Salmai 73
73
Linūönyö Līpöre
(73–89)
Mikah ngam Tēv
1Kô-en An ngam Tēv nö kôlò tī tö Israĕl: in yip töhëtö ellōn.
2Ngaich pöri chū-ö: höng öhngen minë kunröön chu: öhtö taleūsi vanāngö chū-ö.
3Pò chu kunyahaṅ elmat tö töyaha ṙô: hē chu meuk kanôlò tötlöök.
4Pò cha nö öt chanöku, i kinpaha cha: köp pöri öp kumlēḵ cha.
5Hö-ö yin nö sā kanihngen tahëng tarik: öt rēhĕn nö lëlngö nö sā tahëng tarik.
6Lökten ngam inkeūlen nö sayōk nö i likeun cha: kahumngen cha ngam chanökhuṙen nö sā hilā.
7Chilöl minë mat cha tö alaha re: meutnyi nup chanöh ellōn cha.
8Mināich cha-a, im öt lanöökö re, ngaich nö ṙô inkihten: marô-òl chūök ṙô yin.
9Haköp tö kūö elvāng re chā-a, nö lā-al minë halīöngö: ngaich nup litāk cha nö lök el ngam tumlat.
10Lökten yip tarik Ò nö havan nö ihih: ngaich öp töhĕng mikōpö mak nö öthëny tö kūö cha.
11Ngaich ngö ṙô chā-a, sitih mikahlōn Ang ngam Tēv? Akaha Ang ngam Lamātulöng?
12Yĕh meuk, chā-a yin vē tötlöök; kūö cha nö tö-örheūheu nö i lanööṙen: ngaich ṙūölöre kanôlò chā-a.
13Kô-en chin chök alaha halööklö ellōn re: ngaich söichngö tī re öt hòṅ akah tökööl.
14Öt hĕnghang sumkam chin halëli: chöken örheūheu tö peuheū.
15Yē chu ngö ṙô, Ngö ṙô chin min: michūṙen inlaha chin i tumkölchap vē kūön Meh.
16Hē chu piṙūtkö mikahngenre tö e: ngaich kalē-ĕ chanökö angū-ö nö in chu;
17Hanöng saha chu chuh el ngam töhet chūök ngam Tēv: öich piṙūtngen öp kanô-en cha.
18Kô-en Man ṙāten cha i chūök tötakeūsa: kuringten cha Man i öt inkôlò.
19Sitih aich nö payāyi nöng öt rô-òtuṙen: keuheūtngöre yin tö kūö pinhe-eṅkūö.
20Sā heūvö tö anahen: ngatī Ō Mā, yē Meh hareutlöre, öt kūöngen tö nyat cha.
21Pò chu haṙivlōn: ngaich lòklöre el rahēḵ chū-ö;
22Öt akaha chin, pōihangṙen höng sā töṙeūla chin i kūö Meh.
23Iṙūhen pöri chū-ö in Meh: ṙapkö lahāmö chu Më-eṅ.
24Hachōkūö chu töp inlēnö aṅ in Meh: ngaich kē-ĕ chu unôich im kanôlò Meh.
25Achīö öp chū-ö chu el halīöngö, tön höng Më-eṅ: öt hĕngtak ing panam tösā Meh nö lōn chu.
26Öt kalēḵngôre ngih alaha chu, ellōn chu inrē: ngam Tēv pöri kumlēḵ ellōn chu, minchööḵö nöng örheūheu.
27Yĕh meuk, pò cha nö öt kôlò min vē tömarôvat tö Meh: ngāchövah tī Man tö cha yip ṙamāngen Meh.
28Tölöök pöri angū-ö nö in chu öich ṙūötöre im Tēv: vīlö ngam Mā Tēv chin nö innyatlö chu, hòṅ chu vënyö nup vahīṙen Meh nö ṙòkhöre.
Currently Selected:
Salmai 73: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
