1 SAMUEL 12
12
Samuel Akheam Yu
1Samuelnü Israel alala ki tha, “Nüsanü I ki thakhi alala ching inü anijihdo, tüsho inü kiulongthsürü khülang nüsa kurungkheak zojihlah. 2Kheahang, nüsa becho ha kiulongthsüpuh ah; I shina lah tüsho ku buyiuka lah, tüshe I tsührübo nüsa lung lah: I athunu kim chingnü khihni khiungde inü nüsa bedo. 3I ha ching lah; Atungpuh tüsho mujude-mokhitbuh miki I azhihde thiyumütsan jihang. Inü shepü lude? Yungsho shepü donki inü lude? Yungsho inü shepü kheak mulomülap de? Shepü kheak junokhi rhimode? Yungsho I mük tukpü thsüde shepü khah chingnü inü buknim lude? I azhihde thiyumütsan jihang tüsho ju inü nüsa kilim shaklobah.” 4Arünü tha, “Nünü isa kheak mümulomülap yungsho isa mujuno yungsho isa shepü khah chingnü tümü lang she mulu.” 5Apinü arü ki tha, “Nüsa azhihde Atungpuh thiyumütsan lah, tüsho mujude-mokhitbuh ha nimung thiyumütsan lah, junangde nüsanü I khah ching tümü she müngü.” Tüsho arünü tha, “ Am, Atungpuh thiyumütsan ah.”
6Samuelnü mihtsürübo ki tha, “ Mosa tüsho Aron mokhitjihde nüsa jipürübo Ijip lo chingnü bekhitbuh Atungpuh thiyumütsan lah. 7Jumonü kheakü nüsa küching lanü zhipang, junangde Atungpuh miki nüsa mahkhapbah, tüsho Atungpuhnü nüsa le nüsa jipürü thsungkheak akhümkhit rhimokhi inü nüsa ki thabah. 8Küyimki Jakob ju Ijip ching yükhea tüsho Ijiprünü arü junokhea, judüki nüsa jipürünü Atungpuh ki zhi tüsho Atungpuhnü Mosa le Aron ane thiyia, nüsa jipürü Ijip chingnü bekhitbah arübo ha dangpung ching lashih. 9Tüshe arünü Atungpuh arü Thrünpuh mihabah; tüsho apinü arübo Hazor kiulongthsüpuh Jabin bonungrü limthobuh Sisera, Filistiarü, tüsho Moab kiulongthsüpuh khah ching yinabah; tüsho arünü arü azhihde keochih. 10Judüki arünü Atungpuh ki zhi, tüsho tha, ‘Isanü neak yihbeakdo, tümütüsho isanü A TUN GPU H bahyuk, tüsho Baalbo le Astarbo tankih; tüshe kheakü isa riri khah chingnü isa khümkhitang, tüsho isanü nü tankihbah.’ 11Tüsho Atungpuhnü Jerubbaal, Bedan, Jephtha, tüsho Samuel thiyibah nüsa mühi thiriribo khah chingnü nüsa khümkhit; tüsho nüsa akhümkhitkhi ching la. 12Tüshe küyimki Amon kiulongthsüpuh Nahashnü nüsa azhihde arükhi nüsanü angükhea, Atungpuh nüsa Thrünpuh nüsa kurungkheak kiulongthsüpuh lalashe nüsanü I ki tha, ‘Yung, tüshe kiulongthsürü khülangnü isa kurungkheak kiulongthsübah.’ 13Kheahang, shepü nüsanü amokhitkhea tüsho akeokhikhea, kiulongthsüpuh ha ching lah; kheahang, Atungpuhnü kiulongthsürü khülang nüsa kurungkheak zojihlah. 14Nüsanü Atungpuh tresho tüsho api tankihsho tüsho api yu anide Atungpuhnü thiyukhüm jihkhi mazhihsho, tüsho nüsa le nüsa kurungkheak kiulongthsüpuhnü Atungpuh nüsa Thrünpuh yansho, ju atsübah; 15tüshe nüsanü Atungpuh yu manide api yukhüm azhihsho, nüsa jipürü kheak azhihkhi nangde Atungpuh khahnü nüsa le nüsa kiulongthsüpuh azhihbah. 16Jumonü kheakü nüsa düngde zhipang tüsho Atungpuhnü nüsa mük ki ha ato rhimokhi kheahang. 17Khihni ha wheat hi yimluchoh yung de? Inü Atungpuh ki jibah, junangde apinü tsüngmuk tüsho tsüng arüshihbah; tüsho nüsanü Atungpuh miki kiulongthsürü kheangde amütsü rhimokhi tolah de nüsanü angübah.” 18Jumonü Samuelnü Atungpuh ki ji, tüsho Atungpuhnü ju nimung tsüngmuk tüsho tsüng arüshih; tüsho mihtsürü alalanü Atungpuh tüsho Samuel khide tre.
19Mihtsürü alalanü Samuel ki tha, “Nü yamlarübo thsungkheaknü Atungpuh nü Thrünpuh ki tamkhüntamnüjang, junangde isa müshe; tümüde isa thsungkheaknü kiulongthsürü khülang kheangkhi hode isa neakbo kheak yukajakde alü yihbeaklodo.” 20Tüsho Samuelnü mihtsürübo ki tha, “Dütre; nüsanü ha amütsü rhimobo alala rhimodo, tütüshe Atungpuh yankhi chingnü dürholo, tüshe nüsa mulong athrünkhinü Atungpuh tankihang; 21tüsho alü mülabe yungsho mükhümkhitbe akeangkeang kukruk lim danguh, tümüde jurübo akeangkeang ah. 22Tümüde api mung ato dünkheaknü Atungpuhnü amihtsürübo mübahyuk, tümütüsho nüsabo api mihtsürü thsüpü Atungpuhnü asühdo. 23Kheaküshe nüsa thsungkheaknü tamkhüntamnüpü tuklokhi hode inü Atungpuh azhihde neak yihbeakpü I kheaknü limshuabahang; tüsho inü nüsa ki atsü tüsho alungki limro thsangyubah. 24Atungpuh lang treang, tüsho nüsa mulong athrünkhinü api khiukde tankihang; tümüde apinü nüsa thsungkheak tümü ato rhimodünü lümakheahang. 25Tüshe nüsanü judü lang amütsü rhimosho, nüsa le nüsa kiulongthsüpuh chido phüta bahbah.”
Currently Selected:
1 SAMUEL 12: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
