Salmai 106
106
Lanöökö Ngam Tēv Nö In Yip Tarik Ò
1Ha-öiny ngam Mā Tēv yin, Ō ha-öiny tī ngam Mā Tēv tön tölöök An: pò ngam miṙēlōn Ò nö köp nö örheūheu.
2Chiāp tökô nö ṙô-òv tö ngam minhôiṅyö ngam Mā Tēv: hēk, tökô nö hameuktö nup nöinyö Ò?
3Tökôlò yip cha-a, yip mahaköp inkaha fālen: anga-aṅ inrē öp tö la-evṙen tö tölöök nö örheūheu.
4Ō Mā Tēv, köpölōn tö chu, tö ngam miṙēlōn Meh inrē, tö yip tarik Meh: Ō chöhken cha tö ngam inyööken aṅ in Meh.
5Hòṅ chu meuk kanôlò yip katöllö Meh, hòṅ chu ṙāmölōn i ṙanāmölōn yip pumnāmö tarik Meh: hòṅ chu hol yip amin Meh eū-eu re.
6Hol yik muvöhngöre in köölö fālen: kēken tökööl in, öt löökö fālen in ngaich.
7Hö-ö yik muvhöngö ih nö akaha elmat tö nuk pingangkūö tī Meh i Aikup: rö-ö yik nö köpölōn tö ṙôken nuk miṙēlōn Meh; minôṙô pöri nö im mai, ngam mai Ētöm.
8Hayöölen cha pöri Anga-aṅ tö kūö ngam mine-eny Ò: pòn hōten ngam minhôiṅyö re nö akahaiṙen.
9Vëkö ngam mai Ētöm inrē Anga-aṅ, ngaich nyôngö angū-ö: ngaich hachō-o cha Anga-aṅ nö lök el tö-aṙū, nö sā lamök el inchōn.
10Hayööken cha Anga-aṅ inrē, nö ṙā-ang eltī Ò ngam tö sumrīk tö cha: ṙānyen cha nö ṙā-ang im tö kunyahaṅ-elmat.
11Pavtökui yik lā-al cha ngam mak: öthĕngtittak tö ōtre tö cha.
12Ṙātö ellōnre cha-a ngaich nö i nuk ṙô ò: tiköknyö nöinyö Ò cha-a.
13I lööṙen cha-a nö vaichngö tö nuk la-en Ò: öt höktöre cha-a tö inlēnö re tö Ò.
14Kiröngö yanālö pöri nö el inchōn: ngaich kalah ngam Tēv, nö el tönyalnyi.
15Ngaich Anga-aṅ nö kē-ĕkūö cha tö nuk havëkö cha: kētö inyāchö pöri nö ellōn cha.
16Kunyahaṅ-elmat inrē cha-a tö Môsös nö ik inyöngö: tö Āròn inrē ök töhet nö aṅ in Mā Tēv.
17Luvënyökūöre ngam tumlat ngaich nö ngeūkten Tātan: kahul tö kui yik hol Apirām inrē.
18Tōttukūö ngaich ök tameūyö nö in yik hol cha: ṙāpngökūö ök tameūyö ngaich tö yik tötlöök.
19Vī kun nuā cha-a nö i Hôrep: Ngaich salām ök tö haṙöichö tēv.
20Haṙīngö lanöökö re cha-a: nö im tö sā nuā nyamā kiyôp.
21Vaichngö cha-a tö ngam Tēv ngam mahayööken cha: ngam tö pōyen tī tö nuk i Aikup.
22Pinngangkūö nuk la-en i panam Hem: pinhe-eṅkūö nuk inrē ip mai Ētöm.
23Lökten Anga-aṅ nö ve-eny re nö piyāingen cha, yē Môsös öre ök atöllö Ò, nö öt söklöre nö i kūö Ò nö i hôi: nö havööngökūö ök lanīnö Ò, ngaich öt halëlngen cha Anga-aṅ.
