MATTHAI 18

Lopina Dik Chu

(Mar 9.33-37; Luk 9.46-48)

1 # Luk 22.24 Zia lai tak ah chun nungzuite chu Jesu kiang in a hung un, van-gam ah kua a lopi pen diam? ti’n a hung dong un.

2Jesu’n naupang neucha khat a kiang in a ko ah, a lak un a dinsak a:

3 # Mar 10.15; Luk 18.17 Titakzet in ka hil la hiu, la lung uh la hun hei ua, naupangte gual ah la umlo ua leh van-gam ah lut pua’n lau.

4Kuale zia naupang gual ah kingainiam tapo chu, zia mi chu van-gam ah a lopi pen hung hiding ahi.

5Kuale zia tawhbang naupang hi, keima min ah a la lop chun keima ei lop hiding ahi.

Gilo Ding ah Thepna

(Mar 9.42-48; Luk 17.1-2)

6Himaleh, kuale zia tawhbang mi neu, keima ei gingte lak ah pakhat cha hile kipûksak chu, a ngawng in buhêkna suang kikhâi hen la, tuisuagiat thuk tak ah kisep lut leh ama â dingin pha zaw’n a.

7Pûknate ziakin khawvel chung a gik hi! Pûknate vang a umlo theilo ahi; himaleh pûkna hun umsak sekte chu a chung uh a gik hi!

8 # Mat 5.30 Ziaziakchun, la khut a hem, la keng a hem in a hun pûksak chun, tan inla, paimang mai in; khut pani a hem, keng pani a hem nei ah kumtuang meidil ah la chia sâng in, kengbai a hem, khut langkhat bei a hem ah hinna la lut chu nang â dingin a pha zawi.

9 # Mat 5.29 Chuleh, la mit in a pûksak chun kheldok inla, paimang ziang in; mit pani nei a gawtmun meidil ah la um sâng in, mit langkhat bei ah hinna la lut chu a pha zawi.

Belam Mang Tekhinthu

(Luk 15.3-7)

10 # Luk 19.10 Ziaziakchun, zia naupang neuchate lak ah pakhat ziang le musit lo dingin chingthei ta un; ka hun hil la hiu, a vansawlchâkteu in van ah um ka pa mel a mu zing uh ahi.

11Mihing Chapa hi mangthaite hawl ah hukdam ding ah hung ahi#18.11 zia châng hi I text un a um puai.

12Bang la ngaituau em? Mi pakhat in belam za khat nei hen la, a lak ua pakhat chu mang ta leh, sawmkua leh kuate chu nusia in tâng ah te chia in, a mang pen chu vahawl lo ding a hem?

13Tichun, a hun mudaw kit tak leh, titakzet in ka hil la hiu, a vâkmang lo sawmkua leh kuate chung sâng in, a mudaw kit pakhat chung ah chun kipak zaw ma ma ding ahi.

14Zia gual ma chun, zia mi neute lak ah pakhat ziang manthai hile, la Pau van ah um lung lam ahi puai.

Migilo Vauhilna

15 # Luk 17.3 Kochuam sung ah mi pakhat in la chung ah thil hi’khial taleh, chia’n la, ama leh nangma bep het in a gitlona hil in. A hun ngaithâk leh ama chu la thu zaw hita’n a.

16 # Dan 19.15 A ngai nop lo leh vang, midang pakhat a hem, pani a hem pui inla, thu zosia chu hetpi pani a hem, pathum a hem kam ah sukdet ah a um theina dingin.

17Chutia, a hun ngaisak diak lo chun, la thuu chu kochuam ah tut in; chuleh, kochuam le a ngaithâk nop diak lo ahi chun, ama chu nang â dingin Jentel leh sedawlte gual hita hen.

18 # Mat 16.19; Joh 20.23 Titakzet in ka hil la hiu, lei ah la kân uh chu van ah le kân hi’n tin; lei ah la thap chu van ah le thap hi’n a.

19Zia hi a vêlin ka hun hil kit la hiu, lei chung ah mi pani’n kithu gual tak ah thil la dot uh chu, ka pa van ah um chun hi’piak ding ahi.

20Keima min ah mi pani a hem, pathum a hem la um khawmnau ah chun kei pakhat ah pang zing sek ka hingal a, a tia.

Ngaidamna Thu

21 # Luk 17.3,4 Peter chu a kiang in a hung a, Aleh, Lalpa, ka suapi’n ka chung ah bang jat vei hi’khial leh ka ngaidam diam? Sagivei tiang in ahi diam? a tia.

22 # Thl 4.24 Jesu’n a kiang in, Sagivei ka ti puai, sagivei mun sawmsagi#18.22 Sawmsagi leh sagi, ti ah lêthei ahi tiang in ka hun ti ahi.

Mi Ngaidam Peilo Suakpa Chu

23Ziaziak hin, van gam chu leng pakhat, a suakte kiang ah a sum thu sukchet gua chu tawh tekhin ahi.

24Chutia, a sukchet pat lim ah chun, mi pakhat talent sîng khat ba a hun pui un;

25piak ding a nei lo phatin a pu chun ama tawh, a ji tawh, a chate leh a nei zosia zuak ah dit dingin thu a pia ta’n;

26zia a suakpa chu a bokkhup ah, a ma-âng in a thûm ta’n: lalpa, ka chung in jangai ham ham in, a leng in hun dit sik sek na’ng ka, a ti’n.

27Zia a suakpa chu, a pu’n a lungsiat ziakin a thâdok ah, a bat zosia le a ngaidam tai.

28Himaleh, zia suakpa ma ma chu a pawt ah, a suak chanpi, ama dangka za khat bapa chu a vaman a, la bat ei dit vak in, ti’n a gawl a mek piak ta’n.

29A suak chanpipa chun, a kengbul ah bokkhup in, ka chung in jangai in, a leng in hun din kit sik sek na’ng ka, a tia.

30Himaleh, a nuam pua’n, a bat a dit zaw masia suangkul in a khum tai.

31A suak chanpi dangte’n a thil hi’chu a mu phât un, khawk a sa ma mau ah; a hung un, a puu kiang in a thil hi’dan chu a hung hiltau a.

32Ziaphatchun, a pu chun a kokit ah, a kiang in, nang suak nunsiapa, nang in lei dot ngut ngut ziak ah la bat zosia ka ngaidam ahi’n;

33ka hun lungsiat gual ah nang inle la suak chanpi chu la lungsiat ding hilo a hem? a tia.

34Tichun, a puu chu a lungna ma ma ta’n, a bat zosia a dit zaw masia gawt dingin, mi gawtte khut in a pia tai.

35Zia gual ah chun, mitin in la lunggil tak ua la suapiteu la ngaidam lo ua leh, ka Pa van ah um inle zia gual ma chun la chung un hun bawl ding ahi, a tia.

Currently Selected:

MATTHAI 18: VAIPBSI

Highlight

Copy