1 SAMUEL 11
11
Saulnü Amonrü Kukkhi
1Khinu khülang dunglim, Amonrü Nahashnü wutu tüsho Jabesh-gilead yan; tüsho Jabeshgilead mihtsürü alalanü Nahash ki tha, “Isa bede mükeochihpü binthrüm thsang, tüsho isanü nü tankihbah.” 2Tüshe Amonrü Nahashnü arü ki tha, “ Ha hodü lang inü nüsa kheak thiri müthsüpü tangzüngbah, Israel alala kheak masühkhi arüshihpü thsüde inü mihbüm aban mükji tsülim khünkhitbah.” 3Jabesh azothsürübonü api ki tha, “Isanü Israel lomi alala ching yunithsürü yüshihpü thsüde isa kilim nimung thüne adükeak jihang. Tüsho ju ching isa khümkhitrü sheshe mülasho lang isa nü kilim arüabahbah.” 4Küyimki yunithsürübo Saul lapung Gibea ching arükhea, arünü mihtsürübonü sode amütsan yusheak thaa huh; tüsho mihtsürü alala achangnü trip.
5Kheakü Saul thulu chingnü moshipungbo dunglim alungde alakheah; tüsho Saulnü tha, “ Mihtsürübonü atripkhi ha tümü amütsan a?” Jumonü arünü Jabesh ching larü yusheak api ki thaa huh. 6Küyimki Saulnü harü yubo sokhea, Thrünpuh me api kheak arü, tüsho api bukakhiukkhi alü kam. 7Apinü moshipung mahne lubah khapthünak tüsho Israel lomi alala ching yunithsürü kheaknü arü kilim mühahde tha, “Shepünü Saul tüsho Samuel dunglim müyanbanü, api moshipung kheak ha ruk rhimobah!” Judüki Atungpuh trekhi mihtsürübo kheak akih, tüsho arü rukhüh thsübah akhiuk. 8Küyimki apinü arü Bezek ching trüngmukhungkhea, Israel chingnü 300,000, tüsho Juda chingnü 30,000 lakheah. 9Arünü yunithsürü arüa larübo ki tha, “ Hanangde nüsanü Jabesh-gilead ching larü ki thaang: ‘Shido, ani lamchoki kim ching, nüsa bekhitkhi labah.’” Küyimki yunithsürübonü arübah Jabesh ching larü ki thakhea, arübo asühachih. 10Jumonü Jabesh ching larübonü tha, “Shido isanü isa nü kilim jihabahbah, tüsho nü tsükhi isa kheak rhimoang.” 11Ashidopü Saulnü mihtsürübo khunung mahsam chamnak. Yapsu kim ching arünü binkheampung ching arü tüsho animuro khiungde arübo laksah; tüsho sherübo aninga lakheanü hiumüzütabah, junangde she lang she mahne muzojih.
12Mihtsürübonü Samuel ki tha, “Sherübonü Saul ju isa kiulongthsürü thsübe yung de thacho? Isa kilim jihang tüsho isanü arübo laksahbah.” 13Tüshe Saulnü tha, “ Ha nimung ching sheshe mülaksah, tümüde khihni Atungpuhnü Israel kilim abekhitkhi handarüdo.”
14Samuelnü mihtsürübo ki tha, “ Arang, isanü Gilgal ching yüanü tüsho kiulongthsü thsakhamloanü.” 15Jumonü mihtsürü alala Gilgal ching yü tüsho Gilgal ching arünü Atungpuh miki Saul ju kiulongthsüpuh kamshih. Ju ching arünü Atungpuh kilim mungtsü kingaünkhi laksah-a kingaün, tüsho ju ching Saul le Israelrü alala tode asühachih.
Currently Selected:
1 SAMUEL 11: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
