INCHŌḴ-OṘÔ 3
3
Inlēnö Tö Ayal Tarik
1Kūön chu, um vaichngö tö inköptöre tö chu, hökngen ngam ellōn meh pöri nö haköp në chöngö chu;
2Pò rôta sakāmö samyeūheu nômö inrē pōyen inrē lanööken tī u min nö in meh.
3Uh man ṙā-ayö tö hinang chöngö kanô-en inrē; kapòklö u i likeun meh, kūichö u i mat tömitāk ihong ellōn meh.
4Hòṅ meh min kôtökūö tö neūkölōn tölöök ineūkö inrē i kūö ngam Tēv tarik inrē.
5Keuheūttö ellōn re hayönglenre im Mā Tēv, um hayönglenre inrē i ellōn re.
6Akahan i nup tökeuheūttöre talöökö meh, ngaich anga-aṅ min nö hachip kanröönö meh.
7Um höng akaha tö elmat re; pahë-ekūö töm Mā Tēv, hapungngöre inrē ṙā-ang i tötlöök.
8Lööken tī an min angū-ö tö ngam alaha meh tinfömlö nup tangëḵ meh inrē.
9Milēḵṙen tö ngam Mā Tēv tö nup inlānen meh holtö ranehlö ṙòng nup halinten meh inrē;
10Ngaich tööḵlö min nup sök meh tö töpōyen, lakukköṅny kūö inrē nup pīp meh tö vāin.
11Kūön chu, um öt kūötenre tö talöökö la-en ngam Mā Tēv hēk um cheingö tö vinëköre tö ò,
12Tön vëkö hanāngenlōnre an ngam Mā Tēv, sā inyöngö tökūön re öp chūök kumchiklōn ò.
13Töṙāmölōn ön ngòh tarik tökôtökūö tö mikah, ngòh tarik inrē kamëḵ mikah elmat,
14Pò ngam taneūngen in e nö mötlö tö taneūngen i rupīö ngam kanôlò in e inrē mötlö tö humlum.
15Pōi ṙāi an tö yanöṅtö, ötkô nup lōn meh inrē nö hanṙongten nö in e.
16Lahāmö ò ap nômö tömarôta; latavē ò nup kanôlò ineū-eu inrē.
17Kumchikṙen nup talöökö ò, ṙòkhöre nup kanröönö ò inrē nö lanāmö.
18Chōn nômö an nö in cha yip kumṙapngö tīre nö in ò; yip tököpti tö ò kaheūkö nö töṙāmölōn.
19Lökten i mikah ngam Mā Tēv nö vītö ngam tumlat; lökten i mikah elmat anga-aṅ nö haköpngö minë halīöngö;
20Lökten i mikah ò ngam mai nö töhhaka, minë taṙul inrē nö kitaktö tacham.
21Kūön chu, haköp tökô-en mikah inkaha inrē; un hökiṙen anū-ö nö kē-ĕngre tö mat meh.
22Ngaich anū-ö min nö nômö nö ip lōn meh yanöṅtö inrē nö i likeun meh.
23Köp min me-eṅ ngaich lök el talöököre öt kavē-ĕre röön min inrē.
24Yē meh ūichngöre, öt pa-ekūö min me-eṅ yē meh ṙōlhaka, kuchik min öp inṙôhö meh.
25Um pa-ekūö tötöng vuphë ranötngö rāi, hēk yēn yih öp öt-inkôlò ngam tötlöök;
26Tön ngam Mā Tēv an min inyönglen meh lakngö kalröön meh inrē nö ötkô-òngvah.
27Um haköp tölöök in cha yip tö hòṅ lööṙu tö e, yē e nö kanô-òṅ meh la-evṙen tö e.
28Um ngö ṙô töp holre, Kuṙòh, hēk pömchö yih, huṙöich chin kētö ë yē meh höng īnu tö e.
29Uh man halēnlö tötlöök öm lāḵlö öp holre öp töng holtöṙah meh mahayönglenre.
30Un öt chööḵnyu lā-alkūö tarik, yē ò nö öt chökhuṙen tö meh.
31Un kunyaha elmat töp tarik töchökhuṙen uh inrē atöllö nup aṅ i talöökö ò;
32Tön sin-òkkūö ngam Mā Tēv an ngam tötlöök tarik, nyanatlö ò pöri ngam töchiplö.
33I patī tötlöök an ngam rinūtngövah tö ngam Mā Tēv hakôlò chūök ngam tölöök pöri anga-aṅ.
34Miyëḵṙen an nö i tömiyëḵṙen, hameuktö neūkölōn pöri nö i yāich.
35Amintö ineū-eunv an min ngòh tö-akaha, teūngen pöri tökulō-ov tö minṙēngö.
Currently Selected:
INCHŌḴ-OṘÔ 3: CANIBSI
Highlight
Share
Compare
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
