Salmai 102
102
Ṙô Tö Ayal Tarik Hē El Kanikngen
1Ō Mā, hang vine-eṅkūö re tö chu: hökngen ngam ṙô chu peuiny nö yih nö in meh.
2Um hayunngö kūöre tö chu hē sakāmö chu kihngen: asītö elnang re in chu; ip sakāmö hē chu havëken Meh, sapṙô chu hēṙen.
3Tön keuheūtngöre nuk sakāmö chu nöng sā lul: föngi në tangëḵ chu sā tö tameūyukūö ngòh.
4Sā nyāhaṅ kiyôp ön ngih fanöinylö chu nö fōhoh, ngaich nyangngö: ngaich chū-ö vaichngö nya-aṅkūö re.
5Tö kūö ṙô chu alūhure: panta në tangëḵ chu nö i alaha chu.
6Sā Peliken aṅ el inchōnngö: sā mingeūkö chin ip töt aṅhavkūö chūökö.
7Aṅhaṅti chin, ngaich sāngö öich i röichö: öp töng hĕng nòng nö i kui patī.
8Hĕng sumkam ṙô vē lā-al chu nö miṙēngen chu: chā-a yip mamā-ainyre nö lā-al chu, rôchiṙen tö chu.
9Pò chu nyā tisum, nö sā nya-aṅkūö: katĕh òk re inrē tö mak mat.
10Kūö ngam lanīnö Meh, tanānyö Meh inrē: pò Meh kichöötlen chu, kavalngen chu inrē.
11Sā nyat nuk sakāmö, ap törūöngö: nyangngö chin inrē ngaich sā kiyôp.
12Ō Mā Tēv, töng örheūheu pöri Öm ngöh: in yip tumkölchap nö ṙòkhöre ap kanöpölōn meh.
13Choholre Man min, aheūkölōn inrē tö Siyòn: pò e nö ngaich nö ṙētak miṙēlōn meh tö e, hôṅ, yih an nö ngaich ngam tö halēni ṙētak;
14Pò vē kūön Meh nö kuchīkölōn nö i në ihong e: aṙē-ĕlōn inrē tö në pitung e.
15Ngaich pa-ekūö min vē pumnāmö tarik tö mine-eny ngam Mā Tēv: ṙòkhöre inrē vē rācha ngih panam nö pa-ekūö tö ngam kanôlò Meh.
16Pò ngam Mā Tēv nö mānlen Siyòn: meūkö an im kanôlò re.
17Kūötenre An i vine-eṅkūö re tö tötkôlò: mikūöṙen tö vine-eṅkūöre tö cha.
18Kūichi ön min ngih nö löö in öp tumkölchap: Ha-öiny ngam Mā Tēv yip tarik tö vīlöng min.
19Pò Ò nö môktökui ngam töhet chūök re nö lātulöng: hatīön kui ngih panam An ngam Mā Tēv nö el halīöngö;
20Nö hang fanilö nômö yip tö hachēli: nö hòṅ luhlö yip tö hōtu nö kumpaha;
21Hòṅ tarik nö ve-eny mine-eny ngam Mā Tēv nö i Siyòn: öp nöinyö Ò inrē nö i Yērusalem;
22Yē yip tarik nö hamūlöre, nö lök la-en ngam Mā Tēv: tö nup pūlngö inrē.
23Hakūönngö kumlēḵ chu nö el talöökö: hacheūḵngö në sakāmö chu An.
24Ngö ṙô chin, Ō Tēv chu, uh Man kēngen chu lökngö ṙat në sakāmö chu: kamheuṅk tumkölchap nup samyeūheu Meh.
25Ṙātö rööntö ngih tumlat Man misī: vahī minë kuntī Meh, minë halīöngö.
26Payāyi nun min anū-ö, köp pöri min Me-eṅ: hôṅ, ṙòkhöre nun min anū-ö nö köinyngöre sā hilā; sā inṙīlö inyut nun min tö Meh, ngaich haṙīngöre min anū-ö.
27Höng hĕngren pöri Me-eṅ: öt kinheūṅtu minë samyeūheu Meh.
28Iṙūöhen min vē kūön vē tarik Meh: ngaich yip kulöl cha min nö köp nö i kūö Meh.
Currently Selected:
Salmai 102: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
