MATTHAI 26
26
Jesu Tha A Guatnau
(Mar 14.1-2; Luk 22.1-2; Joh 11.45-53)
1Jesu’n zia thute zosia chu a gen zaw phatin a nungzuite kiang in,
2 #
Pdt 12.1-27
ni ni zaw leh Chiakân Kût um ding ahi ti la hiau a, zia tak chuleh, Mihing Chapa hi khetden ding ah mat hung hiding ahi tai, a tia.
3Zia hun ah chun thiampu lalte leh lekhazikte leh upate chu, thiampu lianpen Kaiapha leng In ah a kikhawm un.
4Jesu chu dawhathiam ah mat ah tha theina ding lampi a ngaitua khawm tau a.
5Himaleh, Kût hun sung in vang hi ki’hen, dânkhatto leh mipi lak in buaina hung um kha’n ah, a tiu a.
Bethani Khua Sathau A Nu’nau
(Mar 14.3-9; Joh 12.1-8)
6Jesu chu Bethani khua phâk Simon In ah a um lai tak in,
7 #
Luk 7.37,38 numei pakhat, alabastar sathau bûk khat, thau gimtui man tam tak kithun dim hun chawi in a hung a, an nelai chu a luchung a buakkhum a.
8A nungzuite chun a la mu phât un a lungna tau a, bangatia, hiti sukpâmmai mai mai a hem?
9Zia sathau hi man tam tak ah zok ah, migentheite kiang ah piakzawk ding hive’n, a tiu a.
10Jesu’n a het phat in, a kiang un, bangatia, zia numei hi la sukbuai uh a hem? Ama hin ka chung ah thilpha tak a bawl hi.
11 #
Dan 15.11
Migenthei chu la lak un a um zing hi; kei ka hileh la lak un um zing lo ding ka hi.
12Zia ka chung ah sathau gimtui a hung buak hi, ka kivuina ding ah a bawl ahi.
13Titakzet in ka hil la hiu, khawvel pumpi chanchinpha kigenna taphot in, zia numei thilbawl hi ama hetzingna dingin kigen zing ta’n a, a tia.
Juda’n Jesu Matsak A Nopna
(Mar 14.10-11; Luk 22.3-6)
14Sawm leh nite lak ah pakhat Juda Iskariot kiti chu, thiampu lalte kiang in a vachia a,
15 #
Zek 11.12
a kiang un, ama hi hun mat piak leng bang lei pia diam uh? a vatia. Amau chun dangka sawmthum chu a la pia tau hi.
16Zia hun ah kipat chun ama a mattheina ding lemchâng a hawl tai.
Jesu’n A Nungzuite Chiakân Ankuang A Uppi’na
(Mar 14.12-21; Luk 22.7-14,21-23; Joh 13.21-30)
17Vaithum thawipanglo kût bawl ni, ni masa pen ni chun, a nungzuite chu Jesu kiang in a hung ua, a kiang in, “Chiakân Kût annêkna ding chu khoi tak in hun guanggal piak leng uh la ti em?” a tiu a.
18Ama chun, khawpi’n vachiau inla, mi pakhat kiang in, “Ka hotupau in, ka hun a nai ta hen ka nungzuite la In ah hin chiakân anthiang uppi ing ka, a tii,” vatiu in, a tia.
19Tichun, a nungzuite chun Jesu sawl gual in a vahi tau a, Chiakân Jan an ding chu a ngaitua tau a.
20Nitâk lam a hung hi in, nungzui sawm leh nite tawh ankuang a ûm khawm ua.
21An a nêk lai tak ua chun, titakzet in ka hil la hiu, la lak ua mi pakhat in ei matsak ding la hiu, a tia.
22Ziaphatchun, a lungkham ma ma tau a, “Lalpa, kei vang hipua’ng ka maw?” a tiu a.
23 #
Sam 41.9
Ama chun a dawnhu a, “Kuang ei sawkpipa ngei hin ei matsak ding ahi.
24Mihing Chapa hi a chung thu kizik gual gual ah um ding him ahi; himaleh, Mihing Chapa matsak dingpa chung hi a gik hi! A la piang lo hileh ama â dingin pha zaw’n a,” a tia.
25Ziaphatchun, a matsak dingpa Juda chun, “Hotupa, kei vang hi pua’ng ka maw?” a tia. Ama chun a kiang in, la gen gual gual chu hi hen, a tia.
Lalpa Jan An Bawl Patna
(Mar 14.22-26; Luk 22.14-20; 1 Ko 11.23-25)
26An nekhawm ah a ki-ûm pêt ua chun, Jesu’n vaithum a la, mal a jawl ah, a phelsua ah, a nungzuite chu a pia, “Lau inla, neu in, zia hi ka taksa chu ahi,” a tia.
