Salmai 10
10
Invëkö Kinṙòklö Kui
1Ō Mā Tēv, kūöyôm marôvat sökhaka: kūöyôm hanyatngöre hē el nup kanihngen?
2Lūḵ ngam yāich an ngam inkeūlen ngam tötlöök: hökngen cha yĕh nö kô-òng-vah tökūö nup vahīṙen cha tömilichngen lōn cha.
3Pò ngòh tötlöök nö eū-eure nö i nup lōnre: pò ngam yamikhanga nö hakôlöngṙô, hôṅ, ötlēka elnang ngam Mā Tēv.
4Ngö ṙô an ngam tötlöök i inkeūṙökūöre: Öt havëkö e an min, öt Tēvu umuh, ngö ellōn an.
5Ngëḵ nup talöökö ò nö örheū-heu: marô-òl chūök nup inkaha fālen aṅ in meh tö mat ò; luföökūöre anga-aṅ nö in yip kumnyah elmat re.
6Ngö ṙô an nö ellōnre, Öt hanlöinyken chin min: öt ip kumnyahṙen chin min örheūheu i tumkölchap.
7Tööḵlö elvāng an tö ötlinëkô, michīl inrē, inkihten inrē: elkatòh litāk ò öp töchōich, öt lanöökö inrē.
8Ūichhaka an nö i tuhēt el chūök mahayun, el nup tö-ruptu anga-aṅ nö kumpah töt akahaṙa: ulāikö matre an nö ngëichken öp töt-hōluṙen.
9Sā lāyön nö el chūökre, nö el öp ranuptö kui re, hayun yip yāich an nö hulalhaka: ngaich kē öp yāich anga-aṅ yĕn ngaich nö haṙöihöt ò nö el inhāṅlre.
10Fātngöre an, sōnngöre: ngaich ngam yāich nö fukngö tö kūö kumlēḵ ò.
11Vaichngö an ngam Tēv, ngö anga-aṅ nö ellōn re: hanyat-ngö kūöre an; öt hētu an min nö meūkö e.
12Ō Mā Tēv, choholre; Ō Tēv, hachônglö këlre Man: um vaichngö tö yāich.
13Kūöyòh aich vē tötlöök nö mināich tö ngam Tēv: nö ngö ṙô nö ellōnre, Hö-ö man lōnu tö e?
14Meūkö e man; pò meh meuk tötlöök, kumnyahṙen inrē, ngaich kē-ĕ e me-eṅ eltīre: kētöre yip töt hōluṙen nö in meh; hamòlṙen kūönyōich man me-eṅ.
15Likölngö takeun kël ngam tötlöök man: ip tötlöök pöri tarik, chöh öp ötlanöökö ò hanöngsaha meh öt kanô-tuvökūö.
16Höng tö-örheūheu an ngam Mā Tēv nö Rācha: lëlngö yin vē pumnāmö tarik nö i kūö öp panam ò.
17Mā Tēv, ngaich man hang tömöi: halēn ellōn cha man min, hāngö tī man min tö ngam elnangre.
18Kahòklö kui kūönyōich, tö-hakihtuṙen inrē: hòṅ ngam tarik ngam aṅ ngih panam nö öt angëtachōich.
Currently Selected:
Salmai 10: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
