Salmai 57
57
Invëkö Hinòlṙen
1Aheūkölōn yēk tö chu, Ō Tēv, aheukölōn yēḵ tö chu; tön in Meh ön ngih nômö chu nö hanyatlöre: hôṅ, el katòh nyat minë sanëòk Meh chin hanyatlöre, hanöng saha në kanihngen nö chööḵngö kui chu.
2Peuinyhökūö ngam Tēv chin min, ngam tölngö tötulöng: ngam Tēv mahateungngö nup la-en re nö in chu.
3Ṙā-ang el halīöngö tī An min nö söömhöti, hayööken chu inrē; yē öp tö hòṅ ngeūkten chu min nö miyëḵṙen: sööm-tö ngam miṙēlōn re An ngam Tēv, ngam kanô-en Ò inrē.
4Holtöṙah layön ön ngih nômö chu; hulalhak chin holtörah yip tö tōttukūö nö i kūö tameūyö: yip tarik; kapah tö kūö vöi, chòk inrē; sanët öp litāk cha nö tökeut.
5Ō Tēv, hapōilöng Man yēḵ, lātulöng tö minë halīöngö: hökngen ngam ineū-euṅ Meh nö i kui ngih panam nö ṙòkhöre.
6Halēn inhāṅl röön chu yin; sapōnköti ön ngih nômö chu: ul insuk yin nö urēhĕ-kūö chu: ngaich fuk ël e cha-a.
7Ō Tēv, köp ön ngih ellōn chu: tikökṙôre chin min, hôṅ, tikökṙôre chin min tö nöinyö.
8Hachohlö ngam ineū-euṅ chu; hachohlö ngam ranöng tösömö inröt, tö ngam hārp inrē: chū-ö min inrē chōholre ka-euilökūö.
9Hol yip tarik chin min ha-öinyö Meh, Ō Mā: ha-öinyö Meh chin min; tikökṙôre chin min ha-öinyö Meh, hol yip pumnāmö tarik.
10Pò ngam miṙēlōn Meh nö kiröng söl el halīöngö: ngam kanô-en Meh inrē, söl el minë taṙul.
11Ō Tēv, hapōilöng Man yĕh tulöng tö halīöngö hökngen ngam ineū-euṅ Meh nö tu-löng tö në panam nö ṙòkhöre.
Currently Selected:
Salmai 57: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
