KAMHÔKA 8
8
Manā-aṅ Ötkanò-òṅ Yik Aṅ Mītīā
1Ngaich yik tarik Ifrēm nö ngö ṙô tö ò Kitīön, Kūöyòh öm ngatī inlahen tī tö ih, öm öt havëken ih hē meh kiröönngöre kiyung lā-al yik aṅ Mitiā? Ngö ṙô cha-a nö kësô nö vëken ò. 2Ngaich ngö ṙô anga-aṅ tö cha, Asuh öp tī chu töngamuh öp töṙongta nö i tī yīö? Röh öng ngam nyinūmö ṙòng vāin tö Ifrĕm nö ĕhten tö inmūlö ṙòng vāin tö Apiēsar? 3Ngaich an yih ngam Tēv nö kētö eltī yīö tö nap rācha aṅ Mitiā, Ōrap Sīp inrē: asuh ap la-en chu chū-ö tökô tö ṙongta nö i la-en yīö? Ṙātöre lanīnö cha-a ngaich nö in ò, hē ò nö ngatī ṙô tö e.
4Sölta ngaich Kitīön nö i Yôtön, havāngngöre ngaich anga-aṅ tö yik tarik tölūöyòng hol ò, öt kalē-en, höng iṙūöhöṙöön nö lūḵ. 5Ngaich ngö ṙô anga-aṅ tö yik tarik aṅ Sakòt, Vë-ekūö yīö chin, kē-ĕkūö vē tarik yin tö ṙôti vē hol chu; tön ngaich yin nö öt kalēḵ alaha, ṙònghöichṙen chū-ö inrē lūḵu Sēpāh, Salmuna inrē rācha aṅ Mitiā. 6Ngaich ngö ṙô yik rācha aṅ Sakòt, Ngaich nup kël nā Sēpāh nāṅ Salmuna nö eltī meh, töp lökten hī hōtu kētö nyā-aṅkūö më kumyung in meh? 7Ngaich ngö ṙô Kitīön, Lökten hē ngam Mā Tēv nö kēten nā Sēpāh nāṅ Salmuna nö eltī chu, ngaich chū-ö min chiṙës minë alaha yīö aṅtī tö pikōḵ nup elinchōn aṅtī tö nup töchökhu pak inrē kun chōn. 8Ṙā-ang umuh ngaich anga-aṅ nö kiröönngöre nö chuh Penūel, ngaich ngatī ṙô nö vë-ekūö cha: ngaich yik tarik aṅ Penū-el nö sap ṙô ò nöng sā ṙô yik tarik aṅ Sakòt. 9Ngaich inrē anga-aṅ nö ngö ṙô tö yik tarik aṅ Penū-el, Yē chu min yih hēk i lanāmö, tiṙölngö ngih chūök chamông chū-ö min.
10I Karkōr ngaich nā Sēpā nā Salmuna, hol cha yik kumyung in cha, lohten nö taneui sīön köny tarik, ṙòkhöre yik chööḵ yik kūön aṅ lā chuhöt kumyung: pòn hēngòng nët anāi köny tarik töfëlu eltī yik töfukngö. 11Ngaich Kītīön nö kiröönngöre nö lök el talöökö cha yik mi-iyöng el inrūkui lā chuhöt tö Nôpāh, Yokpeha, fël yik kumyung ngaich; pò yik kumyung nöng nyatlö lōn töre. 12Pāngö ngaich nā Sēpāh nā Salmunā; lūḵu cha ngaich anga-aṅ; ngaich kô-òngvah tī tö nak rācha tö nët tak aṅ Mītiā, Sēpāh, Salmunā inrē, pahe-ekūö tī inrē nö ngaich tö yik kumyung nö ṙòkhöre.
13Ngaich Kitīön ök kikōnyö kūön Yôas nö havan nö ṙā-ang im kinyūngö nö ṙā-ang ip paneūlö Heres. 14Hĕng tak kahë ngaich anga-aṅ tö ṙālö tarik nö i yik tarik aṅ Sakòt, ngaich hatönö ò: ngaich anga-aṅ nö vë-eny nang ò tö sanökö yip rācha aṅ Sakòt, yip mā in e inrē, sat anāi sat tak tarik. 15Yih ngaich anga-aṅ nö in yik tarik aṅ Sakòt, ngaich ngö ṙô, Yĕh meuk nā Sēpāh nā Salmunā nan nā löknyô yīö minūöṙô tö chu öi ngö ṙô, Ngaich nup kël nā Sēpāh nā Salmunā nö eltī meh, töp lökten ih hōtu kētö nyā-aṅkūö yip tarik meh yip töcheingö? 16Kē yik mā ngam elpanam anga-aṅ ngaich kē pikōḵ inrē tö nup kun chōn töchökhu pak nö elinchōn aṅtī tö u ngaich anga-aṅ nö haköptö yik tarik aṅ Sakòt. 17Tiṙölngö öp chūök chamông inrē anga-aṅ i Penū-el, fëlngö yik tarik inrē aṅ ngam elpanam.
