MATTHAI 27
27
Pilat âng ah Jesu A Dinna
(Mar 15.1; Luk 23.1-2; Joh 18.28-32)
1Jingkal phatin, thiampu lalte leh upate zosia, chuleh, mipite chun Jesu tha ding dan chu a ngaitua tau a.
2Ama chu kân sa’n a pui ua, gam ukpa Pilat kiang in a pedok tau ahi.
Juda Ama leh Ama Kithat
(Nas 1.18-19)
3 #
Nas 1.18,19 Ama man ah pang Juda khan, Jesu thiamlo a chansak ui ti a het phat in a kisik ah, a dangka sawmthum kha thiampu lalte leh upate kiang in a hun chawi kit a.
4“Mawna neilo thisan ka matsak ziak ah hin thil ka hikhial tai,” a tia. Amau chun, “Zia chu kei un bang ding ka tiu em? Nang in la law law kilaw ta’n,” a tiu a.
5A dangka chu tempul sung ah seplut in a nusia ah, a pawtdok ah, ama leh ama a vakikhâi lum tai.
6Ziaphatchun, thiampu lalte chun zia dangka chu a lau a, “Zia hi thisan man ahi ziakin thawlawm bawm ah koi a thiang puai,” a tiu a.
7Tichun, a kiho ua, malzin vuina dingin bêlvêlte lou mun khat a chawu a;
8ziaziakchun, zia lou mun chu tu’ni tiang hin, “Thisan Mun,” a kiti den tai
9 #
Zek 11.12,13 Jawlnei Jeremiah#27.9 zia tak ah jawlnei Jeremiah kiti hi Zekariah hizaw ding dan ahi in a la gen guitunna dingin; “Dangka sawmthum, Israel chate’n a bithiak, ama man ding tawh kigûn zat chu a lau a;
10 Lalpa‘n ei tiam piak gual ngei in, bêlvêlte lou mun chawkna’n a kimang tai,” a ti kha a guitung tai.
Pilat in Jesu Thu A Dot
(Mar 15.2-5; Luk 23.3-5; Joh 18.33-38)
11Jesu chu gam ukpa ma-âng in a ding ah, gam ukpa chun, “Judate Lengpa la hi em?” ti’n a dong a. Jesu chun, “La hi lei ti chu lam,” a tia.
12Himaleh, thiampu lalte leh upate hêkna chu bangma’n a dawnhu puai.
13Pilat chun, “Hiti zojai ah a hun hêknau hi la he pua a hem?” a tia.
14Ama chun a hêkna thuu chu kam khat inle a dawnhu pua; ziaziakchun, gam ukpa chun mak a sa ma ma a.
Jesu A Hem Barabba?
(Mar 15.6-15; Luk 23.13-25; Joh 18.39—19.16)
15Kût ni hileh, gam ukpa chun mipite doisak pen pen suangkul ngâkte lak ah pakhat a thâdaw sek chu a hi’dan ngai uh ahi’n.
16Zia lai ah chun suangkul ngâkte lak ah chun migilo minthang tak pakhat, Jesu Barabba a tiu chu a um a.
17Chutia, a hung kikhop phat ua chun, Pilat in a kiang un, “Aleh, Jesu Barabba a hem, ahiloleh, Jesu Messiah kiti hi, kuapen ka hun thâdaw piak diam?” a hun tia.
18Mitthipna ziak ah ama chu a mat uh ahi ti a he ngal a.
19Chun, vaihawmna chutpha a chut lai in, a ji chun, “Zia midik chung ah khan bangma hi’kin, tu’ni hin ama ziakin ka mang in thil tam tak ka thuak ahi,” ti’n mi a hun vaithâk a.
20Himaleh, thiampu lalte leh upate chun mipi chu a tîlsiau a, Barabba chu thâ dawsak ah, Jesu chu sukmanthai sak tei ding ah don dingin a nawu a.
21Gam ukpa chun a kiang un, “Zia panite lak ah hin a kua zawk hi hun thâdaw piak ding ka hem?” a hun ti kit a. Amau chun, “Barabba,” a tiu a.
22Pilat chun a kiang un, “Jesu, Messiah kiti hi bang ka law ta diam?” a tia. A leng un a kiko ua, “Ama chu kros ah khenden in,” a hun tiu a.
