KAMHÔKA 9
9
Apīmëlek
1Ngaich ang Apimelek ök kikōnyö kūön Yērūpē-al nö chuh Sikem nö i yik kanônyö ök yöng ò kikānö, ngaich vë-ekūö cha, nö ṙòkhöre yik aṅ patī ök yöng ök yöng ò kikānö nö ngö ṙô, 2Vë-ekūö yīö chin, vëhet elnang yip tarik yin aṅ Sikem nö ṙòkhöre yē e nö tölöök nö in yīö tö yip kikōnyö kūön Yērūpē-al nö ṙòkhöre nö hayöngö yīö yip tösat anāi tum tak, hēk inrē yĕn höng hĕng tak öp mahayöngö yīö? Köpölōn inrē tö chu chū-ö öich tangë yīö alaha yīö inrē. 3Ngaich vënyô ò yik kanônyö ök yöng ò kikānö nö elnang yik tarik aṅ Sikem nö ṙòkhöre tö në ṙô: ngaich nuk ellōn cha nö lā i tinömörit Apimelek; pòn ngö ṙô cha-a, Hanöng kisānö hī öp anga-aṅ. 4Ngaich sat anāi nuk rupīö kahëtö cha nö in ò aṅ el patī Pē-alperit aṅtī tö u ngaich anga-aṅ nö haṙāi yip töng kulō-ov tarik, nö mī-in ò. 5Ngaich anga-aṅ nö chuh patī ök yöngre kikōnyö i Òfra, ngaich fëlngö yik hanöng kisānöre kikōnyö kūö Yērūpē-al sat anāi tum tak, nö i kui töhĕng ihong: öt kô-òngvah pöri ang Yôtam ök manāngö kikōnyö kūön Yērūpē-al; pò ò nö hayunngöre. 6Hamūlöre ngaich yik tarik aṅ Sikem nö ṙòkhöre, ṙòkhöre inrē yik aṅ patī Milō, kiröönngöre ngaich nö vīlen Apimelek nö rācha, nö i röön tö öp ōk ip chūök kumyung i Sikem.
7Ngach hē cha nö ve-eny e nö in Yôtam, kiröönngöre ngaich anga-aṅ ngaich söktöre nö i kui öp ṙôngö Kerisim, hachônglöṙôre ngaich anga-aṅ nö hū-a, nö ngö ṙô tö cha, Yī-ö tarik aṅ Sikem hangihtöre yin tö ṙôchu hòṅ yīö hāngö ṙô tö ngam Tēv. 8Hĕng heuh nun në chōn nö kiröönngöre nö hacham el kui öp rācha nö hayöngö u; ngaich ngö ṙô cha-a tö ngam ôliv chōn, Hayöngö ih man. 9Ngaich ngö ṙô ngam ôliv chōn tö cha, Ṙāngö ngih tö tum-eūm öich min alahare, tö cha ṙung nö lökten in chu nö eū ngam Tēv, tarik inrē, ngaich kiröönngöre min hòng öich kuvāi rōire i kui në chōn? 10Ngaich ngö ṙô nuk chōn tök fik chōn, Tā-a me-eṅ hayöngö ih. 11Ngö ṙô pöri tö cha ök fik chōn, Ṙāngö ngam pinchāköre öich min, ngih tökôlò ṙòng chu inrē, ngaich kirööngngöre öich kuvāi ṙōi re i kui minë chōn? 12Ngaich ngö ṙô minë chōn tö ngam vain, Tā-a me-eṅ, hayöngö ih. 13Ngaich ngö ṙô ngam vain tö cha, ṙāngö ngam mak alahare öich min ngam töṙāmölōn tī tö ngam Tēv, tarik inrē, ngaich kiröönngöre öich kuvāi rōire i kui minë chōn? 14Ngaich ngö ṙô nuk chōn töp töchökhu kaha chōn, Tā-a me-eṅ hayöngö ih. 15Ngaich ngö ṙô ök töchökhu kaha tö nuk chōn, Yē yīö kô-en hacham elkui chu rācha yīö, ngaich tā-a hayönglenre el nyat chu: ngaich yē yīö hö-ö, hökngen öp tameūyö löknyö im töchökhu kaha, nö haṙāpngö nup sitör i Lepanön.
