MATTHAI 4
4
Jesu Thep ah A Umna
(Mar 1.12-13; Luk 4.1-13)
1 #
Heb 2.18; 4.15 Ziazaw chun, Jesu chu diabol thep ah um dingin gamthip ah Thagau pui lût in a um ta’n.
2Ni sawmli leh jan sawmli an a ngawl nung in, a gil a hung kial ta’n.
3Thêmpa chu a hung ah, a kiang in, “Pathian Chapa la hileh zia suang hi vaithum suak dingin thu pia ta’n la,” a tia.
4 #
Dan 8.3
Himaleh, ama chun,
“Mihing hi vaithum bep in hing pua’n tin,
Pathian kam ah thu tin pawt in hing zaw’n a,
ti zik ahi,”
ti’n a dawnhu a.
5Ziazaw chun, diabol chun khawthiangtho ah chun a pui lût a, Pathian Biak In sip zum ah chun a dinsak ah, a kiang in,
6 #
Sam 91.11,12 “Pathian Chapa la hileh chawmtha’n, la chung thu ah hin,
‘A vansawlchakte chu thu pia’n tin,
a khut un hun dom intiu in,
chutichun, la keng in suang khat chale suikha pua’n la,’
ti zik gual ah khan,” a tia.
7 #
Dan 6.16
Jesu’n a kiang in, “Lalpa la Pathian chian kin, ti ah kizik ahi,” a ti kit a.
8Chuleh, diabol chun tâng sâng tak in a pui kit a, khawvel gam zosia leh a lopina chu a etsak a.
9A kiang in, “Ka ma hin bokkhup in chibai bûk in ei ho inla, zia zosia hi pia sik sek ing ka,” a tia.
10 #
Dan 6.13
Ziaphatchun, Jesu’n a kiang in, “Setan, chia mang in!
‘Lalpa la Pathian chibai bûk inla, ama na bep sêm in,’ ti zik ahi,” a tia.
11Ziazaw chun, diabol chun a nusia ta’n; vansawlchâkte a hung un, a na a hung sep piak tau hi.
Galili Gam ah Jesu Naseppatna
(Mar 1.14-15; Luk 4.14-15)
12 #
Mat 14.3; Mar 6.17; Luk 3.19,20 Johan a man ui ti Jesu’n a het phat in, Galili gam in a kilepmangsan tai.
13 #
Joh 2.12
Nazareth khua nusia in, Kapernaum khua’n a chêngden tai; zia chu Zebulun leh Naphtali gam ah Dil gei ah um ahi’n;
14zia hi jawlnei Isai in a la gen kha a guitunna ding ahi:
15 #
Isa 9.1,2 “Jebulun gam leh Naphtali gam,
Tuipi zotna lamdung Jordan gâl khat lam ah,
Jentelte Galili gam;
16‘Thim nuai ah chu te chun vâk lopi tak chu a mu tau in,
thina lîm guam ah chu te chung ah chun,
vâk a hung suakdok tai,’
tia a gen kha a hung guitun theina dingin”.
17 #
Mat 3.2
Zia hun ah kipat chun Jesu’n, “La gitlo uh haisan un, van gam chu a nai tai,” ti’n a gen pan tai.
Jesu’n A Nungzui Ding A Kona
(Mar 1.16-20; Luk 5.1-11)
18Galili Dil gei ah Jesu a vâkvêl lai in, unau pani, Simon, Peter a tiu chu a suapi Andria tawh Dil ah lênsep lai a mu’n, sanga man mi a hiu a.
19A kiang un, “Ei zui un, mihing man dingin hun siam ing ka,” a tia.
20Tichun, a lênteu nusia in a zui ngal tau hi.
21Zia kipat chun a chia pek ah, unau dang pani, Zebedai chapa Jakob leh a unau Johan, a pau Zebedai kiang ah kuang sung ah a lênsiateu siampha lai tak chu a mu’n, a ko ngal a.
22Tichun, kuang leh a pau chu nusia in, a zui ngal tau hi.
Mipi Lak ah Jesu Nasepna
(Luk 6.17-19)
23 #
Mat 9.35; Mar 1.39 Jesu’n sunagog ah a kikhopna Inteu ah chun, gam chanchinpha chu hil in, mite lak ah hivei tincheng leh damlona zosia hi’dam in Galili gam zosia a fang suak tai.
24Suria gam zosia’n a chanchin a thang suak ta’n; tichun, damlo zosia, hivei nei leh natna tincheng thuakte, thithabuak matte, hipût neite leh zengte haw chu a kiang in a hun pui ua; a la hi’dam suak tai.
25Galili lam ah kipat te, Dekapolis khua kipat te, Jerusalem khua kipat te, Judea gam ah kipat te, Jordan gâl ah kipat te chun mipi nasa tak in ama a zui tau hi.
Currently Selected:
MATTHAI 4: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.