27Chuleh, no chule a la, kipak thu a gen ah, a kiang un a pia, zia hi dawn chiat un,
28 #
Pdt 24.8; Jer 31.31-34 zia ka thisan, mi tam takte gitlo ngaidamna ding ah pawt, Thuthunna chu ahi.
29Ka hun hil la hiu, ka Pa gam ah nang uh tawh a thak ah ka dawn ding ni a tun masia, tu’kipat zia grep ga tui hi dawn talo ding ka hi, a tia.
30La pakhat a sak zaw phat un, Oliv tâng lam zuan in a pawtdok tau hi.
Peter in A Kilepsan Ding Jesu’n A Genlawk
(Mar 14.27-31; Luk 22.31-34; Joh 13.36-38)
31 #
Zek 13.7
Jesu’n a kiang un, tu’jan ah hin keima ziakin la leng un jam in lau;
belampu chu vua’ng ka tin,
a belam honte chu kithe chek in au,
ti zik gual ah khan.
32 #
Mat 28.16
Himaleh, ka thawkit nung leh, la malam ua Galili lam ah a la chia ding ka hi, a tia.
33Peter in a dawnhu a, midang zosia jam leule ke’n vang hun jamsan pua’ng ka, a tia.
34Jesu’n a kiang in, titakzet in ka hil la hi, tu’jan ah hin nang in âk khua’n ma’n thumvei ei kilepsan ding la hi, a tia.
35Peter in a kiang in, nangma ziak ah thi ding hi lengle, hun kilepsan pua’ng ka, a tia. Zia gual ma chun a nungzui dangte’n le a hun ti chiat tau a.
Gethsemani ah Jesu Pauchapna
(Mar 14.32-42; Luk 22.39-46)
36Jesu chu amau haw tawh mun pakhat Gethsemani kiti ah chun a hung ua, a nungzuite kiang in, zia tak ah hin a la kichuu inla, keima zia lam deu ah sawn vapauchap ing ka, a tia.
37Ahi’n, Peter leh Zebedai chapa panite chu a pui ah, hung lungngai in a lunggim ma ma a.
38Chuleh, a kiang un, ka lung a gim ma ma ziang hen, thina khop hial a hi; zia tak ah hin a la um unla, ei la vênpiu in, a tia.
39Ama chu a vachia gamla chuam deu ah, bokkhup in a pauchap a, Aw he Pa, a hi’thei leh zia no hin ei pêl mai hen: himaleh, keima thu hilo in, nangma thu thu hizaw hen, a tia.
40Ziazaw chun a nungzuite kiang in a hung ah, a ipmu’n a hung mu ta’n. Peter kiang ah chun, dakkâl khat sung ziang le ei vênpi zo lo la hiu maw?
41Kivêng unla, thepna la lut lona ding un pauchap un; thagau in vang a ngapcha hen, taksa ahileh vang a hat lo ahi hi, a tia.
42A niveina dingin a vachia kit ah, a pauchap kit a, Aw Pa, zia no hi ka dawn lo ah ei pêl theilo ding hial ahi chun nangma thu thu hi hen, ti in.
43A hung kit ah, amau haw chu a ipmu’n a hung mu kit ah; a i-mut uh a suak ma ma ziang a.
44Amau chu nusia in a chia kit ah, a thumveina dingin a pauchap kit a, a gen ngai ma a gen kit a.
45Ziazaw chun a hung kit ah, a nungzuite kiang ah chun, “Ipmu zing ah kichawl zing nalai ding la hiu em? En un, a hun hung tung ding ahi tai, Mihing Chapa hi migilote khut ah mat, ah um ding ahi tai.
46Tho un, chia hitiu; en tiam un, ei matsak dingpa chu a hung nai ma ma tai,” a tia.
Jesu A Matnau
(Mar 14.43-50; Luk 22.47-53; Joh 18.3-12)
47Zia gual ah chu a gen lai tak in, sawm leh nite lak ah pakhat Juda kha a hung tung ah, thiampu lalte leh lekhazikte leh upate pui huai mipi tam tak, khetbûk tawh, chemjam tawh a hung tau a.
48Ama man dingpa chun tepte’na a la pia’n: Ka chawp pen pen chu ama hiding ahi’n, zia chu man ziang un, ti in.
49Tichun, Jesu a vazuan ngal a, Hotupa, Chibai, ti’n a chawp a.
50Ziaphatchun, Jesu chun, lawm, la bawl ding ding chu bawl ziang in, a tia. Tichun, Jesu chu a man tau hi.
51Chuleh, Jesu kiang ah umte lak ah pakhat chun a chemjam a jukdok ah, thiampu lianpen suakpa chu a hun sat ah, a bil a sat tha tai.
