KAMHÔKA 4
4
Tipōrā Nāṅ Parök
1Ngaich hēk yik kūön Israel nö la-evṙen tö tötlöök nö i kūöngam Mā Tēv, hē Ēhöt nö ngaich nö kapah. 2Inyihngen cha ngaich ngam Mā Tēv nö eltī Yāpin rācha aṅ Kanā-an, ök mahayöng nö i Hāsör; yöngkūö yik aṅ in ök kumyung ang Sīsēra, ök mi-iyöng Herōsethakoim in yip tahëng mihëṅṙö. 3Peunyhökūö ngam Mā Tēv ngaich yik kūön Israel: pòn machūötör ṙòng inröl anga-aṅ tövët; ngaich nët anāi samyeūheu anga-aṅ nö ka-lēḵ nö hakihten yik kūön Israel.
4Tīpōra ök hē e, pròfĕt nö kikānö, ök pīhö Lapitòt, anga-aṅ mahayöngö Israel ik hē e. 5Iyöng elkatòh kachūr Tīpōra anga-aṅ ihôi Rāma tö Pētĕl ip rung panam Ifrēm: yihtöre yik kūön Israel nö in ò i inkaha fālen. 6Ngaich anga-aṅ nö tīnngö maha-vëken Zērak ök kikōnyö kūön Apinōam nö ṙā-ang Katesnaftalī, ngaich ngö ṙô tö ò, Röh ang ngam Mā Tēv, ngam Tēv Israĕl, nö chöngu, nö ngö ṙô, Kuṙòh ṙūötöre im ṙôngö Tapōr, söm köny kahë tö tarik nö hol meh in yip kūön Naftalī kūön Sepulòn inrē? 7Ngaich chū-ö min ṙūöten Sisēra nö in meh ip tahël Kis1on, öp yöngkūö yip kumyung aṅ in Yapin, nö holtö nup inröl ò tö yip tömaṙôngö in ò inrē; ngaich kēten ò chū-ö min nö eltī meh. 8Ngaich ngö ṙô Pērak tö ò, Yē meh kiröönngöre in chu, möl chū-ö min kiröönngöre yē meh öt kiröönngre in chu, hö-ö chū-ö min kiröön-ngöre. 9Ngaich ngö ṙô anga-aṅ Öthōḵ chin öt kiröönngöre in meh: ngaich pöri ngam kinröön-ngö meh min nö öt ineū-eu meh: pò ngam Mā Tēv min nö inyihten Sīsēra nö eltī öp hĕng tak kikānö. Choholre ngaich Tīpōra, ngaich kiröönngöre nö in Pērak nö chuh Katēs. 10Ngaich Pērak nö havëten Sepulòn nö holre tö Naftalī nö i Kates; söm köny yik tarik umuh i röön ò nö kiröönngöre: kiröönngöre inrē Tīpōra nö in ò.
11Hē e ang Hīpör ök aṅ Kēnait nö haköhngenre tö yik aṅ Kēnait, nö ṙā-ang in yik kūön Hōpāp ök yöng pīhö Môsös, ngaich vītö inrū kuire nö sā rôvat ök Tarpin nö i Sē-ananim ök töröhta nö i Katēs.
12Ngaich cha-a nö ve-eny nang Sīsēra ök kīkōnö Apīnōam tö ò nö ngaich nö i kui öp rung Tapōr. 13Ngaich Sīsēra nö hamūl nuk inrölre nö ṙòkhöre, nuk tö machūötör ṙòng vët inröl, yik tarik inrē in ò nö ṙòkhöre, löktökūö Hëròsethakoim in yip Tahëng mihëṅṙö, söl ip tahël Kisòn. 14Ngaich ngö ṙô Tipōra tö Pērak, Hōklöre; tön ngih ön sakāmö hē ngam Mā Tēv nö kēten Sīsēra nö eltī meh: röh ṙöng ang ngam Mā Tēv nö ngaich nö urēhĕkūö meh? Lökten Pērak nö ngaich nö peūtöre nö ṙa-ang kui ap rung Tapōr, tömrit ò inrē yik tösöm köny tarik. 15Ngaich ngam Tēv nö öt kô-òtī tö Sisēra, tö nuk inröl ò, tö yik kumyung ò inrē nö nyaha tö fël nö i kūö Pērak; ngaich Sisēra nö yôkti nö ṙā-ang el ök inrölre, falngöre ngaich nöng kiröön. 16Lūḵ nuk inröl pöri ang Pērak, tö yik kumyung inrē, nö söl Herōset yip Tahëng mihëṅṙö: Ngaich ṙòkngöre vah yik kumyung in Sīsĕra nö fukngö tö kūö sanët; öt hĕng tit tak tarik tö ōtre.
17Ngaich pöri Sīsēra nöng kiröön nö falngöre nö söl ik rūkui Yā-ĕl ök pīhö Hīpör ök aṅ Kēnait: pòn lāmhen höö tö Yapin ök rācha aṅ Hasōr tö ngam patī Hīpör inrē ök aṅ Kēnait. 18Kunyī-inyre ngaich Yā-ĕl nö höngkūö Sisēra, ngaich ngö ṙô tö ò, Kuhēthötre man, mā chu, kuhēthötre in chu; un pa-ekūö Kuhēthötre ngaich anga-aṅ nö in ò nö el rūkui, ngaich anga-aṅ nö kahumngen ò tö pileng. 19Ngaich anga-aṅ nö ngö ṙô tö Ya-ĕl, Ve-ekūö meh chin, kētö mak man rahëchyen òk chu; tön haṙehe nômö chin. Ngaich anga-aṅ nö löpnyökūö öp pilön aṅteh, ngaich kētö òk ò, ngaich kahumngen ò. 20Ngaich ngö ṙô anga-aṅ tö Ya-ĕl, sökhak man im inkūp ngam rūkui, ngaich mīnö, yĕn tarīku yamih nö hatönö meh nö ngö ṙô Tarīku hòng ihih, ngaich ngö ṙô pömchö min. Hö-ö. 21Ngaich ang Ya-ĕl ök pihö Hīpör nö hēngö kahë tök tumnôkö rūkui, ngaich kēḵ ök mūngöre nö eltīre, hiṙeūtkö röön re ngaich nö chuh in ò, tōktökūö ök tumnôkö ngaich nö el kui ò, ngaich tafunköti kūö angū-ö nö el tumlat: pòn lapat anga-āṅ nö haṙòh. Kirātöre ngaich anga-aṅ ngaich kapah. 22Ngaich, yĕh meūkö Pērak nö lū-u Sisërā, kunyī-iny re ngaich Ya-ĕl nö höngkūö ò, ngaich ngö ṙô tö ò, Ta-ih, töich hameukhömat meh töp tarik chahöh meh. Ngaich yihtöre anga-aṅ nö in ò, ngaich, yĕh meūkö Sisërā ṙōlhaka nö kapah el kui ò inrē ök tumnôkö rūkui.
23Ik sakāmö angū-ö ngam Tēv nö tumṙeūten Yapin ök rācha aṅ Kanā-an nö i kūö yik kūön Israĕl. 24Mihôiṅyö kël ngaich yik kūön Israĕl nö ṙuhölre nö lā-al Yapin ök rācha aṅ Kanā-an, hanöng saha tī cha nö hatngö tī tö Yapin ök rācha aṅ Kanā-an.
Currently Selected:
KAMHÔKA 4: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.