LUKA 6:27-49

Himaleh, ka thu ngaithate haw, ka hun hil la hiu, la mêlmateu chu hepi in bawlphau in. Nang uh hun hosiate chu maljawl unla, a hun simmawte chu pauchap piak un. La biang langkhat bêngte kiang ah chun a langkhatle dawu in; la puanâk hun lâkpiak kiang ah chun la puanâk chung a lak dingle zada diak kin. La thil nei hun don tapo chu pia’n la; la thil hun lâkpiakte kiang ah chunle don kit ta kin. Min la chung ah a hi’ding ua la dawi gual tak in, mi chung inle bawl un. A hun hepite bep la hepiu leh pakchâkna bang a hem la law ding uh? Migilote’n le amau hepite chu a hepiu ahi. Chuleh, la chung ua thilpha bawlte chung bep ah thilpha la bawl ua leh, pakchâkna bang a hem la law ding uh? Migilote’n le zia gual chun a hisek ui. Mu’kit ding la kinepnateu kiang bep a thil la batsak ua leh, pakchkna bang a hem la law ding uh? Migilote’n le a ngaima mu dingin mi gilote kiang in a batsak sek ui. Himaleh, la mêlmateu hepiu inla, a phatna ding uh bawl un, mu ding kinem lo hial in thunglâksak un; tichun la kipakman ding uh chu thupi intin, Chungnung penpa chate hiding la hiu; ama chu kipakna châng helote leh mi nunsiate chung inle a jangai thei ma ma ngal a. La pau a jangai gual in nang uh le jangai un. Mi gensia kiu in, tichun, gensiat in um pua’n lau; mi thiamlo chansak kiu in; tichun, thiamlo chang pua’n lau; ngaidam un, tichun ngaidam in um in lau. Piau in, tichun nang uh le piak in um in lau; phatchuamngai tak ah te’piak in, a sawt ah sawnchak in, a law ah lawchak in, a dimlêt hial in la ângsung ua sun piak in um ding la hiu, mi la te’piaknau ngai ma a chun nangmaule te’piak ah um ding la hiu, a tia. Chuleh, tekhinthu dang le a gen a, “Mitthûm in mitthûm ma a pui thei em? Kawkhûk ah ke’lut khawm talo ding a hiu em? Nungzui chu a pu sângin a lopi zaw ngai puai; himaleh, a thiam kim phat leh a pu gual in hung um in a. Nangma mit ah thingbong um a hi’lam helo ah, la unau mit ah ki’dak them neucha um chu bangti muthei la hem? Nangma mit ah thingbong um chu mu lo in la unau kiang ah, ‘Unau, la mit ah ki’dak them um chu hun lakdaw piak ing ka’ bangti’n tithei ding la hem? Nang, miphalêm, la mit ah kipat thingbong chu ladok masa’n la, tichun, la unau mit ah kipat ki’dak them um chu ladok dingin muchian thei ta’n la,” a tia. Thingpha him him ga sia’n a ga ngai pua’n; thing siale ga pha’n a ga ngai diak puai. Thing tin a ga ah a kihe mai sek hi. Kuama’n lingkung ah theichang a lo ngai puau in; theimi kung ah kuama’n grep ga a lo ngai diak puau hi. Mipha chun a lungthim gobawm pha ah kipat chun thilpha a hun suadok sek hi; chuleh, migilo chunle a lungthim gobawm gilo tak ah kipat chun, thil gilo ma a hun suadok sek hi; lungthim ah dimlêt chu kam in a hun gendaw sek ahi ngal a. Ka thugente jawm lo ah bangatia: Lalpa, Lalpa, ei ti la hiu em? Kua a hem ka kiang ah hung ah, ka thugente he ah, jawmte chu bang gual mi a hiu em ti hun etsak ing ka: Ama chu Insa mi, thûk tak cho ah, suangpi det tak chung ah suangphûm lem gual chu ahi. Tui a hung lêt tak leh zia In chu tui in hat tak in a hun khaw ah; himaleh, pha tak ah sak ahi ziakin a hi’lîng zo puai. Himaleh, ka thu ngaitha ngal ah jawmlote chu, suangphûm umlo ah piaunêl chung mai mai ah Insa gual ahi; tui hat in a hun khaw ah, a pûk pai ngal tai; zia In siat dan chu a huaisia ma ma hi, a tia.