MATTHAI 17

Mêl Danglamna

(Mar 9.2-13; Luk 9.28-36)

1Ni guk zaw in, Peter, Jakob leh a suapi Johan chu, Jesu’n a chuam in tângsâng tak khat in a pui to a.

2A ma-âng un a mêl a hung danglam ta’n; a mai chu nisa gual in a hung vâk ah, a puansilte chu vûk gual in a hung vâm tai.

3Thakhat in Mosi leh Elijah a hung kilâk un, ama tawh a kiho tau a.

4Peter chun Jesu kiang in, Lalpa, eihaw â dingin zia tak ah um hi a nuam hi, lem la sak leh zia tak ah hin bawk pathum sa’ng ka tin, nang â dingin pakhat, Mosi â dingin pakhat, Elijah â dingin pakhat, a tia.

5 # Thl 22.2; Sam 2.7; Isa 42.1; Mat 3.17; 12.18; Mar 1.11; Luk 3.22; Dan 18.15 # 2 Pe 1.17,18 Zia thu chu a gen lai tak in, sum vâm tak hin amau chu a hun lia ah, zia sûm ah kipat chun awgi a hung pawt a: Zia hi ka Chapa doitak, a chung ah ka kipakna ma ma chu ahi; ama thu hi ngai un, a hun tia.

6Nungzuite chun zia chu a het un a lau ma mau ah, a mai ua leitual si’n a bokkhup tau hi.

7Chuleh, Jesu a hung ah, amau a hun khoi ah, tho unla, lau kiu in, a tia.

8A hung dâk dawu leh, Jesu beplo ngal kuama dang a mu ta puau hi.

9Tâng ah kipat a hung suk lai un, Jesu’n, Mihing chapa thina kipat a thaw kit masang sia; zia thil la muu hi, kuama kiang in gen kiu in, a tia.

10 # Mal 4.5 A nungzuite chun, bangtidan ah lekhazikte khan, Elijah hung masa ding ahi, a la tiu a hem? ti’n a dong un.

11Jesu’n a dawnhu, Elijah chu a hung ding him ahi; ama chun bangkim siam gual ding ahi;

12 # Mat 11.14 ka hil la hiu, Elijah chu a hung zo tai, ama chu a la he puau in, a chung ah a nop nop un a la hi zaw tau hi. Zia gual ma chun Mihing chapa hinle a khut uh thuak ding ahi, ti’n a dawnhu a.

13Ziaphatchun, a nungzuite chun Baptispa Johan chung thu a gen ahi, ti a hun he tau hi.

Jesu’n Naupang Thithamat A Sukdamna

(Mar 9.14-29; Luk 9.37-43)

14Mipi lak a hung tun phat un, mi pakhat Jesu kiang in a hung ah, a ma-âng in a bokkhup ah, a kiang in:

15 Lalpa, ka chapa chung ah hin jangai in, ama hi hipût nei ahi’n, a thuak gim ma ma ziang tai; mei leh tui lak ah le ke’lut ziang sek ahi.

16La nungzuite kiang ah ka pui leh la a hi’dam thei puau in, a hung tia.

17Jesu’n, khangthak ginna neilo leh thukhelte haw, bangchan hun umpi nalai ding ka hem? Bangchan a hem ka hun daw zaw nâk lai ding? Ama chu ka kiang in hun pui un, a tia.

18Jesu’n thitha chu a vau a; tichun, a pawt dawsan ta’n, zia naupang chu zia hun ma ma chun a dam ngal tai.

19A nungzuite chun, amau ngawn ah a um phat un Jesu kiang in, aleh, kei un bangatia zia thitha kha nawdok theilo ka hiu em? ti’n a dong un.

20 # Mat 21.21; Mar 11.23; 1 Ko 13.2 Jesu’n a kiang un, La gin zaw lo ziak uh ahi; titakzet in ka hil la hiu, ginna ankam mu tia la nei ua leh, zia tâng kiang ah hinle, zia lam ah son kichawn mang in, tileuchin, kichawn mang mai ding a hi; bangma la hi’theilo uh umlo ding ahi.

21Banghilehle, zia tawhbang hichu, pauchapna leh anngawlna longal in pawtdok pua’n a, a tia. #17.21 zia châng hi I text un a um puai

Jesu’n A Thina leh A Thawkitna Ding A Genna

(Mar 9.30-32; Luk 9.43-45)

22Galili ah a um khawm chiat lai un, Jesu’n a kiang un, “Mihing Chapa hi mite khut ah matsak ah um ding ahi’n; chuleh, that intiu in,

23a ni thum ni’n kaithaw in um in a,” a tia. Zia thu chun a hi’lungkham ma mau hi.

Jesu’n Tempul ah Sia A Piakna

24 # Pdt 30.13; 38.26 Kapernaum khua a tun un, tempul sumdawlte chu Peter kiang in a hung un, La hotupau in tempul Sia hi pesek lo a hem? a hung tiu a.

25Ama chun, pia sek e, a tia. In lam a hung tun phatin, Jesu’n a kiang in, zia thu chu gen masak pen in a hun nei a, Simon, lei ah lengte’n Sia leh sum neina mante hi kua kiang ah kipat a lak sek uh a hem? A chateu ah kipat a hem, ahiloleh midang ah kipat ahi diam ti bang lati ngaitua em? ti’n a la dong a.

26Peter in, mi chuam ah kipat, tia a dawnhu zaw phatin, Jesu’n, achutileh, a chate awl ding a hiu chulam;

27ahi’nla, amau haw hi a lungkimna ding un, nang dil ah vachia’n la, ngakuai vakhai in; sanga la mat masak pen chu a kam keu lechin dangka pani a la um in a; zia chu la’n la, kei leh nang â dingin a kiang un pia’n, a tia.

Currently Selected:

MATTHAI 17: VAIPBSI

Highlight

Copy