1 SAMUEL 14
14
Jonathannü Filistiarü Yankhi
1Nimung khülang Saul tsührü Jonathannü api thsühnuk hanrü athrününgtsüngbuh ki tha, “ Arang, ike püpü thrip Filistia thirithsürü boto kilim yüanü.” Tüshe apinü abuh ki mütha. 2Saul a Migron ching tsarümkiu sang bukkhüp Gibea ki lakheah; api lung bonungrü 600 ngüm lakheah, 3arü bolung amükeambuh Ahijanü (Ikabod akhiung Ahitub tsührü; Ahitub ju Shilo ching Atungpuh amükeambuh Eli tsührü Phinehas tsührü ah) amükeamrü khim han. Kheakü mihtsürübonü Jonathan yüabahdo de mümükheah. 4Ahungnim dükeak Jonathannü Filistia thirithsürü boto lim wutupü mürangkhi lim ju thripkhüh lungku khülang tüsho püpü thrip lungku khülang de alakheah; khülang mung Bozez, tüsho püpü mung Sene. 5Lungku khülang Mikmash miki dukulim tüsho püpü Geba miki düjinglim abina lakheah.
6Jonathannü api thsühnuk hanbuh athrününgtsüngbuh ki tha, “ Arang, ike harü tsütamübahkhi thiriri boto kilim wutuanü; khükia Atungpuhnü ike thsung thsüde arhimobah; tümüde hihang yungsho nükang Atungpuhnü akhümkhitpü ching tümünü she müzhipdokhuk.” 7Api thsühnuk hanbuhnü tha, “Nü mulong ching lakhi alala rhimoang. Jumonü yüang; nünü amulongkhi nangde, I ha ching nü lung lah.” 8Judüki Jonathannü tha, “ Kheakü ike jurü mihtsürü hode ayübah tüsho arü ki ike huhbah. 9Arünü ike ki, ‘Isa nüke ki marüyi khiungde aleangang,’ de thasho judü lang ike zhippung ching zhipbah, tüsho arü kilim muwutu. 10Tüshe arünü, ‘Isa kilim atung,’ de thasho ikenü awutubah; tümüde Atungpuhnü arübo ike khah ching jihdo. Hoju ike thsungkheaknü amütsan labah.” 11Jumonü ane chidonü Filistiarü thiriri boto ki ane huh; tüsho Filistiarünü tha, “ Kheahang, Ibrirübo arü jikpung alokhün chingnü akhiukchoh.” 12Thiriribonü Jonathan tüsho api thsühnuk hanbuh ane ki tha, “Isa kilim atung, tüsho isanü nüke ki tümükhüh huhbah.” Jonathannü thsühnuk hanbuh ki tha, “I dunglim arang; tümüde Atungpuhnü arübo Israel khah ching jihdo.” 13Judüki Jonathannü api thsühnuk hanbuh adunglim tsahshihbah akhah le ajingnü künde yükih. Filistiarü ju Jonathan müngüh ayokhi, tüsho thsühnuk hanbuh api dunglim arübuhnü arübo laksah. 14Akhuhbe laksahkhi ching Jonathan le thsühnuk hanbuh anenü thulu khinkhüh bankhi dükeak chingnü mihtsürü 20 bande laksah. 15Binkheampung, thulu, tüsho mihtsürü alala bolung trede alakheah; bonungrü tüsho thirithsürübonü she ajan; alo ajan; tüsho ju khide trede kam.
