MATTHAI 25
25
Nungak Mo Nungzui Sawm Tekhinthu
1 #
Luk 12.35
Chuleh van-gam chu nungak thiangtho sawmkhat, a thaumei uh keng ah, moneipa dawn ding ah kipandokte gual kha hi’n a.
2A lak ua panga a pil un, panga a ngol ui.
3A ngolte chun a thaumei uh a keng un; himaleh, a tui a kengthua puau a;
4a pilte chun vang a ûm in thautui a kipuak un, a thaumei uh tawh a keng khawm ui.
5Himaleh, moneipa chu a hung hak tâk ziakin a la ipmu vuang un, a la ipmu man tau a.
6Jankhang lai tak chun, ngai tiam un, moneipa a hung tai, a dawn dingin hung pawt tau in, ti ah kiko gi a hung um ta’n.
7Ziaphatchun, nungak thiangthote chu hung tho in, a thaumei uh a hun vâk tau a.
8A ngolte chun, a pilte kiangah chun, “La thautui uh ei hawm un, ka thaumei uh mit ding ahi tai,” a tiu a.
9Himaleh, a pilte chun: “Hilo e, kei uh â ding tawh nang uh â dingin a kiting puai; chiau inla, a zuakte kiang in vakichawk tau in,” a tiu a.
10Chutia, a chaw ding ah a vachia mang kâl ua chun, moneipa chu a hung tung ta; tichun, kisazosa umte chu tawh kichenna ankuang ûm dingin a lut tau a, kot chu a khak tau hi.
11 #
Luk 13.25
Ziazaw chun, nungak dangte kha le a hung tung un, Lalpa, Lalpa, kot ei hon in, a hung tiu a.
12Himaleh, ama chun, titakzet in ka hil la hiu, nanghaw ka hun he’kha puai, a la ti san tai.
13Zia gual chun, kiging zing in um un, Mihing Chapa hung ding ni leh, a hun ding bangma la he pawngal un, a tia.
Talent Tekhinthu
(Luk 19.11-27)
14 #
Luk 19.11-27
Chun, van-gam chu mi pakhat, gamdang ah khualzin ding ah kisa, a suakte ko ah, a sumte kolsak gual chu ahi;
15pakhat kiang in talent nga a pia, a dang khat kiang in talent ni a pia, chuleh a dang khat kiang in talent khat a pia; tichun, a hi’thei ding hun tiang chiat un a pia, a zindok tai.
16Talent nga changpa chu a kuandok ngal a, sumkawl a vavei ah, talent nga dang a vaveipung a.
17Zia gual ma chun talent ni changpa kha le a kuandok ah, talent ni dang a vaveipung kit a.
18Ahi’n, talent khat changpa khan chu lei a cho ah, a pu dangka chu a phûm tai.
19Sawt tak nung in zia suakte pu chu a hung tung ta’n, a dangkau kha bang a la lawu em ti a hun etpi ta’n.
20Tichun, talent nga changpa kha a hung a, talent nga dang tawh a hun chawi ah, he pu, talent nga lei kolsak kha ahi’n, en in, talent nga dang ka mube hi, a tia.
21A pu chun a kiang in, la bawlpha na e! Suak pha leh ginum, tawmcha chung ah la ginum ziakin, tam tak chung ah vaihawm dingin hun koi ing ka; la pu kipakna’n lut ta’n, a tia.
22Chuleh, talent ni changpa chule a hung a, he pu, talent ni lei kolsak kha ahi’n, en in, talent ni dang ka mube hi, a tia.
23A pu chun a kiang in, la bawlpha na e! Suak pha leh ginum, tawmcha chung ah la ginum ziakin, tam tak chung ah vaihawm dingin hun koi ing ka; la pu kipakna chun lut ta’n, a tia.
24Chuleh, talent khat changpa kha le a hung a, he pu, nang hi mi genhak tak la hi ti ka hia’n, la tu’lo nale la ât sek a, la the’lona ah le la lakhawm sek hi;
25tichun, ka hun lau ah, ka chia ah, la talent kha lei ah ka vaphûm ah, en in, nang â ngai ma kha ka hun chawi kit hi, a tia.
