Salmai 59
59
Invëkö Kumchikṙen
1Ō Tēv chu, ṙānyen chu ṙā-ang i yip tökunyahaṅelmat tö chu: tumlönglen chu tö yip chamôhòlre nö lā-al chu.
2Ṙānyen chu ṙā-ang i yip töla-evṙen tö tötlöök: hayööken chu, ṙā-ang i yip tö yal tö mahām.
3Yĕh meuk, tön ṙōlhak yin, hayun ngih nômö chu: hamūlöre yin vē tökalēḵ nö holre nö lā-al chu; Ō Mā Tēv, öt kūö chu fāluṙen, öt kūö tökööl chu.
4Öt fāluṙen chū-ö, fal cha-a nö halēnöre: chōholre Më-eṅ yēḵ holṙen chu Öm Ngëicha.
5Më-eṅ, Ō Mā Tēv yip töma-ṙôngö, Tēv Israĕl, chöhkö vē pumnāmö tarik: Um aṙē-ĕlōn tö yip tötlöökö la-en.
6Havan yin tö harap, sā ṙënṙô am cha-a ngaich: kiröön ngaich nö havī el ngam pinnāmen.
7Yĕh meuk, tö cha nö löklö elvāngre vanöökö, sanët minë i minuh cha: Achīö ap hamang Ngö ṙô cha-a.
8Ō Mā Tēv, hayīölngen cha pöri min Më-eṅ: ṙòkhöre yip min pumnāmö tarik nö aṙē-ĕv tö tī Meh.
9Ō kumlēḵ chu, hökken meh chin min: pò ngam Tēv nö tö marô-òl kui nö tanang-lö chu.
10Urēhĕkūö chu An min ngam Tēv tö-aṙē-ĕlōn tö chu: halöngten chu An ngam Tēv öich meuk lōn re i yip tö kunyahaṅ elmat tö chu.
11Uh yin nö fëli, hôn öt vaich-ngö vē tarik chu: pirātngen cha ip minhôiṅyö Meh, tum-ṙeūten cha inrē, Ō Mā, lanak-lö ih.
12Kūö tökööl, elvāng cha, kūö ṙô minuh cha inrē, hökngen cha nö kô-òngvah i inkeūlen cha: ötlinëkô, minyôiny-aṅ inrē.
13Keuheūtngen cha im lanīnö meh, keuheūtngen cha nö öt ōtren: mikahtölōn cha tö ngam Tēv nö hayöng nö in Yāköp, söl i manāngen ngih panam.
14Ngaich hökten cha nö havan tö harap: hökngen cha nö sā ṙënṙô am ngaich havī ngam el pinnāmen.
15Keuheūt chūökö cha-a min nö kuvankö nya-aṅkūö: hĕng mitööm chā-a ngaich nöng ngöh yĕn öt kô-òngkūö.
16Tikökngö ngam kumlēḵ Meh pöri min chū-ö, hôṅ, pōitô chin min tikökngö ngam miṙēlōn Meh tö peuheū: pò Meh ha-ëhelen tananglö chu, innyatlö chu ip sakāmö kanihngen.
17Ō kumlēḵ chu, löö in Meh öp min nöinyö tiköknyö chu: pò ngam Tēv nö tömaṙô-òl kui tananglö chu, ngam Tēv tö-aṙē-ĕlōn tö chu.
Currently Selected:
Salmai 59: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
