Salmai 18
18
Tinkökö Minhòiṅyö Tāvit
1Ō Mā Tēv, kumlēḵ chu: hāngen chin tö meh.
2Ihong chu an ngam Mā Tēv, chūök chu kiyung, ṙamānyen chu inrē: Tēv chu, töngëh ihong chu: in ò chin min hayönglenre; lanaklö chu, sinrōl ngam inyööken chu inrē, tömarô-òl kui chūök chamônga.
3Havëkö ngam Mā Tēv chin min, ngam töhòṅ ha-öinyö: hòṅ chu min hayöökaṙen in yip lā-al re.
4Havīlen chu minë tökuvaha kinpaha: pahe-ekūö tī tö chu ngam ṙanöingö tī ngam ötlanöökö.
5Havīlen chu minë tökuvaha chūök kupah: yih minë tin- ngöp kinpaha nö i kui chu.
6Havëkö ngam Mā Tēv chū- ö i kanihngenre, hūkö ngam Tēv re inrē: el öp Töhet chūök re anga-aṅ nö hang ṙô chu, ngaich söl elnang ò ngam ṙô chu i kūö ò.
7Kayīna ngaich ngam panam, laröya inrē halöinyköre nup rööntö minë rôngö inrē, ngaich kayīna, pò ò nö līn.
8Löknyö elmeh ò ngaich ök lul nö meutnyi: ṙāpngökūö ngaich ap tameūyö nö löktö elvāng ò, öktikūö ngaich nuk ta-ök tö kūö e.
9Yupūttö ngam halīöngö anga- aṅ inrē, ngaich yôntī: kufëi ngaich ngam sinngūlö nö elröön ò.
10I uk öp kērup anga-aṅ, ngaich kiteū: hòṅ, yit anga- aṅ nö kiteū i rōi kël ngam kuföt.
11Vī sinngūlö anga-aṅ nö in- nyatngö ò, nyatkui ò nö havīlen ò: sinngūlö minë mak, kufëi minë taṙul minë halīöngö.
12Kēngöre nuk tökufëi taṙul ò, kūö yanëchö nö i kūö ò: tökënngöre kumṙah, ta-ök tameūyö inrē.
13El halīöngö inrē ngam Mā Tēv nö kunṙôkö, kaknyöre ngam lamātulöng nö ṙô-òv: tökënngöre kumṙah tö-ök tameūyö inrē.
14Tīnngö nup hanyālöre anga- aṅ, pirātngö u inrē: hòṅ, hanyālö nö pōyen, ngaich ötkô-ò tī tö cha.
15Meūkö ngaich nuk talöökö nuk mak, lungāhaka ngaich minë rööntö ngam panam, i vinëköre tö meh, Ō Mā Tēv: i vaneutnyö ngam ku- föt elmeh meh.
16Tīnhöti anga-aṅ nö löktö lātulöng, kē-ĕ chu anga-aṅ nö ṙā-ang el nup töpōyen mak;
17Ṙānyen chu anga-aṅ ip töka- lēḵ lā-al chu, ṙā-ang in cha inrē yip tösumrīk tö chu: pò cha nö kalēḵ tö chu.
18Yih cha-a nö in chu hē chu ṙònghöichṙen kihngen: ngam Mā Tēv pöri chūök chu.
19Kēten chu anga-aṅ inrē el töpōiti chūökö: ṙānyen chu anga-aṅ, pò ò nö kuchīkölōn nö in chu.
20Reushen chu an ngam Tēv, asā ap lanöökö chu: asā lanöökö eltī chu nö havan- höti nö in chu.
21Pò chu köp tö në talöökö ngam Mā Tēv: öt ṙāngö ngam Tēv re chū-ö i öt lanöökö.
22Pò nup inkaha fālen aṅ in ò nö i kūö chu: ngaich rö-ö chū-ö inrē pehngö nup chöngö ò nö ṙā-ang in chu.
23Teung chin inrē in ò: haköh- ngenre chin tö nup tökööl re.
24Lökten an ngam Mā Tēv nö havanhöti nö in chu asā ngam lanöökö chu: asā ngam hanëtö eltī chu nö i kūö ò.
