INCHŌḴ-OṘÔ 4
4
Ngam Yanöölen I Ngam Mikah
1Ō yī-ö nyīö, hang inköptöre tö yöng re, kūötenre inrē, hòṅ meh teūngen tö mikah elmat;
2Tön kē-ĕkūö meh chin tö tölöök chöngö: un ṙā-ayö ngam inköphöti aṅ in chu.
3Hē chu misī nyīö ik yöng chu kikōnyö, ayal, hĕng tak i kūö ök yöng chu kikānö,
4Hököpten chu anga-aṅ ngö ṙô inrē tö chu, Köp an yēḵ ngam ellōn meh tö në ṙô chu; haköp në chöngö chu, ngaich ngöh aṅ;
5Un vaichngö, un hapungngöre inrē tö në ṙô elvāng chu.
6Kē mikah; kē mikah elmat, uh an nö ṙā-ayö, ngaich köpti min anga-aṅ tö meh; hāngenlōn tö ò ngaich anga-aṅ min nö aṅten meh.
7Ngih ön ranehlö mikah: Hē ngam mikah öp töng yòh kahë meh, kē mikah elmat,
8Kiröngölōn tö ò, ngaich hapōilen meh min anga-aṅ eū-eu meh an min yē meh fūölan.
9Tumchöklö kui meh an min tö tövai tachöklö; kē-ĕkūö meh an min tö sapīöv tölöök.
10Kūön chu, hangihtöre hō-oṙô chu inrē, hòṅ nup samyeūheu nômö meh nö pōyen.
11Haköpten meh chin min ngaich el talöökö mikah; kanröönö töchiplö.
12Öt sānngö vanāngö man min yē meh kiröönngöre; öt kavē-ĕre man min inrē, yē meh fal.
13Köptī tö inköphöti, un hökiṙen nö kiröönngöre; aṅten ò tön nômö meh an.
14Un yôkhöt el kanröönö tötlöök, un lök el talöökö tarik tötlöök inrē.
15Haköölngö e; un lök ël e; hapungtöre tö e ngaich kiröönhökūöre.
16Tön rö-ö yip nö kô nö haṙòh yĕn öl nö chōichö la-en; chatngen inṙôhò yip yĕn öl nö fukngö tī tö töhĕng tak.
17Pò cha nö nyā nyā-aṅkūö öt lanöökö òk vāin chanökhuṙen inrē.
18Öp kanröönö tölöök pöri sā minlīlö peuheū, öp töyanglöre yanāngö inrē söl ip sakāmö.
19Sā tökufëi sinngūlö ngam talöökö tötlöök; öt akahakūö cha-a tö kinvēngö röönre.
20Kūön chu, kūötenre tö në ṙô chu; asītö el nang re tö ṙô chu ṙô-òv.
21Hökngen u nö un kē-ĕngre nö i kūö meh; haköpngö u lā ellōn meh.
22Tön nômö ò nun öp tökôtökūö tö u, lanööken nup alaha ò inrē.
23Haköp ellōnre i hinöngöre; tön löknyö in e ap nö hëmnyi mak nômö,
24Ṙāngö tökuròk ṙô in meh, ṙāngö töchavīṙa ṙô inrē nö marôvat tö meh.
25Hökngen minë mat meh nö ngëichkö lā-urĕh, hachip kūö matre inrē me-eṅ ngëicha.
26Haṙēmngenre tö kanröönö röön meh, ngaich köp min nup talöökö meh.
27Um katöngaṙen tö lahāmö hēk latavē; kānngö röönre ṙā-ang im tötlöök.
Currently Selected:
INCHŌḴ-OṘÔ 4: CANIBSI
Highlight
Share
Compare
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