16Lökten, yē yīö kô-en inlaha chiplen inrē, i tī yīö vīlen Apimelek nö rācha, yē yīö inrē löökö tī in Yērūpē-al i patī ò inrē, ngaich inrē öi asā nuk lā-en kahëken ò; 17(Pò ök yöng chu nö kiyunglö kui yīö, hakihten nômöre inrē, ṙānyen yīö inrē ṙā-ang eltī yip aṅ Mītiā: 18Ngaich yī-ö töngamuh choholre lā-al patī ök yöng chu, keuheūtngöre vah tī ngaich öi fëlngö yik kikōnyö kūön ò, sat anaī tum taka, i kui ök töhĕng ihong, ngaich vīlen Apīmelek nö rācha i kūö vē tarik aṅ Sikem, öp kikōnyö kūön öp mahalanṙen ò kikānö, pò ò nö hanöngkisānö yīö:) 19Yē yīö ngaich kô-en löökö tī chiplen tī inrē in Yērūpē-al ip patī ò inrē töngamuh, ṙāmölōn yin yēḵ ngaich in Apimelek, hökngen ò inrē anga-aṅ nö ṙāmölōn nö in yīö: 20Yĕn rö-ö pöri, hökngen öp tameūyö nö löknyö in Apimelek nö tōttörekūö, ngaich haṙāpngö yip tarik aṅ Sikem, töp patī Mīlō inrē; hökngen öp tameūyö inrē nö löknyö in yip tarik aṅ Sikem nö tōttörekūö löknyö i patī Mīlō inrē, nö haṙāpngen Apimelek. 21Falngöre ngaich Yôtam, ngaich meutngö, ngaich chuh Pīr, iyöng in e ngaich, kūö pinhë-eṅkūöre tö Apimelek ök mëm ò.
22Lūöi samyeūheu ngaich Apimelek nö rācha kūö Israĕl, 23Ngaich ngam Tēv nö tīntö öp tötlöök sī-ö nö ihôi Apimelek tö yip tarik inrē aṅ Sikem; ngaich yik tarik aṅ Sikem nö ulāingö vah lōnre tö Apimelek: 24Hòṅ ök chanökhuṙentī ò tö yik tösat anāi kikōnyö kūön Yērūpē-al nö yih, hòṅ ṙātu nö i kui Apimelek öp hanöng kisānö cha, ök famëlngen cha, i kui yip tarik inrē aṅ Sikem, yip mahangëlö kël ò nö fëlngö yik hanöng kisānöre. 25Ngaich yik tarik aṅ Sikem nö ṙātö tarik töminyôinyaṅ nö hayūnan nö i kui nuk rôngö, ngaich cha-a nö ulāingen yip tarik lamök in cha: vënyu nang ngaich Apimelek tö e.
26Ngaich ang Kā-al ök kikōnyö kūön Epet nö holtö yik hanöng kisānöre nö kiröönngöre ngaich havāngngöre nö chuh Sikem: ngaich yik tarik aṅ Sikem nö hayönglenre nö in ò. 27Kiröönngöre ngaich cha-a nö el kahôiyö, ngaich hamūl ṙòng nup vāinre, ngaich karānnyö nuk ṙòng vāin, ngaich ha-öiny ngam tēvre, chuh el patī öp tēvre cha-a inrē, nyā ngaich ka-eūt inrē, rūtngövah Apimelek ngaich. 28Ngö ṙô ang Kā-al ök kikōnyö kūön Epet, Achīö ap kan Apimelek, achīö inrē Sikem, töp lökten hī kūön alaha? Röh öp kan anga-aṅ nö kikōnyö kūön Yērūpē-al? Yöngṙen kumyung ò inrē Sīpūl? Kūön alaha yip tarik Hamôr öyih ök kikōnyö yöng Sikem? Kūöyòh ṙöng öi ayī-ö min kūön alaha ò? 29Eltī chu yin öre vē tarik yē lōn ngam Tēv! ngaich möl öre chū-ö kēngen Apimelek. Ngaich ngö ṙô anga-aṅ tö Apimelek, Ṙūöhöl ṙôken yip kumyungre man, tā-a kunyī-inre.
