Salmai 104
104
Nöinyö Ngam Vamī-il
1Hakôlò ngam Mā Tēv, Ō Me-eṅ nômö chu: Ō Mā Tēv, Tēv chu, tökiröng takô-en Man, hayūtö Man tö ineū-euṅ, tö vanāiyö re inrē.
2Kamhūmöre tö hanātö sā hilā: Me-eṅ mahanyāknyö minë halīöngö nö sā inrūkui.
3Ṙamātö minë mikeūnö minë urôhò re nö el minë mak: vamī minë taṙul nö inrölre; kumröönngöre, Öm i rōi sanëòk ngam kuföt;
4Vamī minë kuföt nö ma-aṅhānga re; më mameukṙen Ò; tö hūkūö nö tameūyö.
5Ṙamātö rööntö ngam tumlat: pòn hōten e nö öt hanlöinyken nö örheūheu.
6Kahumngö e Me-eṅ töm mak nö sā inyut: sökhaka minë mak nö i kui minë rôngö.
7Falngöre anū-ö tö vinëköre tö Meh: i ṙô ngam kunṙôkö Meh anū-ö nö changāchi.
8Löklö minë rôngö anū-ö nö yônlö: löktö el minë achāṙö anū-ö nö yônti, nö ip chūök u vahī tö Meh.
9Ṙātö tölngö kūö u Me-eṅ pò u nö sōtu nö havan nö hēk nö i kui ngam tumlat.
10Söömtö tö hëmlö mak Anga-aṅ nö el minë achāṙö: lök i minë rôngö anū-ö.
11Kētö òk nup töṙeūla anū-ö el kahôyö: haṙamtö yanālö re nup hanchōn köttö.
12In u nup chehechōn el taṙul nö chūökuvö: tikökṙôre nö i rōi nup pak.
13Hamak minë rôngö An nö löknyö i minë urôhò re: tööḵngen an ngam tumlat tö ṙòng minë la-en Ò.
14Vīten në kiyôp An nö sīöp tö kūö në nuā, kun chōn inrē mineukṙen ngam tarik: pòn hōten cha Anga-aṅ nö sīöpö, nya-aṅkūö nö löklö el tumlat.
15Vāin inrē tö ṙāmölōn tī tö tarik: tavī-i inrē tö tī-iv tö ngam kūö ò nö angāya, nya-aṅ inrē tö kalē-ĕti tö ellōn tarik.
16Tööḵngen nun minë chōn ngam Mā Tēv: minë Sītör aṅ Lepanön, minë taheūch tö Ò.
17I chūök minë chehechōn nö vī fôngöre: patī ngòh istôk nun në för chōn.
18Chūök në hanchōn pököre nun në tö marô-òl kui rôngö: chūök në kōni në ihong.
19Halēn ngam chingëṅt Anga-aṅ nö ṙētak: akahakūö ngam tavūöi tö maneuttö re.
20Vī sinngūlö Më-eṅ, ngaich hatööm angū-ö: hē e nup töṙeūla el inchōn nö ṙòkhöre nö ṙeulnyi.
21Siṙöp pô re në kūön lāyön: chöh kā re tö aṅ im Tēv.
22Meutlö ngam tavūöi, kē-ĕngre ngaich anū-ö: ṙōlngöre ngaich nö el nup kinlūhu re.
23Kiröönngöre tarik nö i la-en re: vahīṙenre inrē nö söl harap.
24Ō Mā Tēv, iṙôken ön minë la-en Meh: vī-il u Man nö ṙòkhöre lökten ip mikah; tööḵlö ön ngih tumlat tö kanôlò Meh.
25Umū-aṅ ngam mai, kiröng pōiti inrē: ël e nup tö pōyen ṙameūla, hĕnghöre tö kūönö tö kiröng inrē.
26Ël e nup chōng nö kiröönngöre: kāhanòk, ngam vahī Meh nö mumnyamkö kūö Ò, nö umuh.
27Ṙòkhöre anū-ö në nö in Meh: nö hökkö tī Meh kētö nya-aṅkūö u, ip hē ṙētak tölöök.
28Kē-ĕkūö u Me-eṅ, ngaich hamūl anū-ö: kiyāngnyö eltī re Me-eṅ ngaich tööḵngen anū-ö tö tölöök.
29Hanyatngö kūö re Me-eṅ; ngaich kihngen anū-ö; kēngö unhômö u Me-eṅ, ngaich kapah anū-ö: ngaich havanngöre nö pitung.
30Söömtö nômö re Me-eṅ, ngaich vīlöngö anū-ö: ngaich Me-eṅ inrē tumfömlö kūö ngam tumlat.
31Hökngen ngam minā-aṅ ngam Mā Tēv yēḵ nö örheūheu nö köp: hökngen ngam Mā Tēv yēḵ nö ṙāmölōn nö i në vahīṙen re.
32Ngam ngamëchtö kui ngih panam, ngaich kichëyöre angū-ö: lūölkö minë rôngö Anga-aṅ, ngaich lūlu anū-ö.
33I ṙô-òten chu min aṅ tikökṙôre min chū-ö im Mā Tēv: i rô-òten re chin min tarik öich tikökṙôre tö nöinyö ngam Tēv chu.
34Hökngen öp piṙūtkö chu nö pachāka nö in Ò: ṙāmölōn chin min im Mā Tēv.
35Hökngen yip tököölö fālen nö hatngö nö i kūö ngih panam, hökngen yip tötlöök inrē nö öt ōtre: hakôlò ngam Mā Tēv, Ō me-eṅ nômö chu. Ha-öiny ngam Mā Tēv.
Currently Selected:
Salmai 104: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
