MATTHAI 15
15
Têksete Thugosia
(Mar 7.1-13)
1Jerusalem ah kipat in Pharisaite leh lekhazikte chu Jesu kiang in a hung un;
2Bangatia, la nungzuite hin upate thugosia chu botsia a hiu em? An a nêk ding phat ua leh a khut uh sil lo in a neu hi, a hung tiu a.
3Himaleh, ama chun a kiang un, Aleh, nang un bangatia thugosia chu mang ah, Pathian thupiak chu botsia la hiu em?
4 #
Pdt 20.12; Dan 5.16; Pdt 21.17; Thp 20.9 Pathian in, La nu leh pa ja in, ti leh, kuale a nu a hem, a pa a hem hânkhum chu a thi tei ding ahi, ti ahi ngal a.
5Himaleh, nang un, kua’nle a nu a hem a pa a hem kiang ah, leinamatna ding uh hi Pathian kiang ah piak ahi tai, a ti chun, a nu leh pa chu a zâu kul talo ahi’n, zalen ahi tai, la tiu a.
6Nangmau thugosia ziakin Pathian thupiak chu la botsia tau ahi.
7Miphalêmte haw, la chung thuu ah Isai in a la genlawkte hi la sudik ten uh ahi hi:
8 #
Isa 29.13
Zia mite hin a kam un ei chawihoi un:
a lungthim un vang ei gamlat ui.
9Mihing thupiakte chu thugin ah nei dingin a kihil sawn un,
ziaziakchun, ei honau haw hile a thawn mai ahi, ti hi, a tia.
Mihing Subuak Thilte
(Mar 7.14-23)
10Chun, mipite chu a ko khawm ah, a kiang un, ngai unla, hethiam un;
11kam ah lutte hin mihing a hi’buak pua’n, kam ah kipat pawt chun mi a hi’buak sek zaw ahi, a tia.
12A nungzuite chu a kiang in a hung ua, la thugen kha Pharisaite’n a zadau hi, ti la he em? a hung tiu a.
13Ama chun, ka Pa van ah mi phu’ lo thing taphot chu bawdaw ding ahi.
14 #
Luk 6.39
Amau chu ngaisak kiu in; mitthûm te puitu mitthûm a hiu a, mitthûm in mitthûm ma a pui chun, kawkhûk ah ke’lut khawm ding a hiu, a tia.
15Peter chun a dawnhu a, zia tekhinthu chu ei hilchian piak in, a tia.
16Jesu’n a kiang in, Nang unle hethiam nailo la hiu maw?
17Kam ah thil I nêk chu gilpi’n a lut ah, dâilênna hung pawt kit mai sek ahi helo la hiu em?
18 #
Mat 12.34
Kam ah kipat hung pawtte ahileh vang, lunggil sung lam ah kipat hung pawt ahiziakin, zia ngei chun mihing a hi’buak sek hi.
19Lunggil sung ah kipat chun tupgûkna phalo gilonate, tualthanate, ângkawmnate, tatsualnate, gûkchâknate, zuau gennate, mi hêknate leh gensiatnate hung pawt sek ahi.
20Ziate haw hin mihing a hi’buak a, khut sil lo ah an nêk in mi a hi’buak puai, a tia.
Kanaan Numei Pakhat Ginna Thu
(Mar 7.24-30)
21Jesu chu zia kipat chun a pawt ah, Tura leh Sidon bial lam in a chia ta’n.
22Zia gam ah kipat chun Kanaan numei pakhat a hung a, Lalpa, David Chapa, ei lungsiat in; ka chanu thitha’n a man hen, a thuak gim ma ma hi, ti’n a hung kiko a.
23Himaleh, ama chun bangmachân a la dawnhu puai. Chun, a nungzuite a hung ua, zia nu hi I nung un a kiko ko ngal a, sawl mang ziang ta’n la, a hung tiu a.
24Ama chun a kiang un, Israel nam lak ah belam mangte kiang bep ah sawl ka hi, ti’n a dawnhu a.
25Ziaphatchun, numei chu a hung ah, a ma-âng ah a hung khupdin ah, Lalpa, ei panpi in, a hung ti tai.
26Jesu chun, naute vaithum lâkpiak ah, uichate kiang ah piak ziang chu a kilawm puai, ti’n a dawnhu a.
27Numei chun a kiang in, Lalpa, a dik ngei hi, himaleh, uichate’n le a puu dawkân nuai ah annên ketha haw chu a luak sek uh hilam, a tia.
28Ziaphatchun, Jesu’n a kiang in, Aw numei, la ginna a nasa na lawm lawm e! La dawi gual gual in la chung in tung ta hen, a tia. Ziaphatchun, a chanu chu a hung dam ngal tai.
Jesu’n Damlo tam tak A Sukdamna
29Jesu’n zia mun chu pawtsan in, Galili Dil pâm lam a tung a, tâng ah a kal to ah, zia chun a kichu’n.
30Mipi tam tak tawh, kengbai, mitthûm, piangsual, pautheilo leh a dang tampi tawh a kiang in a hungkhawm tau a. Jesu kengbul in a hun pui ua; amau chu a la hi’dam a;
31mipite chun, pautheilote hung paudok ah, piangsualte hung pha kit ta, kengbaite keng ah chia ta, mitthûmte’n muthei ta chu a muu in lamdang a sa ma mau ah, Israel Pathian chu a chawihoi tau ahi.
Jesu’n Mipi Sang li A Vâkna
(Mar 8.1-10)
32Jesu’n a nungzuite chu a ko khawm ah, ziate hi ka lungsiat ma ma hi, ka kiang in ni thum hial a um tau ah, nêk ding bangma a nei pawngal ua; lamkâl in basam kha ding a hiu in, anngawl in la ka chiasak nuam pua’n, a tia.
33A nungzuite chun a kiang in, mipi zia jat jat vâkna ding hi gamthip ah khoi ah la ding I hiu em? a tiu a.
34Jesu’n a kiang un, vaithum bang jat la nei awm? a tia. Amau chun vaithum pasagi leh sanga neu tawmcha a um hi, a tiu a.
35Mipite chu leitual ah kichu dingin thu a pia’n.
36Vaithum pasagi leh sanga chu a la, kipak thu a gen ah, a phelsua ah, a nungzuite kiang in a pia, zia chu nungzuite chun mipi lak ah chun a hawm tau hi.
37A lêng un a nevâ chiat tau ah, a nêkbang uh a hun luak khawm kit ua leh, bawm sagi a hun luak dim kit tau hi.
38A nete chu numei leh naupang sim lo in, piting ngen sang li a hiu hi.
39Chun, mipite chu a sawl mang a, kuang in a chuang ah, Magadan gam lam in a chia tai.
Currently Selected:
MATTHAI 15: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