16Benjamin lomi ching lakhi Gibea chingnü Saul mihtsürübonü Filistiarübo nanachihde atsokhi ngü. 17Judüki Saulnü api lung lakhi bonungrübo ki tha, “ Mung jiang tüsho isa bolungnü shepü tsoa lanü kheahang.” Küyimki arünü mung jikhea, Jonathan le api thsühnuk hanbuh ane mülade alakheah. 18Saulnü Ahija ki tha, “Atungpuh sangdan ha ching lubah arang.” Tümüde judüki Atungpuh sangdan Israelrü lung lakheah. 19Küyimki Saulnü amükeambuh ki asukachihde alakhea, Filistiarü binkheampung ching alanajikhi alübe kam. Jumonü Saulnü amükeambuh ki tha, “Nü khah tukloa lung.” 20Judüki Saul tüsho api lung lakhi mihtsürü alala shomukhung tüsho keochih ching yü; tüsho nukshangbo ju khülangnü khülang kheak dünkihbah alakheah, junangde khide tode ayingyingkhi lakheah. 21Kheakü akhuhlim Ibrirü Filistiarü lung arü binkheampung ching wuturü alodarü tüsho Saul le Jonathan ane lung lakhi Israelrü bolung be. 22Junangde, küyimki Ephraim lomi wung ching jikrü Israelrünü Filistiarü tsochoh de asokhea, arü she arü dunglim keochihpung ching yü. 23Jumonü ju nimung Atungpuhnü Israelrü kilim akuk ngüshih tüsho keochihkhi ju Beth-aven ching akhinde yü.
Keochih Dunglim Dünjikhibo
24Kheakü ju nimung Israelrü lümthsünü ching lakheah, tümüde Saulnü bonungrü kheak thiyuchihchimde tha, “ Arelim mükamchoki tüsho inü I riri kheak romüyimlochoki shepünü yimtsühbanü api kheak muthrumünean yükihang.” Jumonü bonungrü shenü she jim mütsühake. 25Thirithsürü alala murung ching arü; tüsho alo ching mukhuke lakheah. 26Küyimki thirithsürübo murung ching arükhea, mukhuke ju jungkhit; tüshe arünü arü khah nihbuh mün ching muyuk, tümüde arünü thiyuchihchimkhi tre. 27Tüshe Jonathannü abuhnü thirithsürü kheak thiyuchihchimde athakhi muso; jumonü apinü akhah ching zhimkhi tso mulo mukhukerüp ching athso, tüsho mukhuke ju tsüh; tüsho amükjibo rhüngrhüngde kam. 28Judüki bonungrü khülangnü tha, “Nü buhnü thirithsürü kheak müküpde thiyuchihchimde tha, ‘Shepünü khihni yimtsühbanü muthrumünean thsang.’ Jumonü thirithsürübo yiuhyiuhlah.” 29Judüki Jonathannü tha, “I buhnü lomi küpkhukshihdo; kheahang I mükjibo küdükhüh rhüngrhüng la tümütüsho inü ha mukhuke anikhüh tsühakeakheah. 30Khihni thirithsürübonü thiriri kheaknü ayankhikhibo tsühkhülaa küdükhüh atsüpü lakhea; tümüde kheakü Filistiarü bolung hihde mülaksah.”
31Arünü ju nimung Mikmash chingnü Aijalon khiungde Filistiarü laksahshu, thirithsürübo khide yiuhyiuhde alakheah; 32jumonü thirithsürübonü arünü ayankhikhi lim nanachihde yü, tüsho namfimihnu, moshipung tüsho moshi nunubo lubah alo kheaknü laksah; tüsho thirithsürübonü jurübo athiyih bede tsüh. 33Judüki ha Saul kilim thiyusheak jih-a lakheah, “ Kheahang, thirithsürübonü athiyih bede atsühkhi hode Atungpuh azhihde neak yihbeakdo.” Tüsho apinü tha, “Nüsanü mihyumanide rhimodo; I ki ha kheak lung ato phülahde arang.” 34Saulnü tha, “Nüsabo thirithsürü bolung yüang tüsho arü ki thaang, ‘ Alalanü nihbuh moshipung yungsho namfimihnu lubah arang, tüsho ha kheaknü laksahbah tsühang; tüsho athiyih bede atsühkhi hode A TUN GPU H dazhih.’” Jumonü thirithsürü alalanü ju re nihbuh moshipung handarü tüsho ju ching laksah. 35Tüsho Saulnü Atungpuh kilim kingaün sadam khülang thsü; ha apinü Atungpuh kilim kingaün sadam thsükhi akhuhbe lakheah.
