MATTHAI 24
24
Jesu’n Tempul Siatna Ding A Genlawkna
(Mar 13.1-2; Luk 21.5-6)
1Jesu chu Tempul sung ah kipat a hung pawt ah, chia mang ding a kisak lai tak in, a nungzuite chu tempul thupi dan kawkmu dingin a hung un.
2Ama chun a kiang un, zia zosia hi la muu hi maw? Titakzet in ka hun hil hi, zia tak ah suang kitiang khawm haw zosia hi pakhat chale hawi lo ah sukchip lo ding a um puai, a tia.
Hun Nunung Tepte’na
(Mar 13.3-13; Luk 21.7-19)
3Oliv tâng vum ah a kichut lai in, a nungzuite chu a gûk in a hung ua, zia la gen zosia hi bangtik leh a hung um diam; chuleh, la hung kitna ding leh khawveltawpna ding tepte’na chu bang ahi diam ei hil in, a hung tiu a.
4Jesu’n a kiang un, kuama’n a hun theppûk lona ding un chingthei un.
5Ka min in mi tam tak in, Khrista chu ka hi, ti’n mi tam tak hun pui mang intin uh.
6Kidona leh kido thuthangte hia’n la tiu in; la lungkham lona ding un kivêng un; zia thil zosia chu a hung tung ding him chu ahi; himaleh, a tawpna chu hiziang pua’n a.
7Nam khat leh nam khat kido in au, gam khat leh gam khat le kido intiu in, kialte hung tung in, mun chuam chuam in lîn hung kilîng in a;
8zia zosia chu nauvei kipatna ahi.
Sukgentheina Ding Genlawkna
9 #
Mat 10.22
Nang uh chu gawt dingin hun matsak intiu in, tha le hun that in au; ka min ziakin nam zosia huat in um in lau.
10Ziaphat chuleh, mi tam tak pûk intiu in, kimatsak tua in; hung kimuda tua in au.
11Jawlnei lêm tam tak hung pawt in, mi tam tak hun thêm zo in au.
12Dan khawksak lona a pun ding ziakin, mi tam tak hepina chu hung dai in a.
13 #
Mat 10.22
Himaleh, a tawp tiang ah thuakzote chu hukhin in um in au.
14Chuleh, zia Gam Chanchinpha hi nam zosia hiatsakna dingin khawvel zosia ah genjak in um intin; ziazaw chuleh, tawpna chu hung tung in a.
Hi’buakpa Ki’dak um
(Mar 13.14-23; Luk 21.20-24)
15 #
Dnl 9.27; 11.31; 12.11 Ziaziakchun, jawlnei Danial in a gen, hi’buakpa ki’dak um chu mun thiangtho ah hung ding la mu phât ua leh (a sim kha taphot in a umdan he hen;)
16Judea gam ah umte chu tâng ah jam uh hen la;
17 #
Luk 17.31
Inchung ah umte chu a In sung ah vante la dingin kum ki’hen;
18loulai ah um chunle a puan la dingin chia kit ki’hen.
19Zia hun ah nauvop lai leh nau nawichep lai neite chung chu a gik hi!
20La jamna ding uh chu phalbi lai a hem, sabbath ni a hem ahi lona ding in pauchap un.
21 #
Dnl 12.1; Tpn 7.14 Buaina nasa tak hung tung ding ahi ziakin, zia gual him him chu lei chung siam lim ah kipat tu’tiang ah hin a um kha naipua’n, um le um kit diak talo ding ahi.
22Zia ni chu sukchom hilo vang leh, mihing kuama a suakcha umlo ding ahi; himaleh, têlchuamte ziakin zia ni chu sukchom hiding ahi.
23Ziaphat chuleh, entia, zia hin Messiah a um hi! a hem, zia son a um hi! a hem tileule taksang kiu in.
24Messiah lêmte leh jawlnei lêmte hung pawt intiu in, melchikna leh tepte’na thupi tak tak le hun etsak in au; hithei vang leh têlchuamte hial le thep zaw hun gua’n au.
25En tiam un, a hun masang ah ka hun hil la hiu.
26 #
Luk 17.23,24 Ziaziakchun, hung en un, gamthip ah hin a um hi, tileule vachia diak kiu inla, pindan sunggil in a um hi, tileule taksang diak kiu in.
27Sualam ah kawl a hung phêt ah tumlam chan ah a kilat gual hin, Mihing Chapa hung kit ni chule zia gual chu hi ding ahi.