30Ngaich hē Sīpūl ök mahayöng ngam elpanam nö hang në ṙô Kā-al ök kikōnyö kūön Epet, hūlökūö tanānyö ngaich anga-aṅ. 31Ulāikenre ngaich anga-aṅ nö tīnngö ma-ahānga nö in Apīmelek nöngö ṙô Yĕh meuk yih öp Kā-al nö i Sikem, öp kikōnyö kūön Epet tö yip hanöng kisānö ò; ngaich yip inrē nö hōten ngam elpanam nö lā-al meh. 32Lökten, choholre tö hatööm, më-eṅ tö yip tarik in meh, hönga öi el töngāṙö: 33Ngaich mīnö, ip peuheū, i saha maneutlö ngam tavūöi, ka-euilökūö më-eṅ choholre, rultöre ngaich kiyung ngam elpanam: ngaich yē ò tö yip tarik hol ò inrē nö kunyī-inyre nö lā-al meh, ngaich më-eṅ tinī-iv tö cha ip töng huneū-enre hē e.
34Choholre ngaich Apimelek tö hatööm tö yip tarik hol ò, ngaich hayūnö Sikem nö fën kiteūm. 35Kunyī-inyre ngaich Kā-al ök kikōnyö kūön Epet, söklöre ngaich nö ik lökhöt inkūp ök elpanam: choholre ngaich Apīmelek tö yik tarik inrē hol ò, nö ṙā-ang im chūök cha nö hayunngöre. 36Ngaich hē Kā-al nö meuk yik tarik, ngö ṙô anga-aṅ tö Sīpūl, Yĕh meuk, peūtöre yin më tarik nö ṙā-ang kui minë rôngö. Ngaich ngö ṙô Sīpūl tö ò, Höng meuk nyat minë rôngö man nö sā tarik. 37Ngaich hēk Kā-al nö ṙô-òv nö ngö ṙô, Yĕh meuk löktö ellōn ngam panam yin më tarik nö peūtöre, hĕng kiteūm më yamih löktö im Tērapim i Minōnenim. 38Ngaich ngö ṙô Sīpūl tö ò, Isuh ap elvāng meh nö ngaich, më-eṅ öm tö ngö ṙô, Achīö ap Apīmelek, töp lökten hī min kūön alaha ò? Röh aich nö vē tarik vē töha-āchiṙen tö meh? Kunyī-inyre man kuṙòh töngamuh, vë-ekūö meh chin öm kiyūngö cha. 39Kunyī-inyre ngaich Kā-al i kūö yik tarik aṅ Sikem ngaich kiyūngö Apīmelek. 40Lūḵ an ngaich Apīmelek, urēhĕkūö ò ngaich anga-aṅ nö falngöre, ngaich pōyen yik töfukngö tönyahaṅvö, uroh nö sölta nö ip lökhöt kūö inkūp. 41Ngaich iyöng Arumah ang Apīmelek: ngaich Sīpūl nö ahōngen Kā-al tö yik hanöng kisānö ò, pòn sōten cha nö iyöng Sikem.
