NASEPTE 25
25
Paul in Kaisar Kiang ah Tut A Dotna
1Festa chu zia gam vaipua a pan nung ni thum zaw in, Kaisaria khua kipat chun Jerusalem ah a chia to pai a;
2thiampu lalte leh Juda puitute chun a kiang in Paul chungchâng chu a sia lam in a tut pai un.
3Jerusalem ah hun pui dingin a lungsiatna a don ua. Lampi ah chân ah tha a guat uh a hia.
4Himaleh, Festa chun, Paul chu Kaisaria ah a um tâkdi ding a hi dan leh ama le chia kit pai ding ahi dan a gen piak a.
5A kiang ua chun, “Ama chu a diklo tak tak ahileh, la lak ua thunei deu deu khenkhat hung suk unla hung hêk un,” a tia.
6A lak ua ni giat a hem, ni sawm a hem vel a châm nung in, Kaisaria lam in a chia suk kit ta’n; a jing ah chun a vaihawmna chutpha chun a kichu, Paul chu hun puidok dingin thu a pia.
7A hung tun phatin, Judate ama hêk ding ah hungte chu a kîmvêl in a hung ding ua; Jerusalem ah kipat hungte chun Paul chung thu ah hêkna tam tak a gen ua; ahiziak in, a genchetna tak tak ding a nei thei puau a.
8Paul in a chung thu’n a dawnhu ah, “Judate dan leh, tempul leh Lengpa kãl in bangma ka bawl puai” a tia.
9Himaleh, Festa chun Judate lung lam a hawl ziakin, Paul kiang in, “Jerusalem lam ah chia to ah, zia tak ah chu la chung thu ka ngaitua zawk la nuam em?” a tia.
10Paul chun, “Lengpa ma-âng ah ding zaw’ng ka; ka chung thu genna ding mun chu zia tak chu ahi ngal a. La het tâksa gual in, Judate chung ah hin bangma ka hi’khial puai.
11Thil hi’khial tak tak ka hi ah, thina ding hial ah gitlona nei ka hi chun thi le ka nial puai; himaleh, tu’ ei hêknau haw ah hin ka thiam lona bangma a mu puau ah, ziaziakchun, kuama’n amau khut in ei pia thei pua’n au. Lengpa kiang tung zaw ding ka hi,” a tia.
12Festa chun a vaihawmpite ngaidan a dot zaw in, a kiang in, “Lengpa kiang maw la tun zawk ding? Lengpa kiang ah chia ngei in la,” ti’n a dawnhu tai.
Festa in Agrippa A Dotna Thu
13Ni bang jat a hem nung ah chun Festa ve dingin Lengpa Agrippa leh Barnisia chu Kaisaria ah a hung un.
14Zia tak ah chu ni tam deu tak a um ziak un, Festa chun, lengpa kiang in Paul chung thu a hun gen lang a: “Mi pakhat Felik in suangkul ah a nutsia malam a um in;
15Jerusalem ah ka vachia leh, thiampu lalte leh Judate lak ah upate chun ama hêk ah thalup a nop dan uh chu ei la hil un.
16Himaleh, amau ka dawnhuna chun, ‘Rom mi a thina ding tiang hial ah hêk ah um, a hêkte tawh kimaitua ah a thiamna thu a gen zaw zet masang ah, a thina ding ah a hêkte khut ah piakdaw ziang chu dan ahi puai,’ ka la ti’n.
17Ziaziakchun, a jing ma ma vâigei lo hial ah a hung ua, a thu chu a gen theina ding un, vaihawmna chutpha chun ka kichu ngal ah, zia pa chu hun pui dingin thu ka pia.
18Ama hêkte a hung din phat un, ka ginchak gual in a hêkna thuteu chu lâk thei ding um in ka hepua’n;
19a hêkna thuu a gen thei sun uh chu amau sakhaw thu ah, ‘Jesu kiti chu a thi hen a thokit tai,’ ti Paul in a gen ziak bep a la hi’n;
20zia tawhbang dotna thu ah hin ama nop dan bangma ka hetlo ziakin, Jerusalem lam ah a thubuai vagen ding ah a nop leh nop lo ka dong a.
21Himaleh, Paul chun Lengpa Augastas kiang lam ah thu tutsawn a nop zawk tâk ziakin, Kaisar kiang lam ah ka sawl thei masang ah um dingin ka khum tadi mai hi,” a tia.
22Festa kiang in Lengpa Agrippa chun, “Keima’nle zia pa thugen chu ka ngaitha nuam na e!” a tia. Ama chun, “Jing leh ngaitha thei in la,” a tia.
Agrippa Ma ah Paul Dinna
23Tichun, a jing ah chun Agrippa leh Barnisia chu lopi tak in a hung ua, thugenna In ah chun a lut ua; sepai hotuliante tawh, khua sung ah mi lopi deu cheng tawh a hiu a; Festa in Paul chu a hun pui lûtsak a.
24Festa chun, “Lengpa Agrippa leh zia tak ah hungkhawm zosiate haw, zia pa la mu ngei uh hi, ama hi ahi Jerusalem leh zia Juda mipite’n ka kiang a hun tut ua, hing tâk hi talo ding khop hial ah a kiko khum pau chu.
25Himaleh, ama hin thina ding tiang hial in bangma a hi’khial ka mu puai. Ziaziakchun, ama ngei hin Lengpa Augastas kiang lam ah thu tutsawn a nop ziakin, ama hi zia lam ah chun sawl ka gaw zaw ta ahi.
26Zia lo ah chunle, ama chung thu ah hin tu’ni tiang in I Lengpau kiang ah vak zik ding ka hethei nai puai. Ziaziakchun, ama hi la mau ah ka din sak ah; aw Lengpa Agrippa, nangma ma-âng ngei ah hin ka dinsak ahi, pha tak in dawpchian inla, ziazaw chuleh zik ding ka nei thei khâk leh;
27suangkul ngak pakhat, a hêkna thuu gen ding neilo hial ah um ziang ding chu thil um ding dan hi’n ka hepaw ngal a,” ti’n a gen a.
Currently Selected:
NASEPTE 25: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
