NASEPTE 27

Rom Khua lam Zuan ah Paul Zinna

1Itali lam ah ka chiana ding chu sukpûk a hung hi’phatin, Paul leh suangkul ngak khenkhatte chu, Augastas pawl ah sepai zahotu, a min Julias kitipa khut in a kolsak tau a.

2Tichun, Adramitiam Long in ka lut ua, Asia gam jul ah chun ka kitawl ua, Makedonia gam Thessalonika khaw mi Aristarka le ka lak un a pang a.

3A jing ah chun Sidon ah ka bâng malam un; Julias chun Paul chu a bawlpha ma ma ah, a lawite tawh kive tua thei ah, kisuhal tua sek thei dingin a phal piak a.

4Zia tak ah kipat ka kitawldaw kit phat un, thigua a hât ziakin Kupra tuikual gam nuai lam in ka kitawl ua.

5Kilikia leh Pamphulia gâllam ka kitawl kai phat un, Lisia khawpi Mira ka tung ua.

6Zia tak ah chun sepai zahotu chun Aleksandria Long pakhat Itali lam zuan ding a vamudok ah, zia sung ah chun kei uh chu ei chuansak tau a.

7Ni tam tak chu awl awl in ka kitawl ua, a tawp in, haksa tak in Naida khawpi ka tung ham ham un; hui hât tâkluat ziakin, ka zotnau chu zang tak in ka zuan thei puau a; tichun, Salmoni zawn ah Kret nuai lam tak in ka kitawl pek ua.

8Haksa tak ah kitawl pek in, a tawp in Fair Haven a tiu, Long Cholmun Hoi, a tiu Lasia khua kiang naicha um chu ka tung tau hi.

9Chun, ni tam tak a lut tâk ziak leh, Long ah chia a lau um tâk ziakin, Anngawl ni chu a kikhêl hial phatin, Paul in amau chu a hil a;

10a kiang un, “Pute haw, tu chung ah I khual zinnau hi haksa tak leh siatna nasa tak tuak ding I hiu, a Long leh a vante bep hilo in, eimau hinna natiangle lau um ah um ding I hiu, ti ka hia’i,” a tia.

11Ahiziakin, sepai zahotu chun a Long neite leh a Longpute chu taksang in, Paul thugen sâng ah chun amau thu chu a mang zaw ta.

12Zia Long cholna mun chu phalbi lai ah umna ding ah a lemchân lo ziakin, a tam zaw te chun kipatdaw vak a vaisawm ua; bang a hem ti khat ah Phoinik tun tei tei a guau ah, zia tak ah chun phalbi sung um malam ding a kingaituau a. Zia chu Kret gam, Long Cholna mun khat a hia, mal sak leh tum sak ngatua ahi.

Tuisuagiat ah Thigawpi

13Simlam hui awl awl in a hung hâng ah, a tup gual ua hung um ta dingin a kingaituau a; zia tak ah chun hât deu tak in Kret gam jul in a tawl suk tau a.

14Himaleh, hun chomlokâl sung in, hui hât tak in a hung hâng pan ta’n, zia chu mallam Hui (Euroklidon) a tiu chu a la hi’n.

15Ka Long uh chu a hun mût khak phatin, ma lam in a tawl zo ta puau ah, ka mawk thâzan ziang ua leh, ei tok ei tok ta mai a.

16Chuleh, Kauda a tiu tuikual gam neucha lia lam in ka kitawl un, haksa tak in kuang neu ka man ham ham ua.

17Zia chu a kaidaw phat un panpina khaute a mang tau a; Long nuai lam chu a kân kîmvêl ua, Sirtis piaunêl lak ah kitawl lut kha’n ah ti’n, puanjak khainate chule a lathau a; tichun ei mawk taw taw ziang tai.

18Thigawpi’n ei sukgim bêk ziakin a jing in long sung ah vante chu a paitha pan tau a,

19a ni thum ni’n Long vante chu amau khut ngei in a paitha kit tau a.

20Ni tam tak sung chu nisa leh aksi him him a kilat tâk lo phatin, thigua’n ei daidawp lo ziakin dam ah pawt daw ding him le kinep a um ta paw hial a.