23Gam ukpa chun a kiang un, “Bangatia a hem, bang thil hikhial a nei em?” a tia. Himaleh, nasa zaw diak in a hung kiko ua, “Kros ah khenden in,” a hun ti kit ua.
Pilat in Khetden dingin A Pedok
24 #
Dan 21.6-9
Pilat in bangma hi’thei a nei ta puai, hung buai zaw deu deu ding ahi ti a het phat in, tui a la, mipite ma ah chun a khut a sawp a, “Zia midik thisan hin ka thiang hi; nang un la law lawu kilaw tau in,” a tia.
25Ziaphatchun, mipi zosia chun a hun dawnhuu a, “A thisan chu keimau leh ka chateu chung in um ta hen,” a tiu a.
26Ziaphatchun, Barabba chu a hun thâdaw piak ah, Jesu chu a vok zaw phatin khetden dingin a hun pedok tai.
Sepaite’n Jesu A Eulaunau
(Mar 15.16-20; Joh 19.2-3)
27Chun, gam ukpa sepaite chun Jesu chu gam ukpa In ah a puilût ua, zia tak ah chun sepai pawl zosia le a hung kikhawm tau a.
28A puante chu lîpthâk piak in puan sandup a silsak un,
29linglukhuk a phêk ua, a khuk sak un, a khut changlam ah chun luangkang khat a choisak un; a ma-âng ah bokkhup in, tawtbawlna mang in, “Chibai, Judate Lengpa,” a tiu a.
30Chil a siatkhum un, luangkang chu la’n a luchang a khet piak un.
31Chutia, tawtbawlna a mat zaw phat un a puansil chu a lâkpiak kit ua; ama puanâk ma âksak kit in, khetden dingin a puidok tau hi.
Jesu Khetdenna
(Mar 15.21-32; Luk 23.26-43; Joh 19.17-27)
32A hung pawtdaw lai tak un, Kurini khua mi pakhat, a min Simon a tiu chu a muu ah, a chamlo in kros chu a putsak un.
33Golgotha, Lugumun a ti sek uh mun chu a hung tun phat un,
34 #
Sam 69.21
a dawn dingin uain, thil kha tawh kihel a piau ah; a vak tep leh a dawn nuam ta pua’n.
35 #
Sam 22.18
A khetden zaw phat un, a puante chu âisân in a kihawm un; #27.35 zia châng hi Ms khen khat in zia gual hin a zik ui: “A khetden zaw phat un, a puante chu âisân in a kihawm un; jawlnei in a la genlawk, ‘Ka puante chu a kihawm un, ka puanâk chang ding chu âisân in a kihawm ui,’ a ti kha a guitunna ahi,” ti in
36chut kawm in ama chu a vêng tau a;
37chuleh, a luchung ah chun a hêknau lekha, “ZIA HI JESU, JUDATE LALPA ahi,” ti hi a kitâk hi.
38Chun, a kiang ah chun suammang pani, a changlam ah pakhat, a veilam ah pakhatle a khenden un.
39 #
Sam 22.7; 109.25 A kiang hun haw malamte chun a luu a sukkhum un, a eng eng in a ho malam un:
40 #
Mat 26.61; Joh 2.19 “Nang tempul susia ni thum sung ah tungding kit dingpa, nang leh nang kihukhing ta’n la; Pathian Chapa la hileh kros ah kipat chun hung kum in,” a tiu a.
41Zia gual ma chun thiampu lalte, lekhazikte leh upate chunle a engho un:
42“Midang bawn hukdam ah, ama leh ama kihukdam theilo. Israelte Lengpa ahileh kros ah kipat in hung kumtha’n la, kei unle hun ging mai ding ka puau em;
43 #
Sam 22.8
ama chun Pathian a ging ah, Pathian Chapa ka hile a tingal ah; a nop ahi chun tu’hin hun hukdok leh hiding a pom,” a tiu a.
44A kiang ah gucha kikhendente khan le a hun engho tau a.
Jesu Thi’na
(Mar 15.33-41; Luk 23.44-49; Joh 19.28-30)
45Sûn kim ah kipat sunnung dak thum chan in gam pumpi a thim suak tai.