28 #
Luk 17.37
Sapul umna taphot ah mulukolle um khawm in au, a tia.
Mihing Chapa Hungna Ding
(Mar 13.24-27; Luk 21.25-28)
29 #
Isa 13.10; Jol 2.10,31; 3.15; Tpn 6.12; Isa 13.10; Ezk 32.7; Jol 2.10; 3.15; Isa 34.4; Tpn 6.13 Zia buaina hun zaw zaw ah chun,
nisa hung thim intin,
thapi’n le a vak sua ta pua’n a;
van ah kipat in aksite hung kia’n tin,
van thil hi’theinate hilîng in um in a.
30 #
Dnl 7.13; Zek 12.10-14; Tpn 1.7 Zia tak chuleh, Mihing Chapa tepte’na chu van ah hung kilang intin, lei ah nam zosiate chun hun sûn intiu in, Mihing Chapa chu a lopina tawh, a thilhitheina tawh, van sûm chung ah hung chu a la mu’n au.
31Pengkul gi nasa tak tawh, a vansawlchâkte hun sawldok intin, kawl kil li ah kipat, van tawp langkhat lam ah kipat a langkhat lam tiang in, a mi têlchuamte chu hun lakhawm in au.
Theichang Kung ah Kipat Zil Ding
(Mar 13.28-31; Luk 21.29-33)
32Tichun, theichang kung ah kipat hin thil umdan zil un: A bâk a hung sel ah, a duate a hung no tak leh, nipi a nai tai, ti la he sek ui.
33Zia gual ma chun, zia thilte hi la hun mu tak ua leh, kotkhak bul ah um ahi tai, ti hiau in.
34Titakzet in ka hil la hiu, zia thilte hi a leng ah a tunkim masia, zia khangthakte hi bei pua’n au.
35Lei leh van mangthai intin, ka thu ahileh vang mangthai pua’n a.
Kiging Zing ah Um A Ngaidan
(Mar 13.32-37; Luk 17.26-30,34-36)
36Zia ni leh hun ding chu kuama’n a hepuau in, vansawlchâkte leh chapa’nle a hepua’n, ka Pa bep in a hia’i.
37 #
Thl 6.5-8
Himaleh, Noah hun lai gual khan, Mihing Chapa hungna ding chule hung hiding ahi.
38Zia hun lai ah tuilêt masang ah, Noah a kuang ah a lut ni tiang ah khan, a neu in, a dawn ua, a kichen sak un, a kicheng ui.
39 #
Thl 7.6-24
Tui a hung lêt ah a hun chupmang masia kha, khawhe lo in a um un; zia gual ma khan Mihing Chapa hungna ding chule hung hiding ahi.
40Zia hun tak chuleh, lou ah mi pani um le pakhat chu lâk hi’ntin, pakhat chu nutsia hiding ahi.
41Numei pani buhêkna sêm khawm le pakhat lâk in um intin, pakhat nutsia in um in a.
42Ziaziakchun, kiging zingin um un; la Lalpau chu bangtik ah hung ding ahi la hepaw ngal un.
43 #
Luk 12.39,40 Himaleh, zia hi he un, Inneipa chun gucha hung ding hun chu he masa hileh, a la kiging zing intin, a In chu phiatvansak lo hial ding ahi.
44Ziaziakchun, nang uh le kisa zosa’n um un; Mihing Chapa chu la ginchâk lo lai tak un hung kha ding ahi.
Suak Ginum leh Suak Ginum lo
(Luk 12.41-48)
45Suak ginum leh pil tak, a pu’n a hun tak ah an hawm piak sek ding ah, suak dangte Insung ah a koi ding chu kuapen ahi diam?
46A pu a hung lai tak ah zia gual ah a la bawl a hun mu ding chu a hampha na e!
47Titakzet in ka hil la hiu, a nei zosia chung ah hotu dingin koi in a.
48Himaleh, suak phalo chu a kingaitua ah, ka pu a hung hak hi, ti’n,
49a suak chanpite a la vua hen la, zukhamte tawh ne leh dawn in um leu vang;
50zia suakpa pu chu a ginchâk lo lai tak in, a het lo kâl in hung intin,
51tumni hun sua intin, miphalêmte chan chu chansak intin; zia tak ah chun kâ leh hagial um ta’n a, a tia.
Currently Selected:
MATTHAI 24: VAIPBSI
Highlight
Share
Compare
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
