Salmai 140
140
Invëkö Linaklö
1Ō Mā Tēv, ṙānyen chu ṙā-ang i tötlöök tarik: laklen chu tö tarik tö chökhuṙen.
2Yip töng lōn tö öt lanöökö ellōn re: öt heūmö yin nö hamūlöre nö kiyung.
3Hakeut litāk re yin sā pēch: tö kapahukūö nup pēch i minuh cha.
4Ō Mā Tēv, lākö chu tö kël yip tötlöök: laklen chu tö tarik tö chökhuṙen: yip tamölngenre nö kuringngen chu.
5Hayūnö chu yin vē mahakeūṙöre tö tinngöp, nūöt inrē: hanyāknyö inhāṅl yin nö i taseū talöökö; vī insuk chu yin.
6Ngö ṙô chin tö ngam Mā Tēv: Me-eṅ Mā Tēv chu. Ō Mā Tēv, kētö elnang re Man i në ṙô chu ve-elkui.
7Ō Tēv, Mā, kumlēḵ ngam inyööken chu: ramuptö kui chu hē el kinyūngö.
8Ō Mā Tēv, un kētu lōn ngam tötlöök: un ṙūölöng öp halēnlö cha tötlöök; hòṅ cha nö öt hakeūṙö re.
9Yip mahavīlen chu: hökngen nup öt lanöökö elvāng cha, nö kahultö kui cha.
10Hökngen nup töhūkūö ta-ök nö fuk kui cha: hökngen cha nö kavalhötvö nö i kūö tameūyö, el öp tö aṙū anūlö, hòn öt chōholre nö hēk.
11Ötköp ön ngòh tö chōchö ṙô nö ing panam: chöhö ön ngòh töchökhuṙen tö tarik tö ötlanöökö, nö hòṅ afukngen ò.
12Akahalōn chin tö ngam Mā Tēv; nö lā ip tö hakihtuṙen, lā i yāich inrē.
13Ha-öinyö an min ngam mine-eny Meh tö yip tölöök: iyöng i kūö Meh yip min tö chiplö.
Currently Selected:
Salmai 140: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
