MATTHAI 13
13
Buchi Tekhinthu
(Mar 4.1-9; Luk 8.4-8)
1Zia ni ma ma chun, Jesu chu In ah kipat chun a pawt a, Dil pâm in a kichu ta’n;
2 #
Luk 5.1-3
a kiang in mipi tam tak a hung khawm un; kuang chung in a kaldok ah, a kichu; mipi zosia chu tiaupho ah chun a ding un.
3Tekhinthu’n thu tam tak a kiang un a gen a, “Ngai tiam un, buchithe’pa buchi the’ dingin a chia in.
4A the’ lai in khenkhat chu lampi pâm in a kia’, vachate a hung ua, a hung luak zo tau hi.
5A khenkhat chu suangsi lei ah a kia’; leipha tam lona mun leh, leipha a sâ lo ziakin, a hung kekdok pai ziang a.
6Himaleh, nisa a hung sat phatin a lei a keu ah, a zung a sau lo ziak in a vuai tai.
7Chuleh, khenkhat chu hampa lingnei lak in a kia’, hampa lingnei chu a hung khang ah, a hun depmang tai.
8Chun, khenkhatte chu leiphatna mun in a kia’, a hung ga ah; a khen khat chu ale’ za khat in, a khenkhat chu ale’ sawmguk in, a khen khat chu ale’ sawmthum in ga a hun sua tai.
9Kuale hetna ding ah nakhang nei chun he tau hen,” a tia.
Tekhinthu A Matna Ziak
(Mar 4.10-12; Luk 8.9-10)
10A nungzuite chu a kiang in a hung ua, Bangatia, ziate kiang ah hin tekhinthu ah la gen a hem? a hung tiu a.
11Ama’n a kiang un, van-gam thugûk hettheina chu nang uh kiang ah piak ahi’n, amau kiang ah vang piak a hinai puai.
12 #
Mat 25.29; Mar 4.25; Luk 8.18; 19.26 Kuale, a nei tam chu piak belap hi’ntin, tam tak nei in a; himaleh, a neilo chu a neisunle lâkpiak hi’n a.
13A kiang ua tekhinthu ka genna ziak chu; munapi’nle a mu chian puau ah, bil ah henapi’nle a hechian ngai puau in, hetle a hethiam puau hi.
14 #
Isa 6.9,10 Isai in a chung thuu a gen kha a guitunna ahi:
La nakhang un he ngei in la tiu in,
himaleh, hethiam pua’n lau;
la mit un mu’n la tiu in,
himaleh, mu chian diak pua’n lau.
15Zia mite lungchang hi a ngong zo ta’n,
a bengteule a ngong zo tai,
a mit uh a sîng un,
achutiloleh, a mit un en in mu kha’n tiu in,
a bil un he kha’n au;
a lungthim un hethiam intiu in;
hung kihei kik kha’n tiu in;
amau a la hi’dam kha’ng ka,
a ti kha.
16 #
Luk 10.23,24 Nanghaw mit vang a hampha ahi; la nakhang uh le a hampha ahi, a hiat thei ziakin.
17Titakzet in ka hil la hiu, jawlnei tam takte leh midik tam takte’n, la thil muteu hi mu nuam in a la thîl ua, himaleh, a la mu ta puau hi; la thil hiatteu hile het a nuam un, himaleh, a la he man ta puau hi.
Buchi Tekhinthu Hilchetna
(Mar 4.13-20; Luk 8.11-15)
18Ziaziakchun, zia buchi the’ tekhinthu hi he tau in.
19Kuale, gam thu chu bil ah he’, hethiam lo chu buchi lampi pâm ah ketha tawhbang ahi. Migilopa chu a hung ah, amau ah chi kitu chu a hung lâkmang piak sek hi.
20Chuleh, buchi suangsi lei ah kekte chu, thu kigen chu a het phat ah kipak tak ah pom ngal;
21himaleh, a lunggil tak ah zung thâksak lo ah, sawt umsak zolote, thu ziak ah sukgentheina bang, haksatna bang a hung um tak leh pûk ziang sekte hi a hiu.
22Chuleh, hampa lingnei lak ah kekte chu: Thu chu he tangal ah, khawvel lungkhamna leh hausaknate etlâna ziak ah, a hetnau suktâk ah um ah ga theilo te chu a hiu.
23Chuleh, lei phatna kekte chu a hiu leh, thu chu he ah, hethiam ah, mang ngalte hi a hiu; ziate chu ale’ zakhatte, ale’ sawmgukte, ale’ sawmthumte’n a hung ga sek ui, a tia.
Butak Lak ah Bulêm Tekhinthu
24Tekhinthu dang khat a gen kit ah: Van-gam chu mi pakhat, a lou ah chipha the’ gual chu ahi.
25Himaleh, mite i-mut kâl in a mêlma a hung ah, a bu lak ah chun bulêm a la the’ piak ah, a chia mang tai.
26A bu chu a hung khanlet phatin, a hung ga ta’n; a bulêm chule a hung kilang tai.
27Louneipa suakte chu a hung un: He pu, la lou ah khan chi pha ngawn la the’ hilo a hem? Zia bulêmte hi khoi ah pat hung kipan a hiu em? a hung tiu a.
28Ama chun a kiang un, Zia chu mêlma’n a la the’ a hita chu, a tia. Aleh, a suakte chun a kiang in, Aleh vachia’ng ka tiu in, vabotdok ziang ing kau aw, a tiu a.
29Himaleh, ama chun, Hilo e, bulêmte la bawdawna lam un, butakte le botdok kha’n lau.