46 #
Sam 22.1
Dak thum ding vêl in, Jesu chu aw ngai tak in a hung kiko ah, “Eli, Eli, lama sabakhthani?” a hun tia. Zia chu, “Ka Pathian, ka Pathian, bangatia ei nusia la hem?” ti’na ahi.
47Zia tak ah a la ding khenkhatte chun, zia a kiko git chu a het phat un, “Zia pa hin Elijah a ko ahi,” a tiu a.
48 #
Sam 69.21
Tichun, kin tak in mi pakhat a vatai ah, thilpân khat uain thuk tui ah chun a dia a, luangkang in a tâk ah, a vak dawnsak a.
49Midangte chun, “Khawngai tia, a panpi dingin Elijah a hung him him em a la en hitiu,” a tiu a.
50Jesu chu aw ngai tak in a hung kiko kit ah, a thagau a tha tai.
51 #
Pdt 26.31-33
Zia lai tak ah chun tempul sung ah puanjak chu a chunglam ah kipat a nuailam tiang in a hung kithêktha suk ah; lîn a kilîng ah, suangpite a hung puakjak tau a;
52chuleh, thânte chu a hung kihong ah; mithiangtho tam tak a la ipmu sate taksa chu a hung thokit tau a.
53Jesu a hung thawkit nung ah chun a thânteu ah kipat hung pawtdok in, khawpi thiangtho ah chun mi tam takte kiang in a vakilâk tau a.
54Sepai zahotu leh a kiang ah Jesu vêng ah umte chun, linlîng leh thil umdante chu a mu phât un a lau ma mau a: “Zia mi hi Pathian Chapa a la hi tak tak hi,” a tiu a.
55 #
Luk 8.2,3 Gamla tak ah kipat a la thîl zing numei khenkhat a um ua, amau chu Galili gam ah kipat hun zui, a na sep piak sekte kha a hiu a.
56Ziate lak ah chun Mari Makdalin tawh, Jakob leh Joseph nu Mari tawh, Zebedai chate nu kha le a pang ui.
Jesu Vuina
(Mar 15.42-47; Luk 23.50-56; Joh 19.38-42)
57Nitâk lam a hung hi’phatin, mi hausa pakhat a min Joseph, Arimathai khua um chu a hung a, Jesu nungzui ah a la pang ahi’n.
58Pilat kiang in a vachia ah, Jesu luang a vadon a. Ziaphatchun, Pilat chun a luang chu a la pedok dingin thu a pia tai.
59Joseph chun a luang chu a lâkdaw phatin, puannem thiangtho tak in a tuam a;
60ama thân ding ah suangpi a khuak ah chun a sial ah, zia thânkot ah chun suangpi lian tak khat a lîk lut ah, a nusia tai.
61Ahi’n, Mari Makdalin leh Mari dang a um un, thân jawn ah chun a kichuu a.
Jesu Thân Vênna
62A jing ah chun, zia chu Kisaklawk ni zaw ahi’n, thiampu lalte leh Pharisaite chu Pilat kiang in a hung khawm un,
63 #
Mat 16.21; 17.23; 20.19; Mar 8.31; 9.31; 10.33,34; Luk 9.22; 18.31-33 “He pu, zia mithêmpa khan a dam lai khan, ‘Ni thum zaw leh thokit ding ka hi,’ a ti kha ka hezing ui.
64Ziaziakchun, thân chu ni thum ni tiang vêng dingin thu pia’n; achutiloleh, a nungzuite’n ama chu vagu kha’n tiu in, nautâng lak ah, ‘Mithi lak ah kipat in a tho kit tai,’ ti kha’n au; tichun, thil dik lo nunung zaw chu a masa sâng in khawk zaw ding ahi,” a vatiu a.
65Pilat chun a kiang un, “Vêngtu la nei uh hilo a hem? Chiau inla, a muan um thei ding pen in vabawl un,” a tia.
66Tichun, a chiau a, thân chu a muan um thei ding pen ah bawl in, a suang chu a châl un, a vêng dingle a koi tau hi.
Currently Selected:
MATTHAI 27: VAIPBSI
Highlight
Share
Compare
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