52Jesu’n a kiang in, la chemjam kha a pâi ah thun kit in, kuale chemjam pan chu chemjam ma ah thi ding ahi.
53Ei panpi ding in ka Pa kiang in don leng, ama chun vansawlchâkte sang guk mun sawm leh ni sâng ah tam zaw le hun sawl thei ahi ti helo la hiu em?
54Himaleh, zia gual ah chun hi taleng bangti’n Pathian Lekha thu guitung thei ding a hem? a tia.
55 #
Luk 19.47; 21.37 Zia hun ah chun Jesu’n mipite kiang in, chemjamte leh khetbûkte chawi in gucha man ding gual in la hung uh ahi maw? Tempul ah nisi’n in thuhil in ka um ah, lei man paw’ngal un.
56Himaleh, Pathian lekha thu, jawlneite’n a gen haw kha a guitunna ding in zia thilte hi tung ahi, a tia. Nungzuite zosia khan a taisan ua, a jam mang tau hi.
Jesu Thiampu Lal Ma ah
(Mar 14.53-65; Luk 22.54-55,63-71; Joh 18.13-14,19-24)
57Jesu hung mante chun, lekhazikte leh upate kikhop khawmna sek, thiampu lianpen Kaiapha In ah a pui tau a.
58Peter chun gamla tak in a zui ah, thiampu lianpen In huang sung tiang chu a zui ah, a tawpna thu he dingin mi a vêngte lak ah, a vakichu.
59Thiampu lalte leh vaihawmte chun ama tha theina dingin Jesu hêk ding thuhiatpi a hawl un.
60Thuhiatpi diklote hung pang sek maleu bangma a mu puau ah, a tawp in mi pani a hung ding ua:
61 #
Joh 2.19
Zia pa hin, Pathian tempul hi susia’ng ka tin, ni thum sung in tungdok kit ing ka, a tii, a hun tiu a.
62Thiampu lianpen chu a hung dingdok ah, a kiang in, nang in bangma dawnhu lo ding la hem? Nangma a hun heknau hi bangtidan a hem? a hun tia.
63Himaleh, Jesu chu thipbek in a um a. Chun, thiampu lianpen chun, Pathian hing min in kigenchian dingin ka hun sawl la hi, Messiah, Pathian hing Chapa chu la hi em? ei hil in, a tia.
64 #
Dnl 7.13
Jesu’n a kiang in, “La hi, lei ti chu lam. Banghitaleh, ka hil la hiu,
Tu’kipat hin Mihing Chapa hi,
Bangkim Hi’theipa changlam ah kichu leh,
van sûm lak ah hung suk hun mu’n lau,” a tia.
65 #
Thp 24.16
Ziaphatchun, thiampu lianpen chun a puan a botthêk a, “Pathian a gensia tai, thuhiatpitu dang bang a ngai nalai em? En tiam un, a Pathian gensiatna le la he tau hi;
66Aleh, bangti’n la ngai awm?” a tia. Amau chun, “Thi tâk ahi,” ti’n, a dawnhuu a.
67 #
Isa 50.6
Ziaphatchun, a maichang ah chil sekkhum in, a vuau ah, khen khat in a bêng ua:
68“Nang Messiah, kua a hem a hun vua, ei hil in,” a tiu a.
Peter in Thumvei A Kilepsanna
(Mar 14.66-72; Luk 22.56-62; Joh 18.15-18,25-27)
69Peter chu huang pawlam ah chun a kichu. Nungak pakhat a kiang in a hung a, “Nangle Galili mi Jesu lawite khat la hi,” a hung tia.
70Himaleh, a leng ua ma-âng ah chun a hung kilep a, “La thu gen chu ka he talojen hi,” a tia.
71Chun, Inlîm ah a vapawt leh nungak dang pakhat in a la mu, zia tak ah umte kiang ah chun, “Zia pa hile Nazareth khua Jesu tawh um sek a hiu,” a tia.
72Ama chu kitiam hial in a kilep kit a, “Zia pa chu ka hekha him him puai,” a tia.
73Chomkhat zaw in a kiang ah dingte chun Peter kiang in, “Nangle amau haw lawi lak ah mi la hi ngei hi lam e, la paudan inle a kihiai,” a hun ti kit a.
74Ziazaw chun, hânsia law leh kitiam hial in, “Zia mi chu ka hekha him him puai,” a ti kit a. Ziaphatchun âk a hung khuang ngal tai.
75Ziazaw chun, Peter chun, Jesu thugen, “Âk khua’n ma’n nang in thumvei ei kilepsan ding la hi,” a ti kha a hun hedok ah; a pawt in, ha kâ in a vakap tai.
Currently Selected:
MATTHAI 26: VAIPBSI
Highlight
Share
Compare
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
