Salmai 139
139
Mikahlōn Tö Ngam Miṙūöt Ngam Tēv
1Ō Mā Tēv, ngaich Man kiluhu chu: ngaich akahakūö tö chu.
2Akahalōn Man tö anūichngö chu, chanôhòlchu inrē: marôvat Me-eṅ Öm akah ellōn chu.
3Kiluh el kanröönö chu Man, el chūök ṙanôlngö chu inrē,: tö ulòhten Man inrē i në talöökö chu.
4Ölnyi ap ṙô nö i rōi litāk chu: ngaich pöri, Ō Mā Tēv, Me-eṅ keuheūtlöre mikahlōn tö e.
5Lā uk chu Man, lā kūö chu inrē: Öm kētö tī re in chu.
6Pingangkūö chin tö tö ngatī mikah: marô-òlchūök an, öt kô chin söl in e.
7Isuh kū-ö öich kô ṙāngö Fanöinylö Meh: hēk kū-ö tö yih falngöre tö ngam kūö Meh?
8Yē chu yônlö el halīöngö, umuh Me-eṅ: yē chu haṙĕhtö chamam re el anūlö, yĕh meuk umuh Me-eṅ.
9Yē chu haveutngöre im minlīlö peuheū: öich ip manā-angkūö ngam mai, ngaich iyöng in e,
10Sön ngam kël Meh nö hachō-o chu: ṙapken chu inrē ngam lanāmö kël Meh.
11Yē chu ngö ṙô, Nyatngö chin tö ngam sinngūlö ngaich ngam hanātö mahavīlen chu, nöng hatööm.
12Öt hanyatngen chu an tö Meh ngam sinngūlö, hat pöri ngam hatööm nö sā sakāmö: hĕngren nun tö sinngūlö tö hanātö inrē nö in Meh.
13Pò Meh vamī në rahēḵ chu: hamūli chin tö Meh el chūök kanūönö öp yöng re.
14Hòṅ ha-öinyö Meh chin; pò ngam vinī-iṅ chu nö pinhe-eṅkūö, pinngangkūö inrē: akahalōn Man tö ellōn chu.
15Öt nyatngö nun në tūmö alaha chu tö Meh: hē chu ulāikaṙen vinī-iṅ, akahalōn Me-eṅ töchu umuh.
16Meuk nup tö öl nö lēnta alaha chu nö ngaich minë mat meh, ngaich i mat līpöre Meh nö kūichi nö ṙòkhöre: nup tö vī-i i tum sakāmö, hē u nö öl nö rēhĕn.
17Ō Tēv, iṙôkö lanöökö lōn Öm in chu: i ṙôken nup tūmö u!
18Yē chu kaheūkö u, ngaich samötlöng ṙôken anū-ö tö kuyāyö: yē chu aṅhen, ngaich ṙòngmöng in Meh chū-ö.
19Ō Tēv, fëlngö yip tötlöök Man min: kē-ĕngre yin tö chu lökten yī-ö tarik tö yal tö mahām.
20Pò cha nö öt löökö ṙô tö Meh: ngaich kē mine-eny Meh yip lā-al Meh nöng töl.
21Ō Mā Tēv, röh öich kunyahaṅ-elmat tö cha yip tö sumrīk tö Meh: röh öich haṙīvlōn in cha yip chamôhòlre nö lā-al Meh?
22Surīkhen cha chin öich kô-en: kaheukten cha chin nö lā-al chu.
23Kiluhu chu Man, Ō Mā Tēv, akah ellōn chu inrē! Kalaha chu, akah ellōn chu inrē!
24Ngëicha yĕn talööku öp öt lanöökö nö in chu: ngaich hachō-o chu el talöökö tö örheūheu-aṅ.
Currently Selected:
Salmai 139: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
