MATTHAI 5
5
Tâng Chung ah A Thugen: Pathian Mite Hamphatna
(Luk 6.20-23)
1Mipite chu Jesu’n a mu phât in, tâng in a chia to ah, a kichut zaw phat in a nungzuite a kiang in a hung ua,
2ama chun zia thute hi gen in, a hun hil pan a:
3Thagau ah tasam ahi lam kihete chu mi hampha a hiu,
van-gam chu amau â ahi ngal a.
4 #
Isa 61.2
Lusûnte chu mi hampha a hiu;
Pathian in thamuan ding ahi ngal a.
5 #
Sam 37.11
Mi zaidamte chu mi hampha a hiu;
Lei go hi lua ding ahi ngal un.
6 #
Isa 55.1,2 Dikna ngai ah gilkial leh dangchâkte chu mi hampha a hiu;
Tai leh niansak ah um ding ahi ngal un.
7Mi jangai theite chu mi hampha a hiu;
khawtua’na mu ding ahi ngal un.
8 #
Sam 24.3,4 Lunggil ah thiangthote chu mi hampha a hiu;
Pathian mu ding ahi ngal un.
9Chamna siamte chu mi hampha a hiu;
Pathian cha ah sak in um ding ahi ngal un.
10 #
1 Pe 3.14
Dikna ziak ah sukgentheina thuakte chu mi hampha a hiu;
van-gam lua ding ahi ngal un.
11 #
1 Pe 4.14
Keima ziak ah min a hun hosiat ua, a hun sukgenthei ua, juau ah thu phalo zosia a hun hêk phat ua leh mi hampha la hiu.
12 #
2 Kh 36.16; Nas 7.52 Lim unla, kipak tak in um un; van ah la kipakman ding uh chu a lopi ngal in; zia gual ma chun la mau ah jawlneite kha le a sukgenthei uh ahi kha.
Chi leh Thaumei ah Kihilna Thu
(Mar 9.50; Luk 14.34-35)
13 #
Mar 9.50; Luk 14.34,35 Lei chi la hiu; himaleh, chi hi dau taleh bang in ahi al kit thei diam? Zia chu paimang ah, mite chotden ding bep lo ngal in panna a nei ta puai.
14 #
Joh 8.12; 9.5 Khawvel vâk la hiu. Tâng chung ah khua um chu sêlgûk thei ahi puai.
15 #
Mar 4.21; Luk 8.16; 11.33 Min thaumei hâl in, law nuai ah a koi ngai puau in, a tunna’n a tung zaw sek ui; tichun, In sung ah mi zosia a salvâk sek hi.
16 #
1 Pe 2.12
Zia gual ma chun, la vâk uh chu mite mit mu in vâk ta hen; tichun, la thil hi’phatteu chu mu’n, van ah la pau chu chawihoi thei in au.
Dan Lui leh Jawlneite Dan Chu
17Dan thu a hem, jawlneite thuhil a hem subei ding ah hung hi dingin ei ngaitua kiu in, a subei ding ah hung ka hipua’n, a subuting ding ah hung ka hizawi.
18 #
Luk 16.17
Titakzet in ka hil la hiu, Lei leh Van a manthai masia, Dan thu sutvom neucha a hem, zikvom neucha a hem, a leng ua a tunkim masang sia pakhat chale mangthai pua’n a.
19Ziaziakchun, kua’nle, dan thupiakte lak ah a neu pen hi botsia hen la, zia gual ma chun midang le bawsiatsak ding ah a hil chun, ama chu van-gam ah chun mi neu pen ti’n au. Zia gual ma chun, kuale dan thupiak jawm ah, midang le jawm ding ah hil chu, van-gam ah chun mi lian ti’n au.
20Ka hil la hiu, Pharisaite leh Lekhazikte felna hi la khûp lo ua leh, van-gam chu lut lo hial ding la hiu.
Lungnatna Thu ah Hilna
21 #
Pdt 20.13; Dan 5.17 Malai mite kiang ah chun, Tual la tha ding ahi puai, a tiu tawh, Tualthat tapo chu vaihawmna ah lauthawn um tak in dingin ah, a tiu la he tau hi.
22Himaleh, ke’n vang, kuale a unau chung ah lungna tapo chu vaihawmna â dingin lauthawn um tak in um intin; chuleh, kua’n le a unau kiang ah, “Raka, Panna bei” ti tapo chu vaihawmte vaihawm piak lauthawn um tak in um intin; chuleh, a unau kiang ah, “More, Mingol” ti tapo chule vaihawm piak lauthaw’n um tak in um in a, ti ka hil la hiu.
23Mâichâm ah la thilpiak la koi lai ngei ah, la unau in la chung ah lung hi’lona a nei la hetdaw ahileh,
24zia mâichâm ma-âng ah chun, la thilpiak chu nusia’n la, chia kit in la, la unau vakichampi masa phot in, ziazaw chuleh hung inla, la thilpiak chu hung lân in.
