MATTHAI 23
23
Jesu’n Lekhazikte leh Pharisaite A Demna
(Mar 12.38-39; Luk 11.43,46; 20.25-46)
1Ziazaw chun, Jesu’n a nungzuite leh mipite kiang in thu a gen a:
2Lekhazikte leh Pharisaite chu Mosi chutpha’n a kichu sek ui;
3ziaziakchun, a hun thuhilteu chu zui sek unla, amau umdan in vang um kiu in; a kam un a gen ua, sep la a sêm puau a.
4Mi â dingin puakgik tak tak siam piak in a puaksak un, amau in la a khutmûk chau le a tawisak nuam puau hi.
5 #
Mat 6.1; Dan 6.8; Kis 15.38 A thil hi’ taphotteu chu mihing mit mu dingin a hi’sek un, a thilbuu leh a dialkopteu chu a hi’lian un, a puanâk mongteu chu a hi’pawm ui.
6Luaithe’na In leh Sunagog ah chun chutna phapente chan ah,
7kaithial lai ah chibai kibûk leh, mite’n zilsakpa, a ti dingteu chu a doichuam sek ui.
8Himaleh, nanghaw vang, zilsakpa ti dingin um kiu in; hotu pakhat bep la nei ui, nang uh hi suapi khat chiat la hiu hi.
9Zia lei ah hin kuama he pa, ti chuam kiu in, la Pau pakhat a um hi, van ah um chu.
10Hotupa, ti dingin le um diak kiu in; la hotuu pakhat a um a, Messiah ngei chu ahi.
11 #
Mat 20.26,27; Mar 9.35; 10.43,44; Luk 22.26 La lak ua a lianpen ding chu la nasem ua a pan ding ahi.
12 #
Luk 14.11; 18.14 Kuale ama leh ama kichawisâng chu, mutawm in um intin; chuleh, kingaitawm chu choisa’n in um in a.
13Nanghaw, lekhazikte leh Pharisai miphalêmte haw, la chung uh a gik hi! Mi van-gam lut ding la dâl ua; nang uh la la lut puau ah a lut nuamte le la lutsak diak puau hi.
14Nanghaw, lekhazikte leh Pharisai miphalêmte haw, la chung uh a gik hi! Meithâite la ne gam un, mi thepna’n sawt tak tak la pauchap sek ui; ziaziakchun, demna nasa zaw diak la chung un tung in a.#23.14 zia châng hi Text in a um puai
15Nanghaw, lekhazikte leh Pharisai mi phalêmte haw, la chung uh a gik hi! Mi pakhat lâklutna ding bep inle tuisuagiat leh mualkâng la kan tua lum let un; a hung lut phat leh, nangmau chan le’ni gawtmun ah chang dingin la siam sek ua.
16Nanghaw, puitu mitthûmte haw, la chung uh a gik hi! Mi munthiangtho sal ah a kihaksial leh bangma a khawk pua’n; mun thiangtho ah um sana sal ah a kihaksial uh leh la chung uh a gik hi! la tiu a.
17Nanghaw mingol mitthûmte haw! Sana leh zia sana suthiangtho tempul chu khoi zaw thupi lasak zawk uh a hem?
18Chuleh, mâichâm sal ah mi a kihaksial leh bangma a ti pua’n; mâichâm chung ah thilpiak sal ah a kihaksial leh vang a gui tung hi, la tiu a.
19Bang gual bep ah muthei lo la hitau em? Thilpiak leh a thilpiak hi’thiangtho mâichâm chu khoi a thupi zaw em?
20Ziaziakchun, kuale mâichâm sal ah kihaksial chule a chung ah kitiam ahi’n, a sung ah um zosia sal ah kihaksial tho ahi.
