Salmai 105
105
Ngam Tēv Tö Yip Tarik Ò
1Ha-öiny ngam Mā Tēv, havëkö mine-eny Ò: mikahtölōn tarik tö nup vahīṙen Ò.
2Tikökṙôre in Ò, tikökṙôre tö nup nöinyö Ò: piṙūtkö nup pinngangkūö la-en Ò.
3Eū-eu re yin im töhet mine-eny Ò: hökngen cha nö ṙāmölōn yip chamöh ngam Mā Tēv.
4Chöh ngam Mā Tēv yin, töp kumlēḵ Ò inrē: örheūheu yin chöh ngam kūö Ò.
5Köpölōn tö nuk tökeuheūten pinngangkūö la-en Ò: nuk aṅ elvāng Ò inrē inkaha fālen.
6Ō yī-ö kūön Aprahām ök kūön Ò: yī-ö kūön Yāköp, yik katöllö Ò.
7Örheūheu An nö köpölōn tö nuk kinlēḵngôre: i tö köṅnyu tumköl chap Anga-aṅ nö chöngu tö ngam ṙô.
8Örheūheu An nö köpölōn tö nuk kinlēḵngôre: i tö köṅnyu tumköl chap Anga-aṅ nö chöngu tö ngam ṙô.
9In Aprahām Anga-aṅ nö vītö ngam kinlēḵngô: in Isāk inrē ngam tö chūöku kinlēḵngô Israĕl.
10Haköpö anū-ö nö in Yāköp nö inchöngten: töt chanūhuv nö kinlēḵngô nö in Israĕl.
11Nö ngö ṙô, In meh tī chin min kētö ngam panam Kanā-an, nö minchööḵö meh:
12Hē cha nö ṙòngmöng haroh tumtak nö tarik: hôṅ, öt ṙōl tak, öt rô-òtenvö nö i kūö e inrē.
13Kiröönngöre cha-a nö ṙā-ang i pumnāmö tarik: teungtöre nö i pumnāmö tarik, ṙeū-eung im tö hĕng pūlngö söl i yip tahëng tarik.
14Öt halöngten tarik Anga-aṅ nö chōchen tī nö in cha: hôṅ, kūö cha Anga-aṅ nö vëkö yip rācha;
15Nö ngö ṙô, Un lūölka më tö hachāmö kui tö chu: un chök më pròfĕt chu.
16Havëtö inyāchö ngaich Anga-aṅ nö i kui ngam panam: keuheūtngöre tī Anga-aṅ nö fòkngö nuk nya-aṅkūö cha.
17Tīnngö tarik Anga-aṅ, hĕngtak nö urēhĕkūö cha: inyīhiyö ang Yôsĕf nöng kūön alaha.
18Chök nuk kalröön ò tö kūö inlök: hulalhak anga-aṅ nö inlök tö vët;
19Hanöng saha ngam ṙētak ngam ṙô Ò nö teungtö kūö: kalaha ò ngam ṙô ngam Mā Tēv.
20Tīnhanga ngam rācha ngaich luhlen ò: ngam mahayöng yik tarik, ngaich hökngen ò nö kiröönngöre.
21Vīlen ò anga-aṅ nö mā nö i patī ò: mahayōm nup inlānen ò inrē nö ṙòkhöre.
22Nö hamūl yip kūön rācha ip lōn ò: ane inrē haköptö yip mahalēn chöngö tö mikah.
23Yih inrē Israĕl nö i Aikup: yihtökūö inrē Yāköp nö i panam Hem.
24Ngaich anga-aṅ nö ṙūölen yik tarik re nö pōyen: vīten cha inrē nö kalēḵ tö yik lā-al cha.
25Vīngö ellōn cha Anga-aṅ nö surīkhö yik tarik Ò: mileuichngen michūḵ nö i yik tarik Ò.
26Tīnten ök tarik re Anga-aṅ ang Môsös: Āròn inrē nak katöllö Ò.
27In cha tī cha-a tö nuk minkahgö: pinngangkūö inrē i panam Hem.
28Tīntö sinngūlö Anga-aṅ, vīten e ngaich nö sangūla, ngaich sangūla angū-ö: ngaich öt ahôngen nuk ṙô Ò cha-a.
29Vīngö nuk mak cha Anga-aṅ nö mahām: ngaich kapah nuk kāḵ cha.
30Tööḵlö nuk panam cha ngaich tö tarôṅt: el nuk urôhò yik rācha cha.
31Ṙô-òv Anga-aṅ, ngaich yih nuk inṙūöi nö pōyen, tamāp inrē: ṙòkhöre chūök nö i kūö panam cha.
32Kētö kumṙah cha Anga-aṅ tö tö mulngöre: tö hūkūö tameūyö inrē nö i panam cha.
33Silehngö nuk vāin cha Anga-aṅ inrē tö nuk anychīr cha inrē: lisehngö nuk chōn cha inrē i kūö panam cha.
34Ṙô-òv Anga-aṅ, ngaich yih nuk mufākö: nuk kata-ëm inrē, öt kanṙeūken.
35Ngaich keuheūt anū-ö, nö nyāngö nuk kun chōn i panam cha: nyāngö nuk ṙòng aṅ ngam tumlat inrē.
36Halëlngö yik lanòh Anga-aṅ nö ṙòkhöre i panam cha: yik yöngkūö kumlēḵ cha.
37Kēnyen cha Anga-aṅ ngaich nö hol tö rupīö, humlum inrē: ngaich öt hĕng tak töt kalē-en nö i yik miyöngö cha.
38Ṙāmölōn ngaich Aikup tö chanūhu cha: pò cha nö fuk kui tö pinhe-eṅkūöre tö cha.
39Hanyāknyö taṙul Anga-aṅ nö innyat kui cha: tameūyö inrē, nö inhat mat cha tö hatööm.
40Havë-a cha-a, ngaich kētö nuk kūil Anga-aṅ: hatööḵngen cha inrē tö nya-aṅkūö aṅ el halīöngö.
41Luvënyö kūö ök ihong ngaich Anga-aṅ, ngaich pòpnyi nuk mak: hëmnyi anū-ö sā tahël i panam tönyô.
42Pòn köpölōn Anga-aṅ tök töhet ṙô re: in Aprahām ök tarik Ò.
43Kēnyö yik tarik re Anga-aṅ nö ṙāmölōn: yik katöllö Ò inrē hol tö tinkökṙô re.
44Ngaich kē-ĕkūö cha Anga-aṅ tö nuk pumnāmö tarik: ngaich cha-a nö kē nuk la-en yik tarik nö aminre.
45Pòn hōtu cha-a nö haköp nuk inchöngten aṅ in Ò: haköp nuk chöngö Ò inrē. Ha-öiny ngam Mā Tēv yin yēḵ.
Currently Selected:
Salmai 105: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