18Ngaich ngö ṙô anga-aṅ tö nā Sēpāh nā Salmunā, Tö sitih inlahen yik tarik yik töfëli tö yīö i Tapōr? Ngaich cha-a nö sap ṙô, Sā meh, ngatī cha-a; kö sā kūön rācha yik. 19Ngaich ngö ṙô anga-aṅ, Hanöng kisānö chu yik Ō mā kikōnyö kūön öp yöng kikānö: sā ngam Mā Tēv nö tö-aṅ, yē yīö öre hayööken cha nö aṅ, öt hō öre chū-ö fëlngen yīö. 20Ngaich ngö ṙô anga-aṅ tö Yētör ök lanòh kūön ò, Choholre man fëlngen cha. Hö-ö pöri ök ṙāl tarik nö hōknyö ök fëlre: pò ò nö pa-ekūö, pòn ṙòngmö tö-ayāl. 21Ngaich ngö ṙô nā Sēpāh nā Salmunā, Choholre man me-eṅ, kētö tīre in ai: tön sā ṙētöre ön ngòh tarik, ngatī öp kumlēḵ ò. Choholre ngaich Kitīön ngaich fëlngen nā Sēpāh nā Salmunā, kē nuk minkahngö rācha inrē nuk mi-ilikeun nuk ūṅt.
22Ngaich yik tarik Israĕl nö ngö ṙô tö Kitīön, Hayöngö ih man yēḵ, nā-aṅ nyöre, tö ngam kūön meh kikōnyö, töp kikōnyö inrē kūön ngam kūön meh: tön ngaich man hayööken ih ṙā-ang eltī yip aṅ Mitiā. 23Ngaich Kitīön nö ngö ṙô tö cha, Hö-ö chin hòṅ hayöngö yīö, öt rēhĕn min ngòh kūön chu kikōnyö nö hayöngö yīö; ngam Mā Tēv an min mahayöngö yīö. 24Ngaich Kitīön nö ngö ṙô tö cha, Hĕng öp lōn chu havëkö chu in yīö, öich hōten yīö kö kētö nup inlöknang yip pôḵre. (Pò cha-nö inlöknang tö humlum, pò cha nö aṅ Isma-el.) 25Ngaich sap ṙô cha-a nö ngö ṙô, Holtö ellōnre in kēten u. Haṙĕh tö hilā cha-a ngaich, ngaich kö kavaltö nuk inlöknang yik pôḵre. 26Ngaich ök lumngan nuk humlum inlöknang nuk havëkö ò nö hĕng köny sātòng siköl nö humlum; nö hol re tö nup minkahngö rācha, tö nuk hanūöt tökinlölukūö, nuk tö amëla mat töhuṙing hilā mī-i alaha yik rācha aṅ Mitīa, hol tö nuk sayōk mi-i likeun nuk ūṅt cha. 27Ngaich Kitīön nö vī efòt nö in u, vīten e ngaich nö ik elpanam ò, i Òfra: ngaich ṙòkhöre yik aṅ Israĕl nö akīṙö e nö umuh: ngaich angū-ö nö inṙöingövah Kitīön töp patī ò inrē. 28Ngaich yik Mitīa nö tumṙeūtu nö i kūö yik kūön Israel, ngaich öt hēk cha-a nö hachônglö kuire fën anāi samyeūheu ngaich ngam panam nö chēvhakṙen irô-ôtö sakāmö Kitīön.
Kinpāha Kitīön
29Ngaich ang Yērūpē-al ök kikōnyö kūön Yôas nö kiröönngöre ngaich iyöng el öp patī re. 30Sat anāi yik kikōnyö kūön Kitīön lamöknyö alaha ò: pò ò nö maṙôngö pīhö. 31Kūönu inrē ök pīhö ò ök i Sikem tö kikōnyö, Apimelek ök mine-eny ò nö kaheūkö tö ò. 32Ngaich kapah ang Kitīön ök kikōnyö kūön Yô-as nö i kanöönyö, lāpi ngaich nö i kui kupah ök kikōnyö yöng ò Yô-as, i Òfra öp aṅ in yip Apiēsör.
33Ngaich hē Kitīön nöng kapah hë, ngaich hēk yik kūön Israĕl nö havantenre nö tömkörit Pē-al, ngaich vīlen Pē-alperit nö tēv cha. 34Öt köpölōn ngaich yik kūön Israĕl tö ngam Mā Tēv nö Tēv cha, ngam ṙamānyen cha nö ṙā-ang eltī yip lā-al cha nö keuheūtngöre lā-a: 35Öt rēhĕn cha-a nö hameuktö neūkölōnre nö i patī Yērūpē-al, ang Kitīön, nö sā nuk tölöök hameuktö ò nö in Israĕl.
Currently Selected:
KAMHÔKA 8: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