24Hôṅ, mināichṙô cha-a tök tö vai panam: öt ṙātö-ellōnre nö i ṙô Ò.
25Uyëḵa pöri nö el nuk inrūkui re: ngaich öt hang ṙô ngam Mā Tēv.
26Lökten Anga-aṅ nö hachônglö kël re nö in cha: pòn hòṅ afukngen cha nö el inchōn.
27Pòn hòṅ afukngen yik kūön cha Anga-aṅ, nö in yip pumnāmö tarik: pirātö cha inrē nö i nup panam.
28Hamūltöre cha-a inrē nö ip Pē-alpē-ôr: ngaich nyā tö kētu nö i kupah.
29Ngatī cha-a nö harunnyö lanīnö Ò nö ik la-en re: ngaich ök tö lëlngökūö invah nö lakukköṅnyö nö in cha.
30Söklöre Finehas, akaha fālen inrē: sökngöre ngaich ngam invah tö lëlngökūö.
31Ngaich kaheuktu angu-ö in Ò nö lanöökö: i nup tumkölchap nö örheūheu.
32Vīten Ò cha-a inrē nö tainy nö i nuk mak Meripah lökten Môsös nö chōichngen pòkūö cha.
33Pò cha nö ahôngen ellōn Ò: ngaich Anga-aṅ nö öt halēnlöṙô re nö kaknyöre.
34Öt piyāingö yik tarik cha-a: nö sā chöngö ngam Mā Tēv tö cha.
35Hamūltöre pöri nö i yik pumnāmö tarik: haköp nuk la-en cha inrē.
36Lök la-en nuk insā tēv cha-a inrē: nuk tö vītöre nö tinngöp cha.
37Hòṅ, kētö yik kūön re cha-a, kikōnyö, kikānö inrē: nö tökētö nö i sī-ö.
38Kitaknyö mahām töt akaha, mahām yik kūön cha kikōnyö, kikānö inrē, nuk kahëtö cha nö i insā tēv aṅ Kanā-aṅ: sum-ôki inrē ngam panam tö mahām.
39Ngatī cha-a nö hachōchi tö nuk la-en re: iṙūhen nö asehtöre nö i nuk vahīṙenre.
40Lökten ngam lanīnö ngam Mā Tēv nö hūlökūö nö i tarik ò, ngaich Anga-aṅ nö sa-òkhö yik amin re.
41Ngaich kēten cha Anga-aṅ nö eltī yik pumnāmö tarik: ngaich yik tö sumrīk tö cha nö hayöngö cha.
42Hakihten cha ngaich yik tö kunyahaṅ-elmat tö cha: ngaich acha-a nö el katòh eltī cha.
43Ṙōlheuh Anga-aṅ nö ṙānyen cha: ngaich pöri cha-a nö mi-ô nö halēnöre, ngaich tumṙeūtu tö kūö ötlanöököre.
44Hö-ö pöri Anga-aṅ nö mikūöṙen tö kanihngen cha: yē Ò nö hang ṙô cha nö peuiny.
45Köpölōn inrē Anga-aṅ tö ngam kinlēḵngô re nö in cha: havöökūölōnre ngaich iṙôken nup miṙēlōn Ò.
46Vīten cha Anga-aṅ inrē nö aṙētu: tö cha yik kamëngen cha nö kaitī.
47Ō Mā Tēv, Tēv ih, hayööken ih, hamūlö ih inrē ṙā-ang in yip pumnāmö tarik: öi ha-öiny ngam töhet mine-eny Meh, öi mihôiṅ im inyöngöre tö Meh.
48Tökôlò An yēḵ ngam Mā Tēv, ngam Tēv Israĕl, löktökūö ngam tö örheūheu misī, söl môkö inrē! Höknyô yip tarik nö ngô ṙô, Amen, Ha-öiny ngam Mā Tēv yin yēḵ.
Currently Selected:
Salmai 106: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
