KAMHÔKA 3
3
Tököp Pumnamö Tarik Nö Im Panam
1Vē yin punāmö tarik töṙātu tö ngam Mā Tēv, nö kinlaha Israĕl tö cha, i tumtak cha nö töt-akahalōn tö nuk kinyūngö i Kanā-an; 2Hòṅ yip tumköl chap yip kūön Israĕl nö huveū-en, nö haköpten cha tö kinyūngö, in cha yip töt akahalōn nö lā-urĕh; 3Vē tö taneui tak mā kūö Fillistian, ṙòkhöre inrē aṅ Kanā-an, Sītōn, yik Hivait inrē ip rung Pē-al Harmòn söl ip lökhöt i Hamat. 4Acha-a yin kinlaha Israĕl, nö minkahtölōn yē cha min nö hang nup chöngö ngam Mā Tēv, nuk tinöölô yik muvöhngö cha tö ò nö löktö eltī Môsös. 5Ngaich yik kūön Israĕl nö iyöng nö in yik aṅ Kanā-an; Hitait, aṅ Amôr, aṅ Përis, aṅ Hiyi, aṅ Yëpus inrē: 6Ngaich cha-a nö kē yik kūön cha kikānö nö pīhö cha, kētö yik kūönre cha-a inrē kikānö nö pīhö yih kūön cha kikōnyö lök la-en nuk tēv cha inrē.
Otnīöl
7Ngaich yik kūön Israĕl nö la-evṙen tö tötlöök nö i kūö ngam Mā Tēv, ngaich vaichngö tö ngam Tēv cha ngam Mā Tēv, lök la-en nup Pē-al ngaich tö nup Asēròt inrē. 8Lökten ngam lanīnö ngam Mā Tēv nö tōttöre kūö nö in Israĕl, ngaich inyihngen cha anga-aṅ nö eltī Kusānrisaēm rācha aṅ Mesopotamiā: ngaich yik kūön Kusānrisatēm. 9Ngaich yik kūön Israĕl nö peunyhökūö ngam Mā Tēv, hĕng tak hachohlö ngaich ngam Mā Tēv tö mahayööken yik kūön Israĕl, ök mahayööken cha, ang Otnīĕl ök kikōnyö kūön Kēnās, ök manāngö kahëm Kalĕp. 10Teungtöre ngam fanöinylö ngam Mā Tēv nö i kui ò, ngaich akahfālen Israel anga-aṅ; kiröönngöre inrē anga-aṅ nö kiyung, ngaich ngam mā Tēv nö kēten Kusānrisatēm nö in ò; mihôiṅ anga-aṅ nö lā-al Kusānrisatēm. 11Fën anāi samyeūheu ngaich ngam panam nö heū-heure. Ngaich Otnīĕl nö kapah ök kikōnyö kūön Kēnās.
Ēhöt
12Ngaich hēk yik kūön Israel nö la-evṙen tö tötlöök nö i kuö ngam Mā Tēv: ngaich ngam Mā Tēv nö hangëlen Ĕklòn ök rācha aṅ Mô-āp nö lā-al Israel, pòcha nö kēken tötlöök nö i kūö ngam Mā Tēv. 13Ngaich anga-aṅ nö hamūl yik kūön Amön nö in ò kūön Amelek inrē; kiröönngöre ngaich anga-aṅ ngaich kiyūngö Israĕl, ngaich kē ngam elpanam kachūr, cha-a. 14Hëvhör sīön samyeūheu ngaich yik kūön Israel nö kūön Ĕklòn ök rācha aṅ Mô-āp.