30Bulâk hun masia khati khan um khawmsak tadi mai un: Bulâk hun tak leh bulate kiang in, “Bulêmte kha lakhawm masau inla, hâl dingin a lom lom in kân un: Ziazaw tak chuleh butakte chu bupang ah sunglut un, ti na’ng ka, a tia,” ti’n a gen a.
Ankam Chi Tekhinthu
(Mar 4.30-32; Luk 13.18-19)
31Tekhinthu dang a kiang un a gen kit a: Van-gam chu mi pakhat in ankam mu, a loulai ah a the’ gual chu ahi;
32zia chu thâichi lak lak ah neupen himaleh, a hung khandaw phatin, hampa lak lak ah a lianpen a hung hita’n, thing a hung suak tai; tichun, vachate a hung ua, a bâkte chun a hung chêng tau hi, a tia.
Thawi Tekhinthu
(Luk 13.20-21)
33Tekhinthu dang pakhat a gen kit a: Van-gam chu thawi gual a hi: Zia chu numei khat in a la, changbuang te’na a dim thum lak in a hel ah, a lêng ah a zen suak masia a koi gual hi ahi, a tia.
Tekhinthu Matna Ziak
(Mar 4.33-34)
34Zia thute zosia hi Jesu’n mipite kiang in tekhinthu’n a gen a; tekhinthu lo in a kiang un bangma a gen puai.
35 #
Sam 78.2
Jawlnei in zia thu a la gen hi a guitunna ahi:
Tekhinthu gen na’n ka kam ka’ng ka tin,
khawvel kisiam lim ah kipat,
thil a la kisêlgute chu gendok ing ka, a ti kha.
Bulêm Tekhinthu Hilchianna
36Ziaphatchun, Jesu’n mipite a nusia ah, In sung ah a lut ah, a nungzuite a kiang in a hung un, “Lou ah bulêm tekhinthu kha ei hilchian in,” a hung tiu a.
37Ama chun, Chipha the’pa kha Mihing Chapa ahi’n;
38lou chu khawvel ahi; chiphate chu gam chate a hiu in; bulêmte chu migilo chate a hiu hi.
39Mêlma a la the’pa chu diabol ahi’n, bulâk hun chu khawvel tawpna chu ahi; a âtte chu vansawlchâkte a hiu.
40Tichun, bulêmte a lakhawm ua mei in a hâl ui; zia gual chun khawvel tawp hun leh um ding ahi.
41Mihing Chapa chun a vansawlchâkte sawldok intin, a gam ah kipat in migilote leh mi gitlosakte chu hun lakhawm intiu in;
42hâltuina mei ah pai in au; zia tak ah chun kâ leh hagial um ta’n a.
43Ziaphat chuleh, midikte chu a Pau gam ah nisa gual in vâk ta’n au. Kuale hetna ding ah nakhang nei chun he tau hen, a tia.
Tekhinthu Pathumte
44Van gam chu lou ah go phumguk gual ahi kit hi: Zia chu, min a mu’n, a sêlgu, kipak tak in a chia ah, a nei zosia zuak in zia lou chu a chaw tai.
45Van gam chu sumkawlvei mi, suang mantam hawlpa gual chu ahi kit hi;
46ama’n suang mantam man pha tak khat a vamu’n, a chia ah, a nei zosia zuak in a chaw tai.
47Chuleh, van-gam chu tuisuagiat ah lên kisep, sanga chitin khu’khum gual chu ahi kit hi.
48Zia chu a dim tak leh lui pâm ah a kaidok un, a kichuu ah, sanga takte chu a bawm ah a khum un, a taklote chu a paimang ui.
49Khawvel tawp hun tak leh le zia gual chu hi’n a; vansawlchâkte hung intiu in, mi phate lak ah kipat chun mi phalote hun zendok ding a hiu.
50Haltuina mei ah chun pai intiu in, zia tak ah chun kâ leh hagial chu um ta’n a, a tia.
Sumkol A Lui leh A Thak
51Jesu’n a kiang un, Zia thute chu la hethiam nau em? a tia. Amau in, ka hethiam tau hi, ti’n a dawnhuu a.
52Ama chun a kiang un, Chuti ahileh, lekhazik ah pang hingal ah van-gam thu ah nungzui a hung um tapo chu, Inneipa a gobawm ah thil lui leh thil thak suadok sekpa gual chu ahi, a tia.
53Jesu’n, zia tekhinthute chu a gen zaw phatin, zia mun chu a nusia tai.
Nazareth ah Jesu Nol ah a Umna
(Mar 6.1-6; Luk 4.16-30)
54Ama umna gam lam a hung tun phat ah chun, a kikhopna In un thu a vahil ah; a thu ngaitha zosia chun mak a sa ma mau a: Zia pa hin zia pilna leh zia gual thil lopi takte a hi’theina hi khoi ah kipat a mu a hem?
55Zia hi thingbawl thiampa chapa kha hilo a hem? A nu le Mari kiti kha hilo a hem? Chuleh, a suapite le Jakob, Joseph Simon leh Juda kitite kha hilo a hiu em?
56A suapinute le I kiang un a um sik sek uh hilo a hem? Khoi ah kipat zia thilte zosia hi a mu ahi diam? a tiu a;
57 #
Joh 4.44
tichun, a chung ah a lung himaw tau a; himaleh, Jesu’n a kiang un, Jawlnei chu ama gam leh a In lam ti bep lo ah chun chawihoi lo in a um ngai puau hi, a tia.
58A ginlo ziak un zia tak ah chun thil thupi dang bangma a bawl ta puai.
Currently Selected:
MATTHAI 13: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
