MATTHAI 14
14
Baptispa Johan Thina
(Mar 6.14-29; Luk 9.7-9)
1Zia hun lai ah chun, gam vaihawmpa Herod chun Jesu chanchin a la he ta’n;
2a nasemte kiang in, zia mi chu baptispa Johan, a thisa hung hing kit a hiziak ah, zia thilhitheina chu nei ahi, a tia.
3 #
Luk 3.19,20 Johan kha Herod thupiak ah kiman ahi’n, a kân ah, suangkul in a khum ah, a suapipa Philip ji Herodias a la kichenpi ziak ah a la bawl ahi.
4 #
Thp 18.16; 20.21 Johan khan a kiang in, zia nu la kichenpi hi a thiang puai, a la ti ziakin;
5Herod in ama chu thalup nuam maleh, mipite chun jawlnei hi ngei ah a het ziak un, mipite chu a lau a.
6Herod pianchampha a lop niu a hung tun phatin, Herodia chanu chu mipi ma-âng in a hung lâm a, Herod chu nasa tak ah a kipak tâk ziakin,
7a dot taphot piak dingin, a kiang in thu a tiam tai.
8Ama chun a nu thuhilna dungzui in, zia tak ah hin Johan luchang chu kuang in ei hun pia’n, a tia.
9Lengpa chun khawk a sa ma ma ziang a; himaleh, a ankuang uppi te leh a kitiamna ziak ah chun, a thil dot chu vapia mai dingin thu a pia ta’n.
10Suangkul ah Johan um chu a lu vatan dingin mi a sawl tai.
11Johan luchang chu kuang in a hun dom ua, zia naupangnu chu a hung pia tau a, ama chun a nu kiang lam in a chawi tai.
12Johan nungzuite chu a chiau ah, a luang chu a valadok ua, a vui tau hi; chuleh a chiau ah, Jesu a vahil tau hi.
Jesu’n Mipi Sangnga A Vâkna
(Mar 6.30-44; Luk 9.10-17; Joh 6.1-14)
13Jesu’n zia thu chu a het phat in, zia mun chu nusia in gamthip lam in kuang in a kitawl mang tai. Mipite chun a chia mang tai ti a het phat un, zia khawpi’ kipat chun keng in a delzui tau a.
14Lui pang ah Jesu a hung pawt daw phatin, mipi tam tak zia tak ah chun a mu’n, a lungsiat ma ma ah, a natnateu chu a sukdam piak tai.
15Nitâk lam a hung hi’phatin, a nungzuite chu a kiang in a hung un, I umnau hi la gamthip ahi’n, nitâk lam le ahi tangal a; mipite hi sawl mang phot mai in, khuate ah a vachiau ah, nêk ding a vakichawk theina ding un, a tiu a.
16Jesu’n a kiang un, a chia mang uh a kûl puai; nang un a nêk ding uh piau in, a tia.
17Amau chun a kiang in, “Vaithum panga leh sanga pani bep ka nei ui,” a tiu a.
18Ama chun a kiang un, zia chu ka kiang in hun chawi un, a tia.
19Tichun, mipite chu hampa chung ah kichu dingin thu a pia; Vaithum panga leh sanga pani chu a la, van lam a en ah, mal a jawl ah, a balphel ah, vaithumte chu nungzuite kiang in a pia, a nungzuite chun mipite lak in a hawm tau a.
20Tichun, a leng un a ne vâ chiat tau a; a nêk vâl uh chu bawm sawm leh ni a luak dim kit tau hi.
21Zia tak ah mipite chu, numei leh naupang simlo inle piting ngawn sang nga a hiu hi.
Jesu Tui Chung ah Keng ah A Chiana
(Mar 6.45-52; Joh 6.15-21)
22Jesu’n, mipite a chiasak sung in a nungzuite chu Dilgâl langkhat lam in amau ngawn ah kuang ah a la kitawl gâl kâi dingin, a chuansak a.
23Mipi zosia chu a sawlmang zaw phatin, ama ngawn in tâng ah chun pauchap dingin a hang chia a; nitâk a hung hi’phat in, zia tak ah chun ama ngawn in a um zing ta ahi.
24Zia hun ah chun, a kuang uh chu; huipi a hat ziakin tui kinawk chun a hilo lam in a nawk lum let a, Dil lailung in a um tai.
25Jingkal phalvak ding kuan vêl ah chun, Jesu chun tui chung ah keng in a hun zuan a.
26A nungzuite’n tui chung ah keng ah hung chu a la mu un, Thitha ahi, ti’n, lau in a kiko jak tau a.
27Ziaphatchun, Jesu’n a kiang un, lungmuang tak in um un; keima ka hi, lau kiu in; a vak tingal tai.
28Peter chun, Lalpa, nangma la hi’leh la kiang lam ah tui chung ah hung dingin thu ei pia’n, a tia.
29Ama chun, hung ta’n la, a tia. Peter chu kuang ah kipat chun, Jesu kiang lam zuan in tui chung ah chun keng in a chia tai.
30Himaleh, hui hân chu a mu in a hung lau ta’n, tum ding a kisa ta’n, Lalpa, ei hukdam in, ti’n a hung kiko a.
31Thakhat in Jesu’n a khut in a vak man ah, a kiang in, Aw ginna tawmpa, bangatia ginglâ la hem? a tia.
32Kuang sung a hung lut phat ua chun hui chule a thip tai.
33Kuang sung ah umte chun a hun nai ua, Pathian Chapa chu la hi tak tak na hi, a tiu a, ama a be tau hi.
Genesaret ah Jesu’n Damlo A Sukdamna
(Mar 6.53-56)
34Dil gâl langkhat lam a hung tun phat un, Genesaret gam a hung tung tau a.
35Zia gam ah mite het dingin thu a thanvel un; chun ama a hun het phat un, a gam ah damlo zosia chu a hun pui khawm un;
36a puanâk tha mai le sukha dingin a hung don ua; tichun a khoi kha zosia chu a dam tau hi.
Currently Selected:
MATTHAI 14: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
