Salmai 103
103
Hanāngenlōn Ngam Tēv
1Ō Me-eṅ nômö Mā Tēv: ṙòkhöre in chu ellōn, hakôlò ngam töhet mine-eny Ò.
2Ō Me-eṅ nômö chu, hakôlò ngam Mā Tēv: un vaichngö tö nup inkôlò tī Ò, nö ṙòkhöre.
3Ngam ma-aṙē-ĕl nup tökööl meh nö ṙòkhöre: tö lööken tī tö nup invah meh nö ṙòkhöre.
4Ngam Ṙamānyö ngam nômö Meh nö ṙā-ang el anūlö: ngam ma-afônglö kui Meh tö ngam hanāngen neūkölōn nö hol tö miṙēlōn.
5Ngam mahatööḵöl elvāng Meh tö tölöök: hinôten ngam inyālö Meh nö tumfömlöngö nö sā matēṙö.
6Tī tö nup lanöökö An ngam Mā Tēv, inkaha fālen inrē in yip tö hakihtuṙen nö ṙòkhöre.
7Mikahtölōn Môsös An tö nup talöökö re: nup la-en Ò, in yip kūön Israĕl.
8Tötööḵlö An ngam Mā Tēv tö miṙēlōn: töt veūtö lanīnö, tö pōyen miṙēlōn inrē.
9Hö-ö An nöng nyamṙôre nö vë-a: ötrēhĕn nö örheūheu nö haköp lanīnöre.
10Hö-ö An nö asā nup tökööl hī nö lök alaha hī: ötrēhĕn nö asā nup tökööl hī nö reushen hī.
11Pòn sā ngam halīöngö nö lātulöng töng panam: ngatī ṙôkö öp neūkölōn Ò nö in cha yip tö pa-ekūö tö Ò.
12Sā rôvat ngam chuhöt tö ngam sūng: ngatī rôvat tī Anga-aṅ nö ṙūöngen nup tanôichngen hī tö hī.
13Sā ngòh inyöngö nö aṙē-ĕlōn tö kūön re: ngatī ngam Mā Tēv nö aṙē-ĕlōn tö cha yip tö pa-ekūö tö Ò.
14Pòn akahalōn anga-aṅ töng yöng alaha hī: köpölōn An tö hī, höng pitung.
15Ngòh tarik pöri, höng sā kiyôp nun në sakāmö ò: sā panöpnyö ṙòng chōn an, ngatī sanīöplö an.
16Pòn lökngö kui e ngam kuföt, chaṙēviyö ngaich angū-ö: öt akahakūö ngaich angū-ö tö chūök re.
17Ngam neūkölōn ngam Mā Tēv pöri nö töng öt chanūhuvṙen, nö in cha yip tö pa-ekūö tö Ò: ngam lanöökö Ò inrē nö i yip kūön yip kūön.
18In cha yip mahaköp ngam kinlēḵngô Ò: in cha inrē yip tö köpölōn tö nup chöngö Ò nö lökö u.
19Haköpngö ngam kantēra re An ngam Mā Tēv nö el minë halīöngö: hayöng ngam pūlngö Ò inrē nö i kui taṙòkhöre.
20Hakôlò ngam Mā Tēv, yi-ö ma-aṅhānga Ò: yī-ö tö kalēḵ, mahateugngö ṙô Ò, mahangihtöre tö ṙô Ò.
21Hakôlò ngam Mā Tēv, ṙòkhöre yī-ö tömaṙôngö in Ò: yī-ö mameukṙen Ò, tö ṙāmölōn tī tö Ò.
22Hakôlò ngam Mā Tēv, ṙòkhöre yī-ö la-en Ò, i chūök nup minā-aṅ Ò nö ṙòkhöre: Ō Me-eṅ nômö chu, hakôlò Mā Tēv.
Currently Selected:
Salmai 103: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
