NASEPTE 28
28
Malta Tuikual Gam ah Paul Tunna
1Dam tak ah mualkâng ka gâl kai phat un, tuikual gam chu Malta ahi ti ka he tau a.
2Zia gam mite chun ei mu phât un, pha tak in ei la khawtuau a. Gawzuk ziakin a dap ten ah, mei a hun sêm ua, mitin in ei la lop ua.
3Paul chun thing lom khat a chom ah, mei lak ah a vak ti leh, a sat phatin gûl pakhat a hung pawt ah, a khut in a kikhâi ziang ta.
4Zia gam ah mite chun a khut ah gûl kikhâi chu a mu phât un, “Zia pa hi tualthat hi ngei ngei in ah; tuisuagiat ah kipat suakcha leh le, phuba lapa chun a hin ding a phal ma ma lo hi’n a,” a tiu a.
5Himaleh, ama chun mei lak in a thingtha, bangma a ti him him puai.
6Ahi’n, amau chun a gu’n a jel suak phat leh thakhat ah kipuk intin, thi ziang in ah, ti gingchan a la en zing ua; himaleh bang chan a hem a et nung unle bangma a ti him him ta pua; a ngaidan uh chu a hung kisâng ah, pathian khat hi’n a, a ti tau a.
7Zia tuam vêl ah chun, zia gam ah mi minthang pakhat lou gam nei a um a, zia pa min chu Publias ahi; ama chun ei la lop ma ma ah, ni thum sung chu kipak tak in ei zintun a.
8Publias pa chu khawsik leh santen vei in a um a. Paul chu a kiang in a valût ah, a pauchap ah, a chung in a khut a nga, a hi’dam tai.
9Zia thu chu a het phat un mi dang le a hung ua, zia gam ah damlo hung taphotte chu sukdam in a um chiat tau a.
10Amau chun nasa tak in ei jau ah; ka kipatdaw kit ding phat ua chun, ka mamaw thilteu chu ei piau a.
Rom Khua Paul Tunna
11Tha thum nung ah chun Aleksandria Long pakhat, phalbi sung a la châm, pathian kiphîk tepte’na nei Long ah chun ka chuang ua, ka kipandok kit tau a.
12Zia kipat chun Sirakius ka tung ua, ni thum ka châm malam kit ua.
13Zia kipat chun ka kitawl kit ua, Rhejiam ka kitawl tung tau a. Zia zaw ni khat nung ah chun simlam hui a hung hang kit ah, a jing in Puteoli ka tung ua.
14Zia tak ah chun unaute ka muu ah, a kiang un ni sagi nichuang dingin ei tho un. Tichun, Rom ka tung tau hi.
15Zia tak ah chun unaute’n ka umdan uh a het phat un, zia kipat chun Appia Vaihawmna mun leh Khualbûk Pathum tiang ah ei dawn dingin a hung tau a. Paul in zia haw chu a mu phât in Pathian kiang in kipak thu a gen ah, a lungmuang tai.
16Rom ka tun phat un, Paul chu sepai pakhat a vêng ding a guat chuam uh chu tawh, a nop dan dan ah umsak dingin a phal piak tai.
Rom ah Juda mi Lamkaite Kiang ah Paul in Thu A Gen
17Chun, ni thum zaw in Paul chun Juda upate a ko khawm a. A hung khawm phat un a kiang un, “Suapite haw, mipi siatna ding leh, dan lo gual leh I pu leh pateu dan thu bawsiatna ka neilo sapi’n Jerusalem ah kipat Rom mite khut ah suangkul ngâksa piakdaw in ka um a.
18Amau chun pha tak ah ei dawpchet nung un, ka thina ding hial bangma a hepuau ah, ei thâ daw le a nuam un.
19 #
Nas 25.11
Himaleh, Judate’n a nialkãl ziak un, Lengpa Kaisar kiang tutsawn dingin ka kisa ta’n; zia hi ka chipite ka hêkna vang ahi puai.
20Zia ding ah hin ka hun ko khawm la hiu hi, eimau I kimutuau ah I kihotua theina ding un; keima hi Israelte kinepna thu ziak ah thik khau ah kân ka hi bep hi,” tia.
21Amau chun a dawnhuu ah, “Nangma chungchâng ah hin Judea gam ah kipat lekha ka la mu puau a, unaute a hung sunte’n le nang demna thu bangma a gen kha puau hi.
22Himaleh, tu’hin, la ngaidan khenkhat hetnop um ka sau hi; zia pawlte chanchin hi a gensiatnau ka la hekha sek ngal un,” a tiu a.
Paul in Rom ah Thu A Genna
23Ni a tiam tau ah, zia ni chun a tunna In ah mi tam tak a hungkhawm tau ah. Jingkal ah kipat nitâk tiang in zia thu chu a hilchian ah, Pathian gam thu chu gen in, Mosi Dan leh Jawlneite lekhabu thu ah kipat in, Jesu chungchâng ah thuzaw a gua’n.
24A khenkhat in a thugen chu a gingchau ah, a dangte chun a gingcha puau a.
25Tichun, a kithutuak theilo phat un, a peljak masang un Paul in thu kam khat a gen a, Thagau Thiangtho in jawlnei Isai mang ah la pu leh pateu kiang ah a la gen kha a dik ngei hi:
26 #
Isa 6.9,10 Zia mite kiang ah hin chia’n la, a kiang un:
Het chu hia’n la tiu in,
himaleh, hethiam thei pua’n lau,
mu chu mu’n la tiu in,
himaleh, muchian tak tak diak pua’n lau.
27Zia mite lung hi a la tâk ta’n,
a bil uh a la ngong ah,
a mitteu le a si’ng un,
achutilo leh a mit un mu’n tiu in,
a bil un hia’n tiu in,
a lung unle he ta’n tiu in,
kihei kit intiu in,
Keima’n a la hi’dam kha ding ka hi, ti hi.
28Ziaziakchun, zia hi he tau in, zia Pathian hukdamna hi Jentelte kiang ah sawl a hita’n, amau chun a la ngai ta’n au, a tia.
29Zia a gen zaw phat ah chun Judate chu a peljak tau ah, nasatak in a kinial tau hi#28.29na hi Ms khen khat in a um puai.
30Tichun, Paul chu kum ni sung hial chu ama In kisân in a um ah, a kiang ah mi vachia kha tapote chu a la lop sek a,
31a kiang un Pathian gam chanchin leh Lalpa Jesu Khrista chanchin umjia chu hangsan tak leh a dâl umlo in mite a zilsak sek tai.
Currently Selected:
NASEPTE 28: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
