Salmai 89
89
Tinkökö Hēḵ El Kanihngen Panam
1Örheūheu chin min Ha-öiny miṙēlōn ngam Mā Tēv: ing elvāng re ṙô chin min mikahtölōn yip tumkölchap tö ngam kanô-en Meh.
2Pò chu ngö ṙô. Örheūheu an min ngam miṙēlōn nö mānlöngö: haköpiyö min ngam kanô-en Meh nö el halīöngö.
3Vītö kinlēḵngô chin inrē atöllö chu: kilēḵngôre chin in Tāvit öp kūön chu,
4Örheūheu öp kūön Meh min nö köp tö tī chu: ngaich vīlö ngam kantēra Meh in yip tumkölchap nö ṙòkhöre.
5Ō Mā Tēv, ha-öiny nup tī Meh pinngangkūö min ngam halīöngö: ap kanô-en Meh inrē nö in yip tö mūl aṅ i yip töhet.
6Achīö ap el minë taṙul tökô nö ṙongta nö im Mā Tēv, tö sā ngam Mā Tēv?
7Yöng pinhe-eṅkūö An ngam Tēv, nö i manūlö yip töhet: tö pahe-evö inrē nö mötlö tö cha yip mahavīlen Ò.
8Ō Mā Tēv, Tēv yip tö maṙôngö, achīö ap tömihôiṅ nö tö sā Meh Ō Yāh: havīlen Meh inrē ngam kanô-en Meh!
9Hayōm ngam inkeūlen ngam mai Man ngaich: yē minë mahūṅvö nö sëònglöre, ngaich pichöömtö u Me-eṅ.
10Pinyënyö Aikup Man ngaich, nö sā pôḵ fanël: pirātngö yip lā-al re Man ngaich Öm aṅtī tö ngam kël minhôiṅyö Meh.
11Me-eṅ Meh nun minë halīöngö, Me-eṅ Meh ngam tumlat inrē: vahī tö Meh ngam panam, tö minë tanööḵlö e inrē.
12Vahī Meh ngam kapā, tö ngam lòhngö inrē: ṙāmölōn ngaich Tāpōr, Harmòn inrē nö i mine-eny Meh.
13Aṅhaṅv in Man tö kël minhôiṅyö; tö kalēḵ an ngam kël Meh: tulöng inrē ngam lāhāmö Meh.
14Kanô-en, inkaha inrē, rööntö ngam kantēra Meh: urēhĕkūö Meh ngam miṙēlōn, kanô-en inrē.
15Tökôlò yip tarik yip tö akahakūö tö ngam römpĕt ṙanāmölōn: Ō Mā Tēv, lök i hanātö kūö Meh yin nö kiröönngöre.
16I mine-eny Meh yin nö ṙāmölōn irô-òtö sakāmö: i lanöökö Meh yin nö hapōilöngö.
17Pò Meh Me-eṅ ineū-euṅ ngam kumlēḵ cha: hapōilöng min në sinrōl ih, tökūö lōn Meh tö ih.
18Pò ngam lanaklö ih nö aṅ im Mā Tēv: ngam töhet aṅ in Israĕl inrē nö Rācha ih.
Kinlēḵngô Ngam Tēv Nö In Tāvit
19Ngaich cha-a min nö ṙô tö tö meūkö nö i yip töhet, nö ngö ṙô: Hakeunlen Ò chin tö ngam hinòlṙen ngam tökalēḵ; hĕngtak hapōilö chin, ngam tö atöllöng aṅ i yip tarik.
20Ngaich chin kôtökūö töp kūön re Tāvit: hacham elkui Ò chin ngaich tö ngam töhet tavī-i.
21In Ò an ngam eltī chu min nö köp: hangëken Ò min ngih kël chu.
22Öt angëṙö chanökhutī min ngam lā-al ò nö in ò: öt rēhĕn min ngam kūön tötlöök nö hakihten ò.
23Foh yip lā-al ò chin min urēhĕkūö Ò: aṅtī tö eltīre inrē fatākö cha yip tö sumrīk tö ò.
24In ò pöri ngam kanô-en chu, tö ngam miṙēlōn chu inrē: i mine-eny chu min inrē ngam sinrōl ò nö hapōilöngö.
