Salmai 72
72
Vinë-elkui Rācha
1Kētö ngam inkaha aṅ in Meh im rācha, Ō Tēv, ngam lanöökö Meh inrē, im kikōnyö kūön rācha.
2Kahòkken vē tarik Meh anga-aṅ, nö im lanöökö ngam yāich meh inrē nö hol tö inkaha.
3Kumtö lanāmö nun në rôngö min nö i vē tarik: në rung inrē, nö i lanöökö.
4Kahòkken vē yāich tarik An min, hayööken vē kūön töiyāich An min: ngaich likölngen cha min nö panyeny yip mahakihten.
5I rô-òten ngam tavūöi yin min nö pa-ekūö tö Meh: ane inrē i saha rô-òten ngam chingëṅt, i tumköl chap.
6Sā chinhūṅtö kumṙah yanīhi An min nö i kui kiyôp tö kamöpö: sā öp kumṙah ṙamös ngih panam.
7Kôlò min yip tölöök ip sakāmö Ò: pōyen min inrē lanāmö: hanöng saha ngam chingëṅt nö öt ōtren.
8Minā-av An min inrē, vinngö nö im mai: löktökūö ngam tahël, söl manā-angkūö ngam panam.
9Cha-a yip mi-iyöng el tönyalnyi min, sōntöre nö i kūö Ò: kurak el tumlat min yip tökunyahaṅ elmat tö Ò.
10Kumtö raneushö Ò min yip rācha aṅ Tarsis, aṅ nup kun panam inrē: kētö raneushö min yip rācha aṅ Sīpa, aṅ Sepā inrē.
11Hôṅ, ṙòkhöre yip min rācha nö afukngöre nö i kūö Ò: ṙòkhöre pumnāmö tarik min nö lök la-en Ò.
12Pòn ṙānyö yip tö-iyāich min Anga-aṅ: yip pameuinyhökūö Ò; yip yāich inrē töt hōluṙen.
13Aṙē-ĕlōn An min tö yāich, tö-iyāich inrē: ngaich hayöölen nômö tö-iyāich min Anga-aṅ.
14Kēnyö nômö cha An min ṙā-ang im inkihten, chanökhuṙen inrē: tölöök min nup mahām cha nö i kūö Ò.
15Ngaich aṅ min acha-a; ngaich Anga-aṅ min nö kē-ĕvkūö tö humlum aṅ Sīpa: ngaich tarik min nö vë-ekūö Ò nö iṙūhöṙô; hakôlò Ò min cha-a nö öt hĕnghang sumkam.
16Tëḵ min nup sāiny nö ing panam, i kui minë rôngö; sā Lepanön nup ṙòng nö kayīna: ngaich yip aṅ el pinnāmen min nö kôlò, sā kiyôp ngam tumlat.
17Köp min öp minë-eny Ò nö örheūhu; iṙūhen ap minë-eny Ò min sā rô-òten ngam tavūöi; in Ò min vē tarik nö kôlò: töṙāmölōn min Anga-aṅ tö ṙô pumnāmö tarik.
18Tökôlò An yēḵ ngam Mā Tēv, ngam Tēv Israĕl: ngam töng hĕngtak nö öt tī tö pinngangkūö.
19Örheūheu inrē yēḵ ngam mine-eny Ò nö kôlò: tööḵlö ön yēḵ ngih panam nö ṙòkhöre tö kanôlò Ò. Āmen. Amen!
20Ngö tölngö nun minë vinë-ekūötēv ṙô Tāvit, ngam kikōnyö kūön Yēsī.
Currently Selected:
Salmai 72: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