42Ngaich im huṙöch, yip tarik nö kunyī-inyre nö elkahôyö; ngaich vë-eny nang Apīmekek cha-a. 43Ngaich kē yik tarik anga-aṅ, harēvö cha ngaich nö lūöi kiteūm, ngaich ṙātö hamöng nö hayun nö el kahôyö; ngëicha ngaich anga-aṅ ngaich meuk yik tarik nö kunyī-inyre nö ṙā-ang ngam elpanam; choholre ngaich anga-aṅ nö lā-al cha ngaich fëlngen cha. 44Ngaich Apīmelek, tö yik hol ò inrē tökiteūm haka, nö siyöötöre nö kū-ötö lākūö, söktöhech ngaich nö ik lökhöt kūö inkūp ök elpanam: hayittöre inrē yik tö nët kiteūm nö in yik elkahôyö ngaich fëlngen cha. 45Hĕng sumkam ang Apīmelek nö kiyung ngam elpanam; Kē ngam elpanam ngaich anga-aṅ, fëlngö yik tarik inrē ël e tiṙölngö ngam elpanam inrē ngaich piṙōng ël e tö sāl.
46Ngaich hē yik tarik nö ṙòkhöre nö hāngö e nö el öp chūök chamônga i Sikem, meuthöt cha-a ngaich nö el kinluhu ök patī Elperit. 47Ngaich vënyu nang Apīmelek tö e tö yip tarik el ngam chūök chamônga nö mūlhakaṙen. 48Peūlöre ngaich Apīmelek nö i kui öp rôngö Salmòn, ṙòkhöre yip tarik inrē nö hol ò; kē hanīöng ngaich ang Apīmelek nö eltīre, ngaich ṙaltö pak nuk chōn, kē-ĕ e ngaich keūnö e nö elranôṙöre: ngö ṙô inrē anga-aṅ tö yik tarik yik hol ò, Nup maheuṅk yīö inlaha chu, ka-eūnyen asīnken chu. 49Ngaich ṙòkhöre yik tarik nö ngatī nö kö ṙaltö pak, ngaich tömrit Apīmelek, ṙātö u ngaich nö i kūö ök kinluhu, ngaich tōttökūö ök kinluhu cha-a tö tameūyö, ngaich lökten yik tarik nö ṙòkhöre el ök chūök chamônga i Sikem nö kapah inrē, hĕng köny kikōnyö kikānö inrē.
50Chuh Tēpes ngaich ang Apīmelek ngaich iyöngtöre nö lā-al Tēpes, ngaich kĕ-e e. 51Hĕng pöri ök umuh töngëḵ chūök chamônga ellōn ngam elpanam, in e nö ṙòkhöre kikōnyö kikānö inrē nö falngöre, ṙòkhöre cha-a inrē yik aṅ ngam elpanam, ngaich öp ngö kūöre, yônlö inrē cha-a nö i uk ök chūök chamônga. 52Yihtöre ngaich Apīmelek nö ik chūök chamônga, kiyūngö e ngaich, ngaich yāha ranöhta nö i inkūp ök chūök chamônga nö hòṅ tōttökūö e tö tameūyö. 53Ngaich hĕng tak ök kikānö samuk tö kui Apīmelek tök ihong kōiny tinlön atra ngaich likuknyö elkui ò. 54Kurāten ngaich anga-aṅ nö havëtö ök ṙālö tarik kameunkö ök lanaklö ò, ngaich ngö ṙô tö ò, Hōknyö ap sanëtre man, fëlngen chu, hòn öt ngö ṙô tarik min tö chu, Fëli ök tö kikānö. Ngaich ök tarik ò ṙālö nö sapngen ò, kapah ngaich anga-aṅ. 55Ngaich hē yik tarik Israĕl nö meūkö Apīmelek nö kapah kö kiröönngöre ngaich cha-a nö i chūökre. 56Ngati tī ngam Tēv nö havahal öt lanöökö Apīmelek, tök tī ò tök yöng ò kikōnyö, i finëlngö yik tösat anāi 57Ṙòkhöre hanöng kisānö ò: inrē nuk öt lanöökö yik tarik aṅ Sikem nö havëka tö ngam Tēv nö i kui cha: teunghö kui cha inrē öp rinūtngövah tö Yôtam ök kikōnyö kūön Yērūpē-al.
Currently Selected:
KAMHÔKA 9: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