25La langpa tawh vaihawmna In lampi la kiton lai un kichampi vak in, chutilochun, vaihawmpa hun matsak intin, vaihawmpa chun mimante khut in hun pia’n tin, suangkul ah khum kha’n au.
26Titakzet in ka hil la hiu, paisa khat nasan le la piak kim masia zia kipat chun hun pawtsak lo hial ding ahi.
Ângkawm Thu ah Hilna
27 #
Pdt 20.14; Dan 5.18 Ângkawm kin, a tiu hi ti la he tau hi.
28Kei vang in, kuale numei tatsiatpi ding et ah en tapo chun, a lungthim in a ângkawm zo ahi tai ti ka hil la hiu.
29 #
Mat 18.9; Mar 9.47 La mit changlam in a hun hi’puk ahileh, kheldok inla, pai mang ziang in; taksa bukim ah gawtmun ah chia sâng in, taksa bâk pakhat manthai chu nang â dingin a pha zawi.
30 #
Mat 18.8; Mar 9.43 La khut changlam in a hun hi’puk chun, tan tha’n la, pai ziang in; taksa bukim ah gawtmun ah chia sâng in, taksa bâk pakhat bei chu nang â dingin a pha zawi.
Kinolna Thu ah Hilna
(Mat 19.9; Mar 10.11-12; Luk 16.18)
31 #
Dan 24.1-4; Mat 19.7; Mar 10.4 Kuale ji nol tapo chun kinolna lekha a kiang in pia hen, ti le a um a.
32 #
Mat 19.9; Mar 10.11,12; Luk 16.18; 1 Ko 7.10,11 Himaleh, ke’n vang, kuale a ji chu pawsal dang tawh gitlona ziak hilo ah nol tapo chun, ama chu a ângkawm sak ahi; chuleh kuale nolsa kichenpi tapo chu ângkawm a hiu ti ka hil la hiu.
Kitiamna Thu ah Hilna
33 #
Thp 19.12; Kis 30.2; Dan 23.21 Malai mite kiang ah chun, “Zuau in kitiam kiu inla, Lalpa kiang ah la thutiamte chu pitin zawu in,” a tiu ti la hiau a.
34 #
Jak 5.12; Isa 66.1; Mat 23.22 Himaleh, kei vang in ka hil la hiu, kihaksial him him kiu inla, van sam in kitiam kiu in, zia chu Pathian lalchutpha ahi ngal a;
35 #
Isa 66.1; Sam 48.2 lei sam inle kihaksial diak kiu in, zia chu a keng ngakna ahi ngal a; Jerusalem sam inle kitiam diak kiu in, zia chu Lal lopi khawpi ahi ngal a.
36La lubuk sâm in kihaksial diak kin, samzang khat cha hile la hi’kâng in, la hi’vom thei pawngal a.
37La thugen chu ahileh ahi himai hen la, ahiloleh ahilo hiziang hen; zia khêlvâl chu gitlo ah kipan ahi sek hi.
Phuba Lâk Thu ah Hilna
(Luk 6.29-30)
38 #
Pdt 21.24; Thp 24.20; Dan 19.21 Mit sik ah mit, ha sik ah ha, kiti sek la he tau hi.
39Himaleh, kei vang in ka hil la hiu, migilo thuk kiu in; la biang changlam bêng tapo chu a langkhat le daw zaw’n la.
40Kua’n le a hun hêk ah, la puanâk a lâkpiak chun, la puanâk chungle lâksak ngal in.
41Mêl khat chia ding ah min a hun sawl chun, mêl ni chia mai in.
42La thil hun donte chu pia’n la, a khêl nuamle kilepsan kin.
Mêlmate Hepi Ding ah Hilna
(Luk 6.27-28,32-36)
43La vêngte hepi inla, la mêlmate huan, a tiu la he tau hi.
44Kei vang in ka hil la hiu, La mêlmateu hepiu inla, a sugentheite chu pauchap piak un;
45la Pau van ah mi chate la hi’theina ding un; ama chun migilote leh miphate chung ah chun ni a suak sak gêl ah, mi dik leh dik lo chung ah le gua a zuksak sek hi.
46Nang uh hun hepite bep la hepiu chun, kipakman bang a hem la mu ding uh? Sedawl mite’n le zia gual ma chun a bawl tho puau em?
47La unaute bep chibai la bûk leh bang a hem la phat zawk na? Jentelte’n le zia gual chun a bawl puau ah a hem?
48 #
Thp 19.2; Dan 18.13 Tichun, la Pau van ah um a phat bukim gual in nang uh le pha bukim in um un.
Currently Selected:
MATTHAI 5: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.