Salmai 50
50
Tökò-en Vinë-ekūötēv
1Ṙô-òvö an ngam Mā, ngam tökiröngö chöngö Tēv: havëkö ngih panam, löktökūö maneutlö ngam tavūöi, söl im maneuttö ò.
2I Siyòn ngam Tēv nö meūkö: nö teūngö vanāyö.
3Yih an min ngam Tēv hī, öthō nö chēvhakaṙen: urēhĕ kūö ò min öp tameūyö töṙāpngö kūö, payavlöng min inrē öp tökalēḵ chanô-chö nö havīlen ò.
4Lātulöng min anga-aṅ nö ha-vëkö ngam halīöngö, ngam panam inrē: pòn hòṅ kahòk-ken yip tarik min anga-aṅ.
5Hamūl yip töhet chu nö in chu: yip kumlēḵngôre nö in chu nö lökten i tökētuvö.
6Ngaich minë halīöngö min nö vë-eny lanöökö ò: pò ngam Tēv nö anga-aṅ kam-hôka.
7Ō tarik chu, hangihtöre, ṙô-òv chin min: Ō Israĕl hameuk-höti chin min in meh; chū-ö chin Tēv, Tēv meh.
8Öt vëken meh chin min tö kūö nup tökētu tö meh: öt rēhĕn tökūö nup tö-örheū-heu töföngö tökētu tö meh.
9Öt hòṅ kēḵ kōiny nuā chin min ṙā-ang i patī meh: öt rēhĕn kōiny pököre ṙā-ang i manūlö u.
10Pòn ṙòkhöre nup töṙeūla el-inchōn nö chū-ö chu: nup nuā i kui minë tököṅnyu rung inrē.
11Akahakūö chin tö nup hayöm nö ṙòkhöre i kui minë rôngö: chū-ö chu nup inrē hanchōn töṙeūla el ngam kahôyö.
12Yē chu öre kapahare, öt hō öich vë-eny nang meh: pòn chū-ö chu ngih panam, nup tanööḵlö e inrē.
13Kā alaha kōiny nuā öich min: hēk öp mahām pököre hòng?
14Kē-ĕkūö ngam Tēv tap nöi-nyö tökētu: kētö ap tö-chūöku ṙô meh kilēḵngôre im Lamātulöng;
15Ngaich havëken chu hē el kanihngen: ṙānyen meh chin min, ngaich hapōilen chu min më-eṅ.
16Ngö ṙô pöri ngam Tēv tö ngam tötlöök: Asuh ap la-en meh vë-eny minë chöngö chu, öm kēḵ ngam kinlēḵngô inrē nö elvāng meh?
17Yē meh tösumrīk tö inköp-höti: kamvalngö ngam ṙô chu öm lā uk re.
18Meuk mu-ulāiyö më-eṅ ngaich hō öm in ò: hanôltöre inrē më-eṅ i ma-asēhha.
19Kētö elvāngre me-eṅ: ngam litāk meh inrē nö vī inchīlö.
20Ūichhak më-eṅ, ngaich chō-chö ṙô töp hanönglöknyö re: vë-eng nang öp kūön öp yöngre më-eṅ kikānö.
21Anū-ö nun inlahen meh, ngaich höng öt ṙô-òv chū-ö: ngö lōn më-eṅ ngaich tö chu öich töng sā meh. Vëken meh chin min, ngaich hachī-pö u min nö i kūö meh.
22Ngëichkö e yin, yī-ö tö vaich-ngö tö ngam Tēv: hòṅ chu öt panyënyö tī tikāchö yīö; ngaich öt hĕng tak min ṙamā-ainy.
23Ngòh kamëtö tökētu nöinyö mahapōilen chu: anga-aṅ inrē öp mahachip ṙôre nö ṙô-òv, hameukhu mat min tö chu tö ngam inyöölen aṅ im Tēv.
Currently Selected:
Salmai 50: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
