Salmai 107
107
TINNEŪYÖ
(Sal 107–150)
Ha-öiny lanöökö ngam Tēv
1Ō Ha-öiny ngam Mā Tēv; tön tölöök An: pò ngam neūkölōn nö örheūheu nö köp nö in Ò.
2Hökngen yip tö ṙānyu tö ngam Mā Tēv nö ngatī ṙô: yip ṙahānyö Ò nö ṙā-ang eltī yip tö kunyahā-elmat;
3Ngaich hamūlö cha nö i nup panam: ṙā-ang lā chuhöt, ṙā-ang lā sūng inrē, ṙā-ang lā kapā, ṙā-ang lā lòhngö inrē.
4Chavīṙa röön cha-a nö el inchōn, nö el talöökö tönyalnyi: öt kôtökūö cha-a tö el panam elyöngö.
5Aheuk, haṙëhenômö inrē: öt kalē-ĕ ellōn cha-a nö inrē.
6Ngaich cha-a nö havëkö mine-eny ngam Mā Tēv i kinihngen cha: ngaich Anga-aṅ nö ṙā-nyen cha nö ṙā-ang i nup kanihngen cha.
7Hachō-o cha Anga-aṅ inrē nö el tö chip talöökö: pòṅ hōtu cha-a nö chuh el panam tö iyöngö.
8Ha-öiny ngam Mā Tēv öre tarik nö ngaich, tö kūö ngam lanöökö Ò: kūö nuk pinngangkūö la-en Ò inrē nö i vē kūön tarik!
9Pò Ò nö hatööḵngen tö kalē-ĕ ellōn: hatööḵngen tö kapahare inrē tö tölöök.
10Yip amūichhak nö el sinngūlö, el nyat kinpaha inrē: tö nyëki nö i kanihngen, i vët inrē.
11Pò cha nö ahôngö ṙô ngam Tēv: öt mikūöṙen inrē tö ngam inlēnö aṅ im Latulöng.
12Lökten Anga-aṅ nö tumṙeūtö ellōn cha nö hol tö la-en: fukngö cha-a, ngaich rö-ö nö hōluṙen.
13I kanihgen re cha-a nö havëkö ngam Mā Tēv: ngaich Anga-aṅ nö hayööken cha i nup kanihngen cha.
14Kēnyen cha Anga-aṅ nö ṙā-ang el singūlö, ṙā-ang el nyat kinpaha inrē: litòkngö nuk nyanëk cha inrē nö kö marök.
15Ha-öiny ngam Mā Tēv öre tarik nö ngaich, tö kūö ngam lanöökö Ò: kūö nuk pinngangkūö la-en Ò inrē nö i vē kūön tarik!
16Pòn likölngö nuk mās inkūp Anga-aṅ: ngaich ṙatngö nuk vët kālkūö nö kö marök.
17Kulō-ovkūö nuk tötôichlö fālen cha: kūö nuk öt lanöökö cha inrē, nö kihngen.
18Sō-o tö sitih cha-a nya-aṅkūö: ngaich cha-a nö röhta nö i kūö inkūp kinpaha.
19Ngaich cha-a nö havëkö ngam Mā Tēv nö i kanihngen cha: ngaich Anga-aṅ nö ṙānyen cha nö ṙā-ang i nuk kanihngen cha.
20Söömtö ṙô re Anga-aṅ lööken tī tö cha; ṙānyen cha inrē nö ṙā-ang el anūlö.
21Ha-öiny ngam Tēv öre tarik nö ngaich, tö kūö ngam lanöökö Ò: kūö nuk pinngangkūö la-en Ò inrē nö i vē kūön tarik!
22Hökngen cha yēḵ nö kētö nöinyö tökētu: vënyö nup la-en Ò hol ṙô tö tinkökö.
23Cha-a yip el chōng nö lök el mai: yip tö la-evṙen nö el yöng mai.
24Meuk nup la-en ngam Mā Tēv cha-a: nup aṅ in Ò pinngangkūö el ngam tö-aṙū.
25Pòn chöngu Anga-aṅ, ngaich söklöre ngam kuföt chanôchö: ngam mahachohlö nup ël mai.
26Söl el halīöngö anū-ö nö pakeūönlöng, hēk pakeūönköti nö lataṙeū: paṙööyi nômö cha-a kūö kanihngen re.
27Chahīöra cha-a, sā kinlövö mihiyōi tarik: ngaich nöng öt huveū-en.
28Ngaich cha-a nö havëkö ngam Mā Tēv, i kanihngen re: ngaich Anga-aṅ nö kēnyen cha, nö ṙā-ang i nup kanihngen cha.
29Vītö ngam chanôchö Anga-aṅ nö kalūöng: lökten minë-el mai nö öt halöinyköre.
30Ṙāmölōn cha-a ngaich, pò cha nö öt halöinyköre: ngaich Anga-aṅ nö kēhöt cha nö el sanāṙö öp chūök lōn cha.
31Ha-öiny ngam Tēv öre tarik, tö kūö ngam lanöökö Ò: kūö nup pinngangkūö la-en Ò inrē nö i vē kūön tarik!
32Hökngen cha yēḵ nö hapōilen Ò nö el ṙôngö yip tarik: ha-öinyö Ò inrē el anūichö yip Mā.
33Havöötö kūö nup tahël An nö el inchōn: nup tö hëmlö mak inrē, el tumlat töyal tö mak;
34Tö ṙôngu panam, vītuṙen nö sāl el tönyalnyi: kūö öt lanöökö cha yip mi-iyöng in e.
35Havāngtö ngam el inchōn Anga-aṅ nö chūök manūlngö mak: ap tönyô panam inrē, nö tö hëmlö mak.
36In e tī Anga-aṅ tö yip tö-aheuk, nö iyöng: pòn hōtu cha-a nö halēn elyöngö el panam.
37Teūich inrē nö el panô-òṅ, teūich vāin inrē: ngaich kē ṙòng u cha-a, tö nup tö ṙūhölre.
38Hakôlò cha Anga-aṅ inrē pòn hōtu nö pōyen nö ṙūhölre ṙôngö: sōtö nup nuā cha Anga-aṅ nö kūönngöreṙen.
39Hēk cha-a nö kūönngöre: sōnhakkūö inrē kūö inkihtenre kanihngen, miṙivlōn inrē.
40Hōngtö minṙēngö Anga-aṅ nö i kui yip kūön rācha, ngaich vīten cha nö el töt aṅhaṅvkūö, i chūök tö rö-ö talöökö.
41Asöklö ngam yāich pöri Anga-aṅ, nö lātulöng tö kanihngen: ngaich vīten ò nö mupīhö, sā kiteūm pököre.
42Meūkö e min yip tö chiplen, ngaich ṙāmölōn: ṙòkhöre inrē min öt lanöökö nö tilupngö elvāng re.
43Yip tö akahaṙa, hangihtöre min tö në: ngaich cha-a min nö ngëichkö miṙēlōn ngam Mā Tēv min.
Currently Selected:
Salmai 107: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