21An nelo ah sawt tak um ka hi tak ziak un, Paul chu a lak un a dingdok a, “Pute haw, Kret tuikual ah khan ka thu awi leu chin zia gual siatna leh manna hi I chung un tung lo ding hive’n,

22ahi’n, tu’hin thamuang tak ah um dingin ka tîl la hiu; la lak un kuama’n la hinnau mansua pua’n lau, Long hi ahileh vang mangthai in a.

23Tu’jan ngei ah khan, ka Pathian leh ka ho sekpa vansawlchâk ka kiang in a hung ding a,

24ka kiang in, ‘Paul, lau kin, Lengpa Kaisar âng ah ding ngei ngei ding la hingal in, Long ah la chuan khawmpite zosia hile Pathian in a vênbit ei tai,’ ei ti hen.

25Ziaziakchun, pute haw, thamuang tak in um un; Pathian chu ka ging ah, ka kiang ah a gen chu guitung ding ahi.

26Tichun, khoitak tuikual gam a hem in gâl kâi ngei hitiu,” a tia.

27Adria tuisuagiat ah thigawpi’n ei tok lum let ah, jan sawm leh li a tin jan khang lai in Longpute’n mualkâng nai ta dingin a gingchau a.

28Tui thûk lam chu a teu ah, lâm sawmni ahi’n; sawt lo sung in a te’ kit ua leh lâm sawm leh nga ahi nalai ah.

29Suangphom lak ah ei taw lut khâk ding a lau ziak un, Long mei lam in Long tuktânna pali a khiau ah, khawvak ka ngâk tau hi.

30Longpute chun Long lu lam ah, a tuktânna khia ding gual ah thep ah, kuangneu chu tuisuagiat ah khiak ah, taisan a guat phat un,

31Paul in sepai zahotu leh sepaite kiang in, “Ziate hi Long ah a um zing lo ua leh suakcha pua’n lau,” a tia.

32Ziaphatchun, sepaite chun kuangneu gui chu a âttan tau ah, a thâsuak tau hi.

33Khawvak ding kuan in, Paul chun mi zosia an ne dingin a sawl ah, “Bangma nelo ah anngawl ah la mawk um ziang uh tu’ni hi a ni sawm leh li ni ahi tai.

34Ziaziakchun, an ne dingin ka sawl la hiu, la damna ding uh a hi; la lak ua kuama’n samzang khat ziang le mansua lo ding la hiu,” a tia.

35Zia a gen zaw ah chun vaithum a la, a leng ua ma ah chun Pathian kiang in kipak thu a gen ah, a phel ah, ama’nle a ne tai.

36A leng un a thamuang tau a, an a ne chiat tau hi.

37(Zia long sung ah um zosia chu mi za ni sawmsagi leh guk ka hiu hi.)

38A nêk zaw phat un, Long sukjânna dingin a gehu buteu chu tui lak in a septha tau hi.

Long Siatna

39Khua a vak phatin, a gam chu a hepuau a; himaleh, a kiang ua naicha’n se’pho a muu ah, zia chun Long chu a kitawldok ziang thei khak leh a tiu a.

40Tichun, Long tûktânna chu âttan in tuisuagiat in a nusia tau a. Zia chu tawh kuang japna kânna chu a phel ua, a ma lam puanjak chu hui mut thei dingin a khai to un, se’pho lam chu a zuan tau a.

41Ahiziakin, tuizangkhau pani kisuktuana’n ka lût khau ah, Long chun lei a suta’n; Long lulam chu a tâng ta; khoilîng but lo in a um tai, a mei lam chu tui kinawk a nasat ziakin a kêk ta’n.

42Sepaite chun suangkul ngâkte chu tui zap kâi in tai mang kha’n au ti a lau ziak un tha a gaw tau a;

43ahiziakin, sepai zahotu chun Paul chu hukhin a nop ziakin, a thil ngaituau chu a khâm a. Tuizap thei tapo tuisuagiat ah chawmtha, mualkâng a la kâi masa ding leh,

44a dangte chu thingpêk chung leh Long sia hal chung ah te kâi dingin thu a pia. Zia gual chun ka leng un mualkâng chu dam tak in ka gâl kâi chiat tau hi.

Currently Selected:

NASEPTE 27: VAIPBSI

Highlight

Copy