36Tüsho Saulnü tha, “Isanü Filistiarü kilim azhing ching yükianü tüsho yapsu müyinkhi khiungde yananü; isanü arü khülang she maningshihnü.” Arünü tha, “Nü ki tümü atsüanü rhimoang.” Tüshe amükeambuhnü tha, “Isanü akhuhde Thrünpuh ki keokhianü.” 37Jumonü Saulnü Thrünpuh ki keokhi, “I Filistiarü dunglim yükiba shi? Nünü arübo Israel khah ching jihba shi?” Tüshe apinü ju nimung anihbuh ki malojih. 38Saulnü tha, “Nüsa mihtsürü limberübo, ha kheak arang; tüsho ha neak küde thsah khihni akhiukchonü isanü yimkhitanü. 39Tümüde Atungpuh lale, shepünü Israel khümkhitcho, I tsührü Jonathan thsüthsü she, api tsükjide ashebah!” Tüshe mihtsürü alala bolungnü api yu alorü sheshe mülade alakheah. 40Apinü Israel alala ki tha, “Nüsa thripkhüh thsübah tüsho I le I tsührü Jonathan püpü thrip thsübah.” Mihtsürübonü Saul ki tha, “Nü ki tümü atsüanü rhimoang.” 41Tüsho Saulnü tha, “O Atungpuh Israel Thrünpuh, tümüde nünü nü yamlarü ki khihni malojih le? Ha amülim I yungsho I tsührü Jonathan kheak lasho, O Atungpuh Israel Thrünpuh, Urimnü alojang; tüshe ha amülim Israel mihtsürü kheak lasho, Thummimnü alojang.” Tüsho Jonathan le Saul kheak azan thsükhit tüshe mihtsürübo a dükde la. 42Tüsho Saulnü tha, “I tüsho I tsührü Jonathan dükeak azan thsüang.” Tüsho Jonathan kheak akhiuk.
43Tüsho Saulnü Jonathan ki tha, “Nünü tümü rhimokheanü I ki thaang.” Jonathannü api ki tha, “I khah ching zhimkhi tso münkheam kheaknü inü mukhuke tsühakeakheahdo; I ha ching lah, I ashebah.” 44Saulnü tha, “ Thrünpuhnü I kheak alübe she rhimoshang; nü tsükjide ashebah, Jonathan!” 45Judüki mihtsürübonü Saul ki tha, “ Jonathan asheba de, shepünü Israel ching ha ato akuk ngükhea? Ju kheaknü limshuabahang! Atungpuh lale, api kuyü bümkhüh she alo ching mayokhi; tümüde apinü khihni Atungpuh lung rhimodo.” Jumonü mihtsürübonü Jonathan rhokhit, tüsho api müshe. 46Judüki Saulnü Filistiarü yankhi chingnü tuklo; tüsho Filistiarü arü lapung ching yü.
Saul Kiulongthsü tüsho Yamkhün
47Küyimki Saulnü Israel kurungkheak kiulongthsü ngükhea, apinü mühirü api riribo alala, Moab, Amon, Edom, Zoba kiulongthsübo, tüsho Filistiarü kheak keochih; kürü ching api yükheanü apinü arübo küpkhuk jih. 48Apinü mulong tode rhimo, tüsho Amalekrü laksah, tüsho Israelrü arü yanrü khah chingnü khümkhit.
49Kheakü Saul tsührübo ju Jonathan, Ishvi, tüsho Malkishua; tüsho atsührü aliberü mahne mung: adüjibe mung Merab, tüsho akheambe mung Mikal. 50Saul niube ju Ahimaaz tsührü Ahinoam lakheah. Tüsho api bonungrü limthobuh ju Saul akü Ner tsührü Abner lakheah; 51Saul abuh ju Kish, tüsho Abner abuh Ner ju Abiel tsührü lakheah.
52Saul nimung alala ching Filistiarü bede müküpde keochihkhi lakheah; tüsho küyimki Saulnü khürü sühmüh lade yungsho thirithsürü athrungrü ngübanü, api tankihpü ching lu.
Currently Selected:
1 SAMUEL 14: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
