Salmai 19
19
Kanôlò Ngam Tēv Im Vinīlö Ngih Panam
1Vënyö kanôlò ngam Tēv an ngam halīöngö: hameuk tö la-en minë kuntī ò minë taṙul.
2Ṙô-òv minë sakāmö i tum sumkam: hatööm i tum mitööm, hameuktö inkaha inrē.
3Öt ṙô-òv nun, öt rēhĕn nö ëluṙô: ötkô nup ṙô u nö hāngö.
4Ngaich nuk nö töökngö röön nö i në panam nö ṙòkhöre; söl i manā-angkūö ngih panam nuk ṙô u: In u anga-aṅ nö vīlö inrūkui ngam tavūöi;
5Ngam tösā kikōnyö töhapīhö nö ṙā-ang el urôhòre nö kunyī-inyre: ngaich sā töka-lēḵ tarik nö ṙāmölōn nö fal ip kū-öre.
6Ip manā-angkūö ngam haliö-ngö ap talöökö ò, ngaich söl i nup manā-angkūö anga-aṅ nö havīṙö e: öt hĕng tönyatngö tö ngam ṙanāchö ò.
Ngam Chöngö Ngam Tēv
7Töteung an ngam chöngö ngam Mā Tēv, mahavantö nômö: tököp an ngam chö-ngö ngam Mā Tēv, tö akaha tī tö töt akaha.
8Tö chip nun minë chöngö ngam Mā Tēv, töṙāmö ellōn tī: töhet an ngam chöngö ngam Mā tēv, ma-ahetlö elmat.
9Töhet an ngam pinhë-ekūö tö ngam Mā Tēv, tö-örheū-heu nö köp: tökô-en an ngam inkaha fālen aṅ im Mā Tēv, keuheūtlöre nö töchip.
10Töyahlö nun nö lōn tö humlum, hôṅ, mötlö tö nup tö pahīöya humlum: mötlö pinchākö inrē tö hönī tö nup tökatāka hönī el nup chūök u.
11Hēk inrē nö lökten in u ngam tarik meh nö fēḵlöngö: Pōiyen raneushö i inköpö u.
12Chīö ap tökô nö akah vanāchö ò: halööklen chu tö nup töhayunka fālen.
13Haköpngö ngam tarikre man inrē, un i nup tö-iṙīöniṙen tökööl; un höktuṙen nö hayöngö chu: hòṅ chu teungten, ngaich chū-ö min löök ṙā-ang i nup tanôich-ngen fālen.
14Hökngen nup ṙô ngih elvāng chu, nup piṙūtkö ngih ellōn chu inrē nö töhō-ov nö i kūö meh: Ō Mā Tēv chu, ihong chu, ṙamānyen chu inrē.
Currently Selected:
Salmai 19: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
