurungkheak yakzanshuhrü kamshih– nü ju suna aku khülang ah. 39Nü dunglim, nü kheaknü aninibe püpü kiulongthsü asürübah. Ju khin, müwayinchi nangde alakhi kiulongthsü asampünü lomi athrünkhi kurungkheak yakzan shuhbah. 40Akheamde, yinchi nangde amüküp, kiulongthsü aphüyipü labah–tümüde yinchi lüpdükhi yihshakchoh tüsho adütre kamde kingnakchoh–junangde hanü püpürü alala zünakbah tüsho ayihshakbah. 41Nünü ajing tüsho jingkutopü chamkhüh alo nungkhi tüsho chamkhüh yinchi ngükhi nangde, ha achamnak kiulongthsü labah; nünü yinchi ching alo thsürua ngüngü she, ju ching yinchi sühmüh khürü labah. 42Jingkutopü chamkhüh yinchi tüsho chamkhüh alo lakhi nangde, kiulongthsü ju chamkhüh amüküp tüsho chamkhüh athrathra labah. 43Nünü yinchi le alo düsah-a ngükhi nangde, mihtsürübo khülangnü khülang düsah-a labah, tüshe yinchinü alo ching müthsürukhi nangde arünü arihakode müla. 44Jurü kiulongthsürübo kim ching, küyimkishe müthsümünimbe yungsho püpürü mihtsürü kilim müjihpü kiulongthsü khülang yinmi Thrünpuhnü alashihbah. Junü kiulongthsü alala zünakbah tüsho arübo akheam thsüshihbah, tüshe ju a lünnü alabah. 45Nünü müzüng chingnü akhiukkhi lung khülang ngü, tüshe mihtsürü khahnü yung–yinchi, müwayinchi, alo, shotoyinchi tüsho suna adütre kamde ayihnakkhi lung khülang. Ato Thrünpuhnü arübe ching tümü dünjibanü kiulongthsüpuh ki huhdo. Milim ju thiyuro tüsho athanakkhi ju akinpü thülünkhi lah.”
46Judüki kiulongthsüpuh Nebukednezarnü Daniel miki khukning tüsho api ki wüntre jih tüsho arünü anihbuh kilim kingaünbo tüsho rhümthüneabe jihshihpü thiyukhüm jih. 47Kiulongthsüpuhnü Daniel ki tha, “Tsükjide nü Thrünpuh ju thrünpuhbo bolung Thrünpuh tüsho kiulongthsürübo bolung Atungpuh tüsho aramyu thakhita huhrü lah, tümüde nünü ha aramyu thakhita huhkhukdo.” 48Judüki kiulongthsüpuhnü Daniel ju binkiu achang ching zojih tüsho thsambah ahihdo api ki mujungde zojih. Apinü anihbuh ju Babilon lomi alala kurungkheak yakzanshuhrü kamshih tüsho lümlung larü mihtsürü alala kurungkheak akeanangrü aku kamshih. 49Kheaküshe Danielnü amushukhi hode kiulongthsüpuhnü Shadrak, Meshak tüsho Abednego Babilon lomi kurungkheak kiuthsürü mokhit, judüki Daniel a kiulongthsü-binkiu ching lakheah.
Currently Selected:
DANIEL 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