25Ṙātö tī Ò chin min inrē nö el mai: el nup töhël inrē lāhāmö Ò.
26Ngaich ngö ṙô Anga-aṅ nö in chu: Me-eṅ Man Yöng chu, Tēv chu, ihong chu, inyöölen.
27Vīten Ò chū-ö inrē nö lanòh chu: tö marô-òlchūök tö yip rācha ngih panam.
28Köp min ngam miṙēlōn chu nö in ò nöng örheūheu: ngam kinlēḵngô chu in Ò panta nö in Ò.
29Vīten ap kūön Ò chin min nö köp nö örheūheu: öp kantēra Ò min inrē nö sā nup sakāmö el halīöngö.
30Yē yip kūön Ò nö ṙāngö ngam chöngö chu: öt lök ngam inkaha fālen nö in chu;
31Yē cha nö hachōichngö në chöngö chu: öt haköp minë inchöngten tö chu inrē.
32Ngaich chū-ö min chöhkö nup tanôichngen cha öich aṅtī tö tinluh: ap tökööl cha inrē aṅtī tö finôhò.
33Öt keuheūtngöre pöri min ngam miṙēlōn chu nö kē-ĕyö nö ṙā-ang in ò: öt rēhĕn nö halöngiṙen ngam kanô-en chu nö öt kô-òl kui.
34Hö-ö chin min hachōichngö ngam kinlēḵngô: öt rēhĕn nuk tö ngaich nö löknyö elvāng chu nö haṙī-ingre.
35Hĕngheuh chū-ö chūöku ṙô im hanëtö re: öt hō öich minyôiny in Tāvit.
36Örheūheu ap min kūön Ò nö köp: ap kantēra ò inrē min sā ngam tavūöi nö i kūö chu.
37Örheūheu ap min nö köpngö sā ngam chingëṅt: sā tökô-en inrē mameuk el taṙul.
Mirivlōn Tö Öt Kanô-ò Ök Rācha
38Ngaich pöri Me-eṅ kavalhanga inrē: līn Man im tö hachāmö kui tö Meh.
39Sōḵo ngam kinlēḵngô ngam kūön re Man: hachōichngö ngam sapīöv Ò nö el tumlat.
40Ngaich Man tiṙōlngö ngam kinlonglö ò: tiṙōli nun minë tö ngëḵ chūök Ò tö tī Meh.
41Ṙòkhöre yip lamök umuh nö hachōichngen Ò: ngaich an nöng minṙēngö nö i yip hol ò.
42Hachônglö ngam lāhāmö kël Meh: lā-al ò man ngaich: ṙòkhöre yin më lā-al ò nö ṙāmölōn tö tī Meh.
43Hôṅ, havāngi lā-al keūtö an ngam sanët ò tö Meh: öt vīten ò Me-eṅ nö sökhaka nö im kinyūngö.
44Ötköp ök yanāngö ò tö tī Meh suktu inrē ngam kantēra ò tö Meh nö el tumlat.
45Hacheū-euyö nuk sakāmö inyālö tö Meh: kahūmiyö An tö Meh tö sumrōngkūö.
Invëkö Ṙinānyö
46Ō Mā Tēv, i ṙôktören Öm min hanyatngöre, höng örheūheu: i ṙôktören ngam linīnö Meh min nö hūkūö sā tameūyö?
47Ō köplölōn tö kun rôta në ṙētak chu: suh aich vē kūön tarik vahī-il Meh nöng chanök alaha!
48Achīö ap anga-aṅ tarik tö aṅ min, töt mameuk kinpaha: öp ṙamānyö nômö re nö ṙā-ang i minhôiṅyö ngam anūlö?
49Mā, Isuh nuk miṙēlōn Meh urĕh: nuk tö kilē-ĕyö tö Meh in Tāvit, im kanô-en Meh?
50Mā, köpölōn tö minṙēngö vē kūön Meh: keun në minṙēngö chin tī vē tö kalēḵ tarik, nö el ranôṙö chu.
51Ō Mā tēv, në minṙēngö Meh tī vē lā-al chu: në minṙēngö, röön ngam hacham kui Meh, tö cha.
52Tökôlò An yēḵ ngam Mā Tēv: nöng örheūheu. Āmen, Āmen.
Currently Selected:
Salmai 89: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
