1 SAMUEL 13
13
Filistiarü kheak Keochihkhi
1Küyimki Saul kiulongthsürü kamkhea, api kam 30 lakheah, tüsho apinü Israel kurungkheak kam yirükheak mahne kiulongthsü.
2Israel bolung ching Saulnü 3000 mokhit; 2000 ju Mikmash tüsho Bethel awung lomi ching Saul lung lakheah, tüsho 1000 ju Benjamin lomi Gibea ching Jonathan lung lakheah; aningkhi mihtsürübo apinü nihbuh khimyambo ching thiyia yüshih. 3Jonathannü Geba ching Filistia thirithsürü binpung yanabah; tüsho Filistiarünü ju so. Tüsho Saulnü lomi alala ching hulipungpung mütde tha, “Ibrirübonü soang!” 4Küyimki Saulnü Filistia thirithsürü binpung yankhitdo tüsho Filistiarünü Israel kheak mükihde kamdo de Israel alalanü asokhea, mihtsürübo Saul lung bepü Gilgal ching jimukhung.
5Filistiarünü Israel kheak keochihpü thsüde khora-lolungbe 30,000, khoraberü 6000 tüsho thirithsürü mih hihde keyean loyi nangde trüngmukhung; arünü atu tüsho Beth-aven aniakhiuklim Mikmash ching bin. 6Küyimki Israelrünü ju ngükhea, arübo lümthsünü ching lakheah (tümüde thirithsürübo ju müküpdakde alakheah), mihtsürübonü arü zangrü lungkhün, alokhün, lungtobo tüsho akukarukbo ching jikabah. 7Ibrirü khürü Jordan hode Gad tüsho Gilead lomi lim yü. Saul a judü lang Gilgal ching lakheah, tüsho mihtsürü alalanü ajande api yande yü.
8Samuelnü tsüngdoa jihkhi kim ching apinü nimung thüne aleang; tüshe Samuel Gilgal ching marü, tüsho mihtsürübo Saul kheaknü chamkhide atsopü tankih. 9Jumonü Saulnü tha, “ Taka kingaünkhi tüsho mungtsü kingaün ha ching I ki hande arang.” Tüsho apinü taka kingaün. 10Apinü taka kingaünkhi jihkhamkhi yanalünde, Samuel arü khiung; tüsho Saulnü api shorupü asühde wukhiuk. 11Samuelnü tha, “Nünü tümü rhimokhea?” Saulnü alo, “ Küyimki inü mihtsürübo I kheaknü chamkhiabahde angükhea, tüsho nünü atsüngdokhi nimungbo dükeak ching nü marükhea, tüsho Filistiarü Mikmash ching trüngmukhungkhea, 12inü tha, ‘ Kheakü Filistiarü I kilim Gilgal ching akibah, tüsho inü Atungpuh ki mushude mükheang’; jumonü inü I zangrü lümkihbah taka kingaün jih.” 13Samuelnü Saul ki tha, “Nünü bünkeangbünrude rhimodo; apinü nü kilim thiyukhüm jihkhi Atungpuh nü Thrünpuh yukhüm nünü manidebahdo. Atungpuhnü nü kiulongthsü Israel kurungkheak lünnü alashihpü thsükheah, 14tüshe kheakü nü kiulongthsü tukloabahbah; Atungpuhnü amulongkhi mihtsürü khülang yimkhitdo; tüsho Atungpuhnü amihtsürü kurungkheak yakzan shuhshihpü api mokhitdo, tümütüsho nünü Atungpuhnü thiyukhüm jihkhi mani.” 15Tüsho Samuel ju Gilgal chingnü tsoabah. Aningkhi mihtsürübonü bonungrü lung bepü Saul dunglim yan; arübo Gilgal chingnü Benjamin ching lakhi Gibea lim wutu.
Saulnü api lung lakhi mihtsürübo 600 ngüm khekhit. 16Saul, atsührü Jonathan, tüsho ane lung lakhi mihtsürübo Benjamin ching lakhi Gibea ching la; tüshe Filistiarü Mikmash ching binkheam. 17Tüsho Filistiarü binkheampung chingnü thiriri boto mahsam thsübah akhiuk; boto khülang Shual limpeang, Ophra thrip anguh, 18boto püpü Beth-horon lim anguh, tüsho asampü sunglo limpeang Zeboiim jindükhün abina kheahpung wung lim anguhbah yü.
19Kheakü judüki Israel lomi alala ching yingkingrü mülade alakheah; tümüde Filistiarünü tha, “Ibrirünü arü thsungkheak nukshang tüsho thsüh kingbah mütsü le”; 20jumonü Israelrü alalanü arü chawuh, alo-kiube, awü yungsho hi rhüpbe züa lupü Filistiarü ki yükide alakheah; 21chawuh tüsho alo-kiube zükhi dün ju shonak 2, awü zükhi tüsho wuhyak thsülokhi dün shonak anikhüh 1 lakheah. 22Jumonü keochihkhi nimung ching Saul le Jonathan büne kheak hode she khah ching she thsühnuk mülade alakheah.
23Kheakü Filistia thirithsürü boto khülang Mikmash wung limro zhipdopü yü.
Currently Selected:
1 SAMUEL 13: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