21Chuleh, mun thiangtho sam ah kitiam chu a sung ah chêngpa chung ah kitiam ahi kit hi;
22 #
Isa 66.1; Mat 5.34 chuleh, kuale van sam in kitiam taleu chin, Pathian lalchutpha leh a chung ah kichu chu sam ah kitiam hi tho tho ding la hiu.
23 #
Thp 27.30
Nanghaw, lekhazikte leh Pharisai miphalêmte haw, la chung uh a gik hi! La thâichiteu lak ah pudinate, mawsawlate leh pathikhawmte natiang in sawm ah khat la piau a; dan thupiak poimaw tak tak, vaihawmna dan, jangaina dan leh ginna dante hi bangma’n la ngai puau ah; a dangte chu haisan diak lo in, ziate chu la hiding him uh ahi.
24Nanghaw puitu mitthumte haw! Thosi thitthiang in, sangawngsau la val ui!
25Nanghaw, lekhazikte leh Pharisai miphalêmte haw, la chung uh a gik hi! No leh kuangte a paw lam la nawt thiang ua, a sunglam chula du-âmna leh kisum lona’n a dim ngal a!
26Nang, Pharisai mitthûm! La no chu a sunglam nawt thiang phot lechin, a pawlam le hung thiang mai ding ahi.
27 #
Nas 23.3
Lekhazikte leh Pharisai miphalêmte haw, la chung uh a gik hi! Thân a pawlam mêlpha tak ah kijut vam ah, a sunglam mithi gu leh thilbuak tincheng ah dim tawhbang la hiu.
28Zia gual tho ah chun, nanghaw le pawlam ah chun midangte chung ah fel tak bang maleu chinle, la sunggil lam uh gûkkhelna leh bawsiatna’ dim la hiu hi.
29Nanghaw lekhazikte leh Pharisai miphalêmte haw, la chung uh a gik hi! Jawlneite suang la dawu in, midikte thânle pha tak in la chei ui,
30nang uh chun, I pu leh pateu hun lai ah khan a la um hileu hin chu, jawlneite thisan suana khan bangma’n pang lo ding I hiu ah, la ti sek ui.
31Himaleh, jawlneite a la that sekte suan la hi’nau chu nangmau ngei in hetpi in la sudik uh ahi hi.
32La pu la pateu te’na chu sudim ngal tau in.
33 #
Mat 3.7; 12.34; Luk 3.7 Nanghaw gûlte haw, nanghaw gûlsia suante haw! Gawtmun ah thiamlo channa chu bangti’n pumpel ding la hiu em?
34Ziaziakchun, la kiang un jawlneite, mipilte leh lekhazikte kha ka hun sawl a; khenkhat chu that in la tiu in, khenkhat chu a la khenden in la tiu in, khenkhat chu kikhopna Inte ah vua’n la tiu in, a khua a khua’n delzui in lau;
35 #
Thl 4.8; 2 Kh 24.20,21 tichun, midik Abel thisan ah kipat Barakia chapa Zekhariah, mâichâm leh mun thiangtho kikâl ah la thau thisan la sua zosiau kha, nangmau chung ah hung chu ding ahi.
36Titakzet in ka hil la hiu, zia zosia chu tu’lai khangthakte chung in hung tung in a.
Jesu’n Jerusalem A Sûnna
(Luk 13.34-35)
37Aw Jerusalem, Jerusalem, Jawlneite thattu leh la kiang ah hun kisawlte suang ah a la seplumte! Jawlneite a la that a! Âkpi’n a note a tha nuai ah a awp khum sek gual in bang vei jat ahi tam, ke’n le awp khum ding ka guat hi; himaleh, la nuam puau hi.
38 #
Jer 22.5
En un, la In uh chu a hawm ah nutsia in a um tai.
39 #
Sam 118.26
Ka hil la hiu, Lalpa min ah hung chu a hamphai, la ti masang siau ei mu kit ta pua’n lau, a tia.
Currently Selected:
MATTHAI 23: VAIPBSI
Highlight
Share
Compare
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