25Hameuk tö miṙēlōnre më-eṅ in yip tö aṙē-ĕlōn: hameuk- töre min më-eṅ teung i tö- teung tarik.
26Hameuktöre më-eṅ min het i yip töhet: hameuktöre më- eṅ min hapungtöre in yip kamānngöre.
27Pò meh min hayööken tökihngen tarik: tumṙeūtu pöri tö meh yip mahakeū- ṙöre.
28Pò meh min tōttökūö ngam ëāṅvö chu: ngam Mā Tēv, Tēv chu, anga-aṅ min ma- ahatlö ngam sinngūlö chu.
29Pò chu tī meh lūḵ kumyung: lökten im Tēv re inrē kumööingö kui kinlōngö.
30Töteung pöri ngam talöökö ngam Tēv: tökalaha an ngam ṙô ngam Tēv; lanaklö cha an nö ṙòkhöre yip maha- yönglenre nö in ò.
31Achīö ṙöng ap Tēv, Höng ngam Mā Tēv: achīö ap ihong, nö hol ngam Tēv hī?
32Nyëk ṙat chu an ngam Tēv tö kumlēḵ: ngaich vīten ngam talöökö nö teungten.
33Vīten në röön chu nö röön kan tīör: ngaich asöklen chu el chūök chu lātulöng.
34Muhumveūten në kël chu an nö kiyung: lökten në kël chu nö sōntö mās linreny.
35Ngaich man kē-ĕkūö chu tö lanaklö aṅ ip inyööken in meh: ṙapken chu inrē ngam lāhāmö kël meh, kiröng chū- ö inrē tö tī ngam ṙanëmen meh.
36Ṙūönyu ṙôkti elröön chū-ö tö meh: ngaich öt taleūchi röön chū-ö.
37Lūḵ yip lā-alre chin min, ngaich kôlö in cha: öt rēhĕn chin havöökūöre hanöng saha cha nö keuheūtngöre.
38Tafūni tī chin min tö cha, tö lökten cha min nö öt choholre: fuk elröön chu yip min.
39Pò meh hamöplö ṙat chu tö kumlēḵ i kinyūngö: tum- ṙeūtu yip tö meh nö lātaṙeū tö chu yip chamôhòlre nö lā-al chu.
40Vīten yip lā-al chu man inrē nö hapung tö uk re tö chu: pò chu hōtu rökngen cha yip tösumrīk tö chu.
41Ayôṙa cha-a, öt hĕngtak mahayööken pöri: im Mā Tēv nö uroh, hö-ö pöri anga- aṅ nö sapṙô cha.
42Pinyāchö cha chū-ö nö sā pitung tö fööṙi tö kuföt, kavalngen cha chū-ö sā tilin el talöökö.
43Ṙānyen chu man ngaich ṙā- ang i kinlöönö tö vē tarik: vīlen chu më-eṅ ngaich yöng- kūö pumnāmö tarik: lök la-en chu yip min tarik töt mikahkūö chu.
44Höng hang töre yip min tö chu ngaich hang chöngö chu: hökngenre yip min aṅ tahëng nö in chu.
45Changāchi yip min aṅ tahëng: ngaich meutlö min nöng kichëyöre nö ṙā-ang el nup tö-öpnyukūö chūök cha.
46Tö-aṅ an ngam Mā Tēv; tökôlò an yēḵ ngam ihong chu: hapōilöng an yēḵ ngam Tēv inyööken chu.
47Anga-aṅ ngam Tēv mahava- halvah chu: ngam tumṙeū tö tarik nö lātaṙeū tö hī.
48Kēnyen chu anga-aṅ nö ṙā- ang im lā-al chu; hôṅ, hachohlen chu më-eṅ lātu- löng tö yip chamôhòlre nö lā-al chu: ṙānyen chu man ngaich ṙā-ang i tö-angë tarik.
49Lökten chin min kētö nöinyö meh in yip pumnāmö tarik: tikökṙôre inrē tö nöinyö ngam minë-eny meh.
50Kētö yöng ṙinānyö ngam Rā- cha re an: hameuk tö hanā- ngen neūkölōnre nö im hacham elkuire, in Tāvit, ip kūön ò inrē nöng öreheūheu.
Currently Selected:
Salmai 18: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
