Salmai 71
71
Ṙô Tököiny Yĕn Vë-ekuötēv
1Ō Mā Tēv, in Meh chin hayönglenre: uh chin yēḵ hētu sirōngkūö.
2Ṙānyen chu im lanöökö Meh, kēnyen chu inrē ṙā-ang el kanihngen: asītö elnang re in chu, hayööken chu inrē.
3Ihong Man yēḵ elyöngö chu, chūök chu iṙūhen iyöngtöre: kētö chöngö Man ngaich hayööken chu; pò Meh ihong chu, chūök lanaklö chu inrē.
4Ō Tēv chu, kēnyen chu ṙā-ang eltī ngam tötlöök: ṙā-ang eltī ngam töt chiplen, töt milēḵṙen inrē tö tarik.
5Ō Mā Tēv, tön Më-eṅ Man maheūṅkkö chu: löktö kūö nyinī-öṅ chu, Më-eṅ inyönglö chu.
6Löktökūö el chūök kanūönö chin öich ṙapka tö Meh: Më-eṅ Man kamënyen chu ṙā-ang ellōn öp yöng chu kikānö, hòṅ iṙūöhen öp nöinyö Meh tö chu.
7Pinngangkūö tömaṙôngö chin: Më-eṅ pöri töngëḵ innyatlö chu.
8Tööḵlö elvāng chin min tö nöinyö Meh: hol tö ngam ineū-euṅ Meh inrē, öt hĕng hang sumkam.
9Uh chin yēḵ kavāli ip hē re köiny: uh öich ṙā-ayö yē chu ngaich chūhu kumlēḵ.
10Pò vē tökunyahaṅ elmat tö chu nö kakken chu: acha-a vē hamöng ngih nômö chu, holre nö halēn lōnre;
11Nö ngö ṙô, ṙā-ayö an tö ngam Tēv: fachūran, kē an; matön öt hĕng tak ṙamānyö.
12Ō Tēv, uh Man marôvat tö chu, hēṙen holṙen chu.
13Hökngen cha nö sirōngkūö, kā-ayö inrē yip tö kunyahaṅ elmat töng nômö chu: hökngen cha nö kahūmi tö minṙēngö, yip chamöh chanökö chu.
14Iṙūhen pöri chū-ö meūka: ṙūölöṙô re inrē ha-öinyö Meh.
15Vënyö lanöökö Meh min ngih elvāng chu, öt hĕng hang sumkam, ngam inyööken tī Meh: pò chu öt akahalōn tö ṙôken u.
16Yih chin min hol tö kumlēḵ ngam Mā Tēv: kakkö ngam lanöökö Meh chin min, Öm höng Më-eṅ.
17Ō Tēv, löktö kūö nyinī-öṅ chu Man ngaich haköpten chu ngaich chin vë-eny minë pinngangkūö vahīṙen Meh.
18Hôṅ, yē chu ngaich köṅny, pakū-uvkui inrē, Ō Tēv, uh chin yēḵ ṙā-ai: hanöng saha chu vënyö kumlēḵ Meh in yip tahëng, tumkölchap ngam kumlēḵ Men, in yip mu-unôichngöre yanihih.
19Ō Tēv, latulöng an ngam lanöökö Meh inrē; Më-eṅ tökeuheūten tö tökiröng la-en: Ō Tēv, achīö ap tö sā Meh?
20Pōyen hameukti Man tö tökiröng kanihngen ngaich ha-aṅhaṅ ih min hēk: ngaich hēk min kēlen ih ṙā-ang lataṙeū töm tumlat.
21Ṙūötö ṙôkö chu: havantöre hēk, haṙamlōn chu.
22Ha-öinyö Meh chin min inrē i ṙô ranöng, Ō Tēv chu: ngam kanô-en Meh; tiköknyö nöinyö Meh chin i ṙô hārap. Ō Më-eṅ töhet i Israĕl.
23Ṙāmölōn në minuh chu min yē chu tiköknyö nöinyö Meh: ngam nômö chu inrē, ngam töhavaha tö Meh.
24Öt hĕng hang sumkam ṙô ön ngih litāk chu, nö kakkö lanöökö Meh: pò cha nö ngaich nö sirōngkūö, pò cha nö ngaich nö ötkôlò, yik chamöh chanökö chu.
Currently Selected:
Salmai 71: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
