NASEPTE 26
26
Agrippa Ma ah Paul Thugen
1Agrippa chun Paul kiang in, “Nangma chung thu la kigen ding phal a hi,” a hun tia. Ziaphatchun, Paul in a khut a jak ah, ama chung thu a gen a:
2Lengpa Agrippa, Judate hêk ah ka umna thu ah, nangma ma-âng ah ka chung thu gen thei ding ah ka um ziakin ka kipak ma ma hi;
3Judate lak ah dan lam leh zia tawhbang thubuai lam ah hin thiamna bîk tak nei mi la hi, ti ka het ziak inle ka kipak zaw diak hi; ziaziakchun, gunchu tak ah ei ngaithâk piak dingin ka hun ni hi.
4Ka chipite lak leh Jerusalem khua ka chanchin zosia chu a kip a kawi in ka naupan lai ah kipat Juda mite zosia’n a hechiat tau hen.
5 #
Nas 23.6; Php 3.5 Gen nuam hileu chu, I sakhuau ho leh biak lam ah kulmut ma ma leh, Pharisai mi ka hi dan le hun sawt tak ah kipat khan ei la he zo tau ahi.
6Tu’hin, Pathian in I pu leh pateu kiang ah a la tiam chu, keima’n ka la kineppi tâk ziakin zia vaihawmna ma ah hin ka din khawlaw ta a hi;
7zia thutiam chu I nam sawm leh ni pateu khan a kinep ziak un, Pathian chu a sun a jan in a la ho tau a. Zia kinepna ziak ah chun ahi, Lengpa Agrippa, Judate hêk ah ka um khawlaw hi!
8Pathian in mithite a kaitho kit hi, ti hi bangatia ginchâk um salo la hiu em?
9 #
Nas 8.3; 22.4,5 Keima’nle Nazareth Jesu min kãl lam thil tampi bawl le ka la gua hen.
10Zia gual chun Jerusalem ah ka la bawl ta’n; chun, thiampu lalte kiang ah thuneina la’n, mithiangthote lak ah mi tam tak suangkul ah ka la khum sek ah, a tha guat lai unle a thiu lemsa lam in ka la pang sek a.
11Chuleh, sunagog tin in ka gawt sek a; Jesu chu gensiatsak ka gaw hâm hâm sek ah; a chung un ka gitlo ma ma ziakin, gam dang khawpi tiang inle ka vadel zui sek hi.
Paul in A Pianthakna Thu A Genna
(Nas 9.1-19; 22.6-16)
12Tichun, thiampu lianpente phalna leh thuneina la’n, Damaska khua’n ka chia a;
13aw lengpa ngai tiam in, sûnchang lai tak in, keima leh ka kitonpite kîmvêl tuam ah chun vâk nasa tak mai, nisa sâng ah le vâk zaw hial in van ah kipat in ei hun khaw suk phut a;
14ka leng ua leitual ah ka kipûk chiat phat un, Hebrai pau in, Saul, Saul, bangatia ei sugenthei la hem? Sutna thikzum sui chu nang â dingin a na zaw ahi, a hun ti’n.
15Keima’nle, Lalpa, kua la hem? ti’n ka dong a. Lalpa chun, La sukgenthei Jesu chu ka hi.
16Ahi’n, tu’hin tho inla, la keng in dingdok in; thil ka hun hiatsak tâkte leh ka hun hiatsak kit dingte hiatsak ding leh ka nasem ding ah hun siam dingin, ziaziak tak ah chun la kiang ah hung kilâk ka hi.
17Jentelte leh la mipite lak ah kipat nang hun hukdok ding ka hi; amau lak ah chun ka hun sawl la hingal a;
18a mit uh hi’vâk ding leh, thim lak ah kipat vâk ah pui lût ding leh, Setan thilhitheina kipat Pathian lam ah pui ding leh, a gitlonau ngaidam a hung hiu ah, keima ah um ginna sukthian ah umte tawh golua ding ah pui dingin, ti’n ei hun dawnhu a.
Paul in A Thugen A Hilna
19Ziaziakchun, aw Lengpa Agrippa, zia van ah kipat kilâkna chu nial thei ding gual ka la hita puai;
20 #
Nas 9.20,28,29 a lim ah Damaska khua umte kiang ah; zia nung ah chun, Jerusalem khua umte kiang ah leh Jentelte kiang tiang inle, gitlo haisan tak tak ah, thilpha a bawl ua, Pathian lam ah a hung kiheina ding un ka hil zaw sek ta ahi.
21Ziaziakchun ahi, Judate’n tempul ah ei man in, tha ei guatnau hi.
22Himaleh, Pathian panpina dong in, tu’ni hin la âng ah dingin, milian leh mineute kiang ah thu gen thei nalai in ka um ah, ka thugen chu Mosi leh Jawlneite’n thil tung ding a gen sekteu tilo chu bangma dang ahi diak puai:
23 #
1 Ko 15.20; Isa 42.6; 49.6 Zia chu, Messiah chun thuak ngei intin, ziazaw chuleh, a mipiteu leh Jentelte kiang ah vâkna thu chu a taklat theina dingin mithite lak ah thawkitna mapui ah pang ding ahi, ti thu bep hi a hi, ti’n a gen a.
Paul in Agrippa Chu Jesu Ging Ding ah A Dotna
24Ama chung thu zia tawhbang ah a hun gen ziak ah chun, Festa chun, aw ngai tak in, “Paul, la ngaituana mansua la hi tai maw! La zil tamna’n a hun su’ngol ta ahi hilam!” a tia.
25Himaleh, Paul chun, ja’um pen Festa, ka ngol him him puai. Pilna lam thu, thu tak kichian tak chu ka gen zaw ahi.
26Lengpa chun, zia thute chu a het ziak ah ipnei lo hial ah ka gen ahi; zia thilte hi dâikilkâl ah thil um ahi pua’n, ziaziakchun, a gûk thim ah mi thuzaw ah um ah, zia tawhbang thute hi gen le ka hi pawngal in.
27Lengpa Agrippa, Jawlneite thugen haw hi la taksang em? La taksang hi ti ka hia’i, a tia.
28Agrippa chun Paul kiang in: “Hun sawt lo cha sung ah Khristian ei hi’sak ding gua la hi maw?” a tia.
29Paul in, sawt in sawt lo leh nang bep le ka ti puai, tu’ni ka thu ngaitha zosia le kei gual ah um dingin Pathian kiang in ka don ahi, kol haw hi vang but khel lo in, a tia.
30Zia thu chu a gen zaw in, lengpa chu a dingdok ah, gam awppa tawh Barnisia tawh a kiang ah kichute haw zosia,
31a chia chiat phat un, a kiho ua, zia pa hin thina leh suangkul tânna khop bangma a hi’khial pua hilam, a tiu a.
32Agrippa chun Festa kiang in: zia pa hin Kaisar kiang ah a thu tutsawn ding tilo leh vang pawt daw sak ziang thei hiding ahi hilam, a tia.
Currently Selected:
NASEPTE 26: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
