Salmai 49
49
Kumlō-ov An Ngam Inyönglenre I Kanôlò
1Hang ngih yin, ṙòkhöre yī-ö tarik: kētö elnang re, ṙòkhöre yī-ö aṅ në panam.
2Hĕnghöre yāich, mā inrē: holre tö tökôlò, yāich inrē.
3Ṙô tö mikah ön min ngih elvāng chu: nup piṙūtkö ngih ellōn chu min inrē nö aṅ i mikah elmat.
4Asītö elnangre chin min i inchō-oṙô: i ṙô öp hārp nup min tökihngen ṙô chu nö hameuknyu.
5Kūöyòh öich min pa-ekūö hē nup sakāmö tötlöök: hē ngam tötlöök nö i kulôich-röön chu, nö havīlen chu?
6Achā-a yip mahayönglenre nö i kanôlò re: ngaich hakeūṙô re nö i ṙôken nup kanôlò re,
7Öt hĕng tak tökô tö cha nö ṙānyö hanöng löknyö re: öt rēhĕn nö kô nö kētö ṙāi ò nö im Tēv.
8Pò ngam ṙinānyö ngam nômö ò nö töpōi ṙāi: ngaich nö ngih lökngen nö töng hökiṙen;
9Hòṅ ò nö aṅ nö örheūheu: hòṅ ò nö öt chahū-uyö.
10Pòn meuk vē tarik anga-aṅ tö-akaha nö kapah: ṙong-ngen tö tökulō-ov, tö töt akaha inrē nö kapah, ngaich ṙāngö nup kanôlòre nö lum-nööṙö tahëng.
11Ngö lōn yin nö ellōnre, tö nup patī cha nö töng öt chanūhuvṙen: nup elyöngö cha inrē nö tösöl i tumköl-chap; kaheūkö mine-eny nup taṙeū cha tö mine-eny cha.
12Hö-ö pöri ngòh tarik nö köp nö im ineū-euṅre: höng sā nup tökapah an töṙeūla.
13Angū-ö an talöökö cha vē töt akaha: ngaich pöri cha-a nö sön nö tömka ṙô tö tarik.
14Halēniṙen yin nö hĕng kiteūm nö el chūök kupah; yōm cha nö pököre ngam kinpaha: ngaich yip töchiplö min nö hayöngö cha tö peuheū; ngaich ap vanāyö cha min nö nya-aṅkūö ngam chūök kupah, lökngen e min nö öt aṅhavkūö.
15Ṙānyö ngih nômö chu pöri min ngam Tēv nö ṙā-ang i minhôiṅyö ngam chūök kupah: pòn kē-ĕ chu min anga-aṅ.
16Un man më-eṅ pa-ekūö yĕn hĕng tak öp tövīlöng nö kôlò: yĕn ṙūhölre ṙôken nup kanôlò ò.
17Pò ò min nö öt kūmuṙen yē ò nö kapah: öt meutti min inrē ngam kanôlò ò nö in ò.
18Pòrô anga-aṅ ik sāre nö aṅ nö hakôlò nômö eū-eu më-eṅ inrē tö tarik, yē meh öm kôlò tī tö re.
19Chuh in yip tumkölchap yik yöngre min anga-aṅ: öt meuk hanātö min cha-a.
20Öp tarik i chūök tö-eū-eu, rö-ö pöri nö akaha elmat: höng sā töṙeūla nup tökapah.
Currently Selected:
Salmai 49: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