26A pu chun a kiang in, nang suak gilo leh thadapa, ka tu’lona le ka ât sek ah, ka the’lona le ka lakhawm sek hi ti la he maw?
27Chuti ahileh, ka dangka hi sum koina In bêk ah la vakoi ah, ka hung kit ah hin ka dangka chu a pung tawh ka mu kit ding ahi.
28Ziaziakchun, a talent neisun kha lâkpiak un la, talent sawm neipa kiang in pia tau in.
29 #
Mat 13.12; Mar 4.25; Luk 8.18 Kuale a nei tapo piak belap hi’ntin, tam tak nei in a; himaleh, a neilo chu a neisun le lâkpiak hiding ahi.
30 #
Mat 8.12; 22.13; Luk 13.28 Tichun, suak phachuam lo chu pawlam thim ah paidok un; zia tak ah chun kâ leh hagial um ta’n a, a tia.
Namtin Chung ah Vaihawmna
31 #
Mat 16.27; Mat 19.28 Mihing Chapa chu a vansawlchâkte tawh, a lopina kithuam ah a hung tak leh, a lopina lalchutpha chung ah hung kichu’n tin;
32nam zosia chu a ma-âng ah kikhawm intiu in; amau chu belampu’n, kêlchate lak ah belamte a khendaw sek gual in hun khendan in a.
33Tichun, belamte chu a changlam ah koi intin, kêlchate chu vang a veilam ah koi in a.
34Ziaphat chuleh, Lengpa chun, a changlam ah umte kiang ah chun, hung un, nang haw ka Pa maljawlna changte haw, khawvel siam lim ah kipat nang uh â ding ah siam gam chu lua tau in;
35ka gil a kial in nêk ding lei piau a; ka dang a châk in dawn ding lei piau a; malzin ka hi’ in lei zin tun un;
36ngawnchang ah ka um in puan lei sil sak un; ka damlo in lei ve’thau a; suangkul ah ka um inle lei hung kanthau ah, ti’n tin.
37Zia hun tak chuleh midikte chun, Lalpa khoi tak ah gilkial in ka hun muu ah nêk ding ka hun piau ah a hem? Chuleh, khoi tak ah dangchâk ah ka hun muu ah, dawn ding ka hun piau ah a hem?
38La malzinna ah le khoi tak ah ka hun zintun ua, khoi tak ah ngawnchang ah um lai puan ka hun piau ah a hem?
39Chuleh, damlo leh suangkul ah la umna khoi tak ah ka hun kantha khau ah a hem? ti’n au.
40Lengpa chun a kiang un, titakzet in ka hil la hiu, zia ka unaute lak ah a neupen chung ah la hiu kha le, keima chung ah hi’ la hiu, hun ti ta’n a.
41Chun, ah veilam ah umte kiang ah chun, nanghaw hânsedawlte haw, diabol leh a sawlchakte â ding ah kiguanggal kumtuang meipi lam ah chun chia tau in;
42ka gilkial lai inle nêk ding lei pia puau a, ka dangchâk lai inle dawn ding lei pia puau a;
43malzin ka hi inle lei zintun puau a; damlo leh suangkul ah ka umna’n le lei kantha nuam puau hi, ti’n tin.
44Zia tak chuleh amau chun, Lalpa, khoi tak ah gilkial leh dangchâk in a hem, malzin ah leh ngawnchang in a hem, damlo leh suangkul ah le ka hun muu ah, ngaisak lo ah ka um uh? ti’n tiu in.
45Ziaphat chuleh, ama chun, titakzet in ka hil la hiu, ziate lak ah a neupen chung ah la hi’lo uh kha, keima chung ah hi’lo la hiu, a la ti’n a.
46 #
Dnl 12.2
Tichun, ziate lawi chu kumtuang gawtna chun sawl ta’n tin; midikte chu vang kumtuang hinna chun lutsak ta’n au, a tia.
Currently Selected:
MATTHAI 25: VAIPBSI
Highlight
Share
Compare
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