15Hē yik kūön Israĕl pöri nö peunyhökūö ngam Mā Tēv, ngaich hĕng tak hachohlö ngam Mā Tēv tö mahayööken cha, tö Ēhöt ök kikōnyö kūön Kēra, ök Penyamin, tötavē nö tarik: ngaich yik kūön Israĕl nö sööm-ngö raneushö Ĕklòn ök rācha aṅ Mô-āp, nö kum ò. 16Vī sanëtre ngaich ang Ēhöt tök tö-āṅngöre keūtö, töhĕng sukmôngö rôta; hīötlen ò ngaich anga-aṅ nö el inyut ò i lāhāmötakeun ò. 17Kētö ök raneushö anga-aṅ ngaich nö in Ĕklòn ök rācha aṅ Mô-āp: tökiröng alaha ök Ĕklòn nö tarik. 18Ngaich hē ò nö keuheūtötī nö kētö ök raneushö, tīnngörit yik tarik ngaich anga-aṅ yik tö kum tök raneushö. 19Havantöre pöri anga-aṅ nö ṙa-ang i nup chūök vinī-ī insā tēv ihong nuk mī-i Kilkāl, ngaich ngö ṙô, Ō rācha, kūmuṙen chin in meh töp tö ulāikaṙen ṙô. Ngaich ngö ṙô anga-aṅ, Un ṙô-òv. Ngaich ṙòkhöre yik mī-in ò tösökhakṙen nö ṙāngen ò nö kunyī-inyre. 20Yihtöre ngaich Ēhöt nö in ò; ūichhakṙen anga-aṅ nöng hĕng töṙah nö el öp chūök mumfōv elmat lātulöng. Ngaich Ēhöt nö ngö ṙô, Kūmu chin tö ṙô in meh aṅ im Tēv. Hōklöre ngaich anga-aṅ nö ṙā-ang el öp anūichöre. 21Ngaich Ēhöt nö sëphöt kūö ök lātavēre, ngaich hōknyö ök sanët nö ṙā-ang ik lāhāmö takeun ò, saphötkūö ò ngaich nö i aich ò; 22Talöphötvö inrē ök haṙah nö unôichrit ök kūö ò; ngaich ök tö sangöö ò nö lömtörekūötī tök kūö ò, pò ò nö öt hōknyö kūö ök sanët nö ṙā-ang i aich ò; tafunköiny kūö nö lā uk. 23Ku-nyī-inyre ngaich Ēhöt nö el ök ranang taseū, öpngökūö ò anga-aṅ nö el ök lööṙö yamih, nö keuheūt tö kūö nuk inkūp, hachāp ngökūö u.
24Ngaich hē ò nö ngaich nö elkahôyö, yih ngaich yik tarik Ĕklòn; ngaich meuk cha-a yĕh meuk, öphakkūö nuk inkūp ök lööṙö yamih nö köpö kūö; ngaich ngö ṙô cha-a, kahumngö kunröönre ap lohten nö el ap chūök mumfōvöre urôhò. 25Ngaich höngngöh cha-a hanöng saha cha ngaich nö aṙē-ĕv: ngaich yĕh meuk, hö-ö anga-aṅ nö löpnyökūö nuk inkūp, ök lööṙöyamih; lökten cha nö kē chāpi, ngaich löpnyö kūö u: ngaich meuk ök mā re cha-a nö fukngö nö kapah nö el tumlat. 26Falngöre ngaich Ēhöt i saha chān ṙòngmö höka, ngaich vāngngö röön nö chööḵngö ök chūök vinī-i insā tēv ihong, ngaich i Seirah anga-aṅ nö falngöre. 27Ngaich ngö inlahen angū-ö, hē ò nö ngaich nö sölngö, ip rung panam Ifrĕm anga-aṅ nö föö öp römpet, ngaich hol ò yik kūön Israĕl nö peūtöre nö ṙā-ang im rung panam, urēhĕkūö cha anga-aṅ. 28Ngaich ngö ṙô anga-aṅ tö cha, tömrit chu: tön kēlö yip lā-al yīö an ngam Mā Tēv nö eltī yīö yip aṅ Mô-āp. Ngaich cha-a nö peūtöre nö tömrit ò, ngaich kē nuk lökngö invāngngö i Yôtön nö lā-al yik aṅ Mô-āp ngaich öt hĕng tak halöngten tö tarik nö havāngngöre. 29Kiyūngö Mô-āp cha-a ngaich hē e lohten nö söm köiny yik tarik, nö tö kalēḵ nyöre nö tarik, nö töt pa-ekūö inrē nö tarik; ngaich öt hĕng tak tarik tökô-òngvah. 30Hē e angū-ö sakāmö Mô-āp nö tumṙeūtu nö eltī Israĕl. Ngaich ngam panam nö hëvhöre anāi samyeūheu nö heūheure.
Samkār
31Unôichrit ò ang Samkār ök kikōnyö kūön Anat, ök kumyung yik aṅ Filistian, tafūölòng tarik nöng aṅtī tö lanòkrit nuā: anga-aṅ inrē mahayööken yik aṅ Israel.
Currently Selected:
KAMHÔKA 3: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
