Salmai 9
9
Hö-öinyö Ngam Tēv Kūö Ngam Lanöökö Ò
1Keuheūt tö ellōnre chin min ha-öiny ngam Mā Tēv: ha-meuknyö nup pinngangkūö chin min vahīṙen meh.
2Ṙāmölōn chin min, tö nöinyö ngam minë-eny meh: Ō më-eṅ lamātulöng.
3Yē yip lā-al chu nö hapung tö ukre: kavē-ĕre cha-a lëlngö inrē nö i kūö meh.
4Pò meh ṙapkö ngam chanīpö chu, ngam chööḵnyö chu inrē: Ūichhak më-eṅ el kan-tēre, chīpö ṙô kahôka.
5Vëkö vē pumnāmö tarik më-eṅ piyāingö vē tötlöök më-eṅ: ngaich man sichngö minë-q eny cha i tö-örheūheu.
6Öt ōtre min ngam tökunyaha elmat, öt ōtren cha-a nö i chūökre nö urāḵngen: nup elpinnāmen tiṙōlngö meh, payāyi öp kanöpölōn tö u.
7Örheūheu an ngam Mā Tēv nö ūichhaka nö sā rācha: halēn ngam kantēra re an nö im inkaha.
8Chīpen min ang-aṅ nö akah fālen ngih panam: im chaniplen an min nö kahòk-ken vē tarik.
9Tömarô-òl kui an ngam Mā Tēv, chūök chamônga, lanaklö yip töhakihtuṙen: tömaṙô-òl kui chūök chamô-nga hē el kanihngen.
10Hayönglenre min nö in meh yip tö-akahakūö tö minë-eny meh, Mā Tēv: pò meh öt ṙāngen cha yip chamöhö meh.
11Tiköknyö nöinyö ngam Mā Tēv, ngam mi-iyöng Siyòn: vë-eny nang yip tarik tö nup la-en ò.
12Pò ngòh mahatönken mahām nö köpölōn tö u: öt vaichngö an tö ṙô yāich nö peuiny.
13Ō Mā Tēv, aheūkölōn tö chu; ngëichkö kanihngen chu, tī yip tösumrīk tö chu, më-eṅ chamitlen chu ṙā-ang nup kinpaha.
14Hòṅ chu hameuknyö nup nöinyö meh, i kūö nup inkūp ngam kikānö kūön Siyòn: ṙāmölōn chin min i ngam tī meh inyööken.
15Chaṙipköti yin vē pumnāmö tarik nö el öp anūlö vahī cha: el öp inhāl ulāitö cha nup kalröön cha nö vönngö.
16Vītenre an ngam Mā Tēv nö akahaiṙen, akah fālen an: ngòh tötlöök tingöpngöre nö i nup vahīten minë kuntī ò.
17Havantöre ön min ngòh tö-tlöök nö el chūök kupah: ṙòkhöre yip pumnāmö tarik tövaichngö tö ngam Tēv.
18Pòn öt hō nö örheūheu nö vāchiṙen ngòh töhāṅten: öt rēhĕn öp maheūṅkkö ngam yāich nö payāyi nö örheūheu.
19Ō Mā Tēv, choholre; un mihôiṅ ngam tarik: hökngen vē pumnāmö tarik nö kahòk-kaṙen nö i kūö meh.
20Ō Mā Tēv, pinëṅken cha: hökngen vē pumnāmö tarik nö akahalōn töre nöng tarik.
Currently Selected:
Salmai 9: